ادعولنا ساعدونا لو بكلمه مواساه

حبيت أدعي لكم من كل قلبي وأسأله الفرج ربي ينولكم كل اللي تحلمون فيه يارب
وما تدري يمكن تأخر زواجكم هذا خيره لكم (ولعل الذي أبطئ عني هو خيراٌ لي لعلمك بعاقبة الامور ) احنا ما نعرف وش الي فيه صالحنا الله وحده يعلم وين الصالح لعباده وش يدريك يمكن لو تزوجتوا ما كان في زواجكم خير .. الوحده تحمد ربها مليون مره لو شافت مصيبة غيرها هانت عليها مصيبتها أنتي بس ادخلي وشوفي المشاكل اللي بين الازواج .. الوحده من هذول تتمنى لو ضلت عانس في بيت اهلها ولا لحظه مع واحد من هالازواج اللي الواحد منهم اما خمار او حشاش او ابو بنات او تبع شغالات .. او هذاك اللي يصبحها بكفوف ويمسيها بطراقات .. يعني الوحده منهم وش احساسها ؟؟؟ غير انها تتمنى كل لحظه موتها او موت الظالم اللي عايشه تحت ظله .. والمشكله لو أن مافي طريق رجعه لها لبيت اهلها يعني في ناس تعنس بنتهم عندهم ولا انها تتزوج وتتطلق حتى لو كان زوجها مجنون .. حتى لو كانت حياة بنتهم معرضه للخطر يعني في مجتمعات وقرى الطلاق عندهم حرام .. والله يا اختي الدنيا مش كلها زوج وأولاد صحيح أن هالشي حلم كل بنت .. بس والله ان في اشياء بحياتنا حلوه احنا مو شايفينها لأن شايفين السعاده تنحصر في شي معين في داخل مخنا ..دوري على الاشيا الحلوه بحياتك ولا تضيعيها بالتفكير في هالشي .. والله لو لكم رزق راح تاخذونه لو باقي من عمركم يوم .. والله ما يظلم عباده ابدا هو ارحم فينا من امنا اللي ولدتنا .. ولو تجري جري الوحوش غير رزقك ما تحوش .. عيشي لحظاتك ولا تضيعيها بالهم وبدل ندب الحظ ادعي الله من كل قلبك مش بالزواج لا .. بالستر والعافيه والفرج والسعاده سواء جت من باب الزواج او غيره
ربي يسعد ايامك ويفرح قلبك وينولك مرادك ويدفع عنكم العين وشر النفوس ... تحياتي