بنات ساعدوني .. خاطري متكدر ومجروح

السلام عليكم :

انا بنت عمري 34 سنه واسكن مع اهلي امي وابوي واخت اكبر مني مو متزوجه واخواني المتزوجين مشكلتي متفرعه اول شي واهم شي العنوسه طبعا تقدمو لي اكثر من شخص لكن ماصار لي نصيب بسبب اخلاقهم من ظمن هالاشخاص واحد شكله قابل للتغير حاولت اقنع اهلي بالقبول لكنهم رفضو يعطوني فرصه معاه وانتهى الموضوع ومرت بي الايام والشهور والسنوات على هالحال مع اني جميله ولله الحمد لكن النصيب هذا فرع من المعاناه الي اعيشها ,,,
اما حياتي مع اهلي فهي صعبه جدا امي واختي يعانون من المرض وانا عانيت معاهم اروح وياهم المستشفى وحالتهم كانت تستدعي اني اظل اتنقل وياهم بالمستشفيات احيانا بالمرتين في اليوم واظل وياهم في قسم الطوارئ من 5 الى 8 ساعات وهذا غير المواعيد ولما ارجع البيت اسهر وياهم واختي ماتنام لمدة سنتين ظلت تعاني وطول الوقت تصيح يعني ماارتاح لا ليل ولا نهار وغير شغل البيت ال تحملت مسؤليته وفي هالفتره قررو اخواني يجيبون شغاله للبيت وكانو يدفعون راتبها من اجار البيت القديم ومن جابوها ارتحنا اشوي لانها شالت عني جزء من المسؤليه وهي رغم انها ساعات تصارخ وماتبي احد يساعدها لكن الله يشهد انها متحمله كلشي في البيت وخصوصا اولاد اخوي ال قالبين البيت فوق تحت وامهم ماتهتم ليهم وطول الوقت ياكلون ويقطون بالارض ,,
قبل حوالي 3 شهور اخوي اتفق وي الشغاله ان ياخدها يوم السبت العصر ساعتين تنظف ليهم شقتهم وبيدفع ليها مبلغ اضافي على راتبها فقلنا ماعليه مرت اخوي وعندها اولاد وتوها والده
لما وافقنا وراحت تشتغل عندها السبت مرت اخوي عجبها الوضع وظلت كل يوم وكل اشوي اطرش على الخدامه تبيها تشتغل عندها واهي تخلي شغل البيت وتروح ليها لاحضنا هالشي عليها وقلت ليها اخوي اتفق وياش يوم السبت ليش كل يوم تروحين وتخلين شغل البيت تقول ماما تناديني شسوي قمت وكلمت اخوي وقلته ترى مرتك كل اشوي تناديها والشغاله تخلي شغل البيت وتروح ليها قام وكلمها ومرت اخوي نكرت انها تطلب منها تشتغل عندها وبعدها قال اخوي بس بنتفق بدل اليوم يومين في الاسبوع ومابطرش عليها مره ثانيه
وافقنا على اساس يومين تروح وبنظام وبدون ماتستدعي الشغاله في اي وقت لكن قبل ايام جت مرت اخوي تصارخ على الشغاله وتهاوشها وتقول انها مدت ايادها على اولادها واني في الوقت ال هاوشتها كنت بالمستشفى مع امي ولما رجعت لقيت الشغاله تصيح وقالت لي اختي ان مرت اخوي هاوشتها فقلت هي ماليها حق تتهاوش وياها اختي علمتني عن سبب المشكله بينهم تقول عقب ماطلعنا المستشفى قامت الشغاله تنظف واولاد اخوي يوصخون البيت كذا مره وانقهرت عليهم الشغاله وقالت ليهم روحو بيتكم وبانظف بنت اخوي لغويه قامت تصارخ وتقول انتين الشغاله انتين نظفي واحنا بنوصخ وانقهرت عليها وسحبتها وطقتها وجت مرت اخوي تهاوش الشغاله بدون ماتعرف ال سوه اولادها واحنا سكتنا وماتكلمنا..
لكن بعد مرور 3 ايام وفي هالفتره احس نظرات اخوي لي غريبه وفجاءه في يوم كنا قاعدين ومعنا اختي الكبيره فتح اخوي الموضوع وظل يتهجم علي ويتهمني اني السبب وبنته كانت وياه تتلغى واطول لسانها وتسوي تصرفات وتضايق الكبير والصغير منها وامها وابوها ساكتين عنها واني متحملتنها وساكته وهو طول الوت يصارخ علي قلت ليه زوجتك هالسوسه تشوش والفايده فيي اني مارجعت من المستشفى ال الشغاله تصيح واكثر من مره تهاوشها وبعد تتهمني اني السبب وظل يصارخ علي وطردني من البيت وقال لي اولادي داخل وانتي برى البيت وقلت له اوكي تفكرني مو شايله روحي بطلع من البيت وانت المسؤل عن كلشي يصير
وارتاح انت وي هالسوسه قمت بطلع اخواني الباقي حالو يمنعوني وبعد فتره قدرت اطلع وادور بالشارع واني اصيح لفيت بالسياره 3 ساعات بالليل ماعرفت وين اروح وشسوي
وماعرفت اخلي اهلي بوضع مخزي اشبقولون الناس لو عروفو اني طلعت وظلو اهلي يتصلون علي ارجع البيت ورجعت واني احس بالذل والاهانه للحين .

خواتي اعتذر عن هالاسلوب لكني طفشت من الدنيا ومن هالحياه الصعبه اتمنى القى منكم الحل ساعدوني املي فيكم بعد الله ,, وادعو لي الله يوفقني