اللهم صل على محمد و آل محمد
السلام عليكم .. !
بفضل الله ولدت بالسلامة بتاريخ 13 - 4 - 2009 ! .. و هذي قصة الولادة .. اتمنى المتعة في قرائتها للجميع .. !
..................
موعد ولادتي حسب الالترا ساوند هو 9 - 4 - 2009 ..
و على حساب الدورة 12 - 4 - 2009 ..
و من شهر 3 كنت اترقب الولادة ، على أمل ان اولد في اول اسبوع من التاسع مثل ولادتي الاولى .. و هذي كانت اكبر مشكلة ، لأني اخذت التاسع كله و زودت 4 ايام و هنا كنت قمة الاحباط و التعب (w) و هذا شي أثر على نفسيتي .. عشان جذي نصيحة لكل حامل في التاسع لا تشغل بالها بأمر الولادة نهائيا .. لأنه فعلا التفكير فيها و ترقبها متعب .. بالنهاية البيبي بيطلع بيطلع .. ! :)
الحين يبدأ الأكشن .. !
لما طوفت أول موعد يأست و استحلت انه البيبي بينولد ، زودت ساعات المشي السريع لساعتين تقريبا .. و تمارين الشهر التاسع كنت مداومة عليها و نظفت مكاني و ضبطت أموري ع الآخر على اساس اني خلاص بسوي شي يخليني أولد .
و فعلا .. تاريخ 12 - 4 الفجر و انا اتصفح عرووس جاني حماس مو طبيعي للولادة و قمت سخنت الحليب و اضفت له ملعقتين قرفة مطحونة و شوية سكر .. صليت الفجر و طلعت صدقة و شربته .. و طلعت الصدقة لأني خايفة القرفة تأذيني لا سمح الله !
بعدها نمت بعد ما توسلت و دعيت ان اولد و ارتاح ، و يوم ثاني صحيت من النوم و احس برطوبة بالمنطقة الخاصة ، دخلت الحمام و انتو بكرامة و الا افرازات معاها دم :D يافرحتي .. !
بشرت زوجي انه اولى علامات الولادة بانت و ان شاء الله مابظل اسبوع اضافي و انا حامل ..
ظلينا ننتظر ألم الطلق و دخل علينا الليل و مافي ألم :( ، بعدها انطلقنا للسوبر ماركت و شرينا اناناس طازج يمي يمي .. أكلت وااااااااجد .. على أمل انه يبتدي معاي ألم الطلق ، و فعلا بعد ما أكلت الاناناس ب ساعتين بدأ ألم خفيف كل ساعه الا ربع .. و اختفى ساعتين و نص .. لكنه رد رجع و بألم أكثر كل ساعة الا ربع (y) .. !
انا كنت في قمة السعادة و معنوياتي فوووق ، بس بعد خايفة من الولادة .. !
المهم .. نمت بعد صلاة الفجر و انا اراقب الالم و هو مستمر كل 45 دقيقة .. و كنت ابي انام حتى مااتعب بالولادة مثل المرة ال 1 !
و تاريخ 13 - 4 - 2009 ، الساعه 20 : 9 الصبح صحيت من النوم على الالم ، كان كل 20 دقيقة .. و صار كل 15 دقيقة و بعدها كل 6 دقائق .. :D
و انا أصلي الظهر قلت المدة بين التقلصات و صارت كل 20 دقيقة :eek: ، لكن بألم اقوى ..
سألني زوجي نتغذى او نروح المستشفى ؟ قلت لا : نتغذى :D !
ابي قوة للولادة ، و بصراحة الطبخة ماتتفوت خخخخ ، وقت اللي اتغذى اشتد الالم 1000 و صار كل 3 دقائق .. قمت على السرير اتوجع و بهدلت زودي وولدي المساكين .. زوجي يبي نروح المستشفى ، وولدي كل ماشافني اتألم يجيب لي كلينكس و العاب من عنده حتى اسكت :( ..
انتظرت التقلص يخلص و قمت ع السريع جهزت ثياب لولدي و لبست و طلعنا من البيت الساعه 30 : 4 العصر و اخذنا ولدي لأختي ، و الساعه 5 بالضبط احنا بالمستشفى !
بهاللحظات كنت حدي خايفة من ألم الفحص بس هونت كل شي عشان أولد و ارتاح .. شيكت النيرس طلع التوسع بس 2 سم .. !
قالت لي خلاص ولادة لأنه التوسع معاه دم .. طيب لبست لبس الولادة و عطيت ثيابي و عبايتي لزوجي و دزيت مسج لاختي اني دخلت ولادة و محتاجة دعواتكم .. !
الساعه 7 المغرب اشتد الالم و كنت 4 سم ، بس الألم بعده محتمل .. شوي الا اسمع صوت اختي برا تقول نبي نشوف فلانة نقعد وياها لين ما تتوسع اكثر .. لأنها تدري ان المشي و الحركة افضل من حبسة السرير و سيور التخطيط المقرفة و المغذي (w) !
الحمدلله الدكتورة سمحت لي اروح برا بغرفة منفصلة اقعد مع اختي و بنت خالتي و ولدي اللي اندهش من شكلي المرهق :o ،، كلها ربع ساعه و قلت لهم خلاص بروح داخل لأن الالم زلزلني .. !
و انا اراقب الساعه صارت على التسع و خلاص بهالوقت الالم اشتد بشكل فضيع ، و صرت مااقدر احبس صرخاتي .. لكن بنفس الوقت ساعدت نفسي بطريقة التنفس الخاصة بوقت الولادة و الحمدلله نفعتني .. !
رجعت النيرس تفحص التوسع بعد توسلات مني حتى ابي اتوسع بسرعه بعد الفحص .. التوسع كان الساعه 9 .. 6 سم .. ! استانست رغم الالم لأنه قرأت قبل انه الرحم لما يتوسع 6 سم خلاص ال 4 الباقية تصير سهلة !
الساعه 11 دخلت لي بنت خالتي و كنت في حالة يرثى لها من الصراخ و تقول لقتني منتفخة و شفايفي بنفسجية ههههه و ماسكة الحديد اللي على جوانب السرير و اصرخ !
و برا زوجي و خواتي و امي و بنت خالتي يسمعوني و يقرون ادعية و توسلات لتسهيل الولادة ..
و انا كل شوي اسمع التلفون و الجرس يرنون و يردون عليهم انه انا توسعت 8 سم ، جت الممرضة و فتحت كيس الماء حتى تساعدني .. و كلها 20 دقيقة الا و كل النيرسات التمو علي و جهزو عدة الولادة (y) !
و قالت لي النيرس كل ما حسيتي بألم ادفعي ..
الدفعة الاولى مؤلمة بشكل قاتل :confused:
الدفعة الثانية حسيت فيها إن الراس بين و بين ، يعني بيطلع بس متغلغص !
الدفعة الثالثة و الاقوى و اللي حسيت فيها روحي بتطلع هي خروج راس البيبي القمووور :D !
كانت الساعة 20 : 11 مساءا !
هنا انتهت كل الاوجاع سبحان الله !
رفعت لي النيرس ولدي توريني انه ولد و انا اقول لها أدري انه ولد :D:D مو مفاجأة !
و الحمدلله تحققت امنيتي و هي انهم خلو البيبي على صدري مباشرة من بعد ما طلع من بطني و هو يصيييح ياقلبي و مسحت على جبينه و اشوف ملامحه مثل أخوه و ابوه و الفرحة مو شايلتني .. كانت من ضمن أحلى لحظات حياتي !
الله يرزق الكل بهالفرحة يارب !
بعد الخياطة بشرو اهلي اني ولدت و اختي الصغيرة عبرت عن سعادتها بشقلبات الجمباز هناك بالمستشفى ههههه ، طلعوني لأهلي و كنت بين الصاحية و النعسانة بسبب الابرة .. و بعدها للجناح و هناك رضعت ولدي أولى رضعاته الحمدلله .. !
طولت عليكم رغم الاختصار .. و هذي صور أميرنا الهاشمي الجديد ( سيد رضا ) !
اول رددو ..
اللهم صل على محمد و آل محمد ..
ماشاء الله ، لاحول و لا قوة الا بالله !
هذا سيد رضا بعد ساعة و نص من ولادته ..
يوم ثاني .. !
و هنا لما رجعنا البيت و نام بسلام في سلته !
و هذي الصورة اليوم !
....
الله يخليه لي و يخلي اخوه .. و يجعلهم من الذرية الصالحة .. !