كان يوم الجمعة تاريخ 23 / 1 وكنا بيت الأهل نروح بيت العود البيت الكبير
بعد صلاة المغرب وبالضبط كانت الساعة ست ونص كنت ألبس عشان نروح انا وزوجي مثل عادتنا كل ليلة نمشي في السيتي سنتر بحكم انه اكبر مجمع هني وفيه مساحات كبيرة للمشي
وانا البس عباتي حسيت بحاجة تنزل قلت لزوجي بروح دورة المياه عزكم الله بشوف شالسالفة لأن شكل اللي ينزل دم وظني ما خاب فعلا يوم رحت لقيت نازل شوي
رحت السيارة وانا عندي شوية ألم بس كنت احسبها آلام طبيعية عشان الشهر التاسع كله معاناة هذا غير نزول البيبي وإعاقته لحركة الأم
المهم مشينا وانا للحين مصرة أروح أمشي وزوجي مو راضي يقول لي يمكن يصير لك شي وبين أخذ ورد مني ومنه بدت الآلام تتركز في خصري ونهاية ظهري بعدها اقتنعت اني ما أروح امشي وبديت اقتنع ان اللي يصير لي بوادر ولادة خخخخخ توها الناس
رحنا قعدنا بيت الوالد شوي وانا مو على بعضي بس ما خبرت أمي عشان لا تحاتي وقلت لزوجي اذا الله سهل وقمت بالسلامة خبرهم بس الحين لا تخبر حد
بعد ما مشينا من بيت ابوي رحنا البيت وهني بدا الجد كل شوي دورة المياه أعزكم الله بس لا ماي ينزل ولا الدم زايد ينزل بس شوي لكن الألم تزيد وتيرته وبسرعة واذا قمت بمشي ما اقدر أحس بصعوبة كبيرة بالمشي
قعد زوجي مسكين يحن علي يالله نروح المستشفى وانا اقول له تو الناس بدري نروح من الحين وحدة رايحة ووحدة جاية وكل شوي كشف وما اعرف ايش لين صارت ثمان ونص مشينا للمستشفى بعد إصرار زوجي فديته
وصلنا المستشفى وانا طبعا أمشي وأكابر اني اقدر امشي مع اني احس بمجهود كبيييير لا مشيت وبعد ما وصلنا قسم الولادة دخلت وياي الدكتورة الغرفة ولقت ان الرحم مفتوح 6 سانتي ويييييييل قلبي قالت لي شوقوه شلون تمشين وانتي هالكثر فاتح الرحم
انا تشققت يوم قالت لي 6 يعني هانت ربي لك الحمد وما باقي شي
عاد هالحزة صار عندهم الركيض والحالة قايمة وجابوا لي كرسي قلت لها لا دكتورة ما أبي أقدر أمشي تجروني على الكرسي ليش
قالت لي يالله لازم تقعدين ممنوع تمشين خلاص وياحلاتي وانا قاعدة عالكرسي وبس بلوزة علي بدون بنطلون خخخخخخخ شكلي كان تحفة والممرضة طايرة فيني على غرفة الولادة
المهم وصلنا غرفة الولادة وبدلت الباقي من ملابسي وانا أصلي على محمد وآل محمد وأقرا بعض الأدعية القصيرة وأكثر من قراءة سورة الزلزلة والاستغفار اللي كان لهم أثر كبير في طمأنينتي والتخفيف عني ربي لك الحمد
بلحظة ما دخلت الغرفة وصلت دكتورتي لأن اللي كانت معاي الطبيبة المناوبة بحكم انه يوم جمعة ودكتورتي اجازة والحمد لله انها بسرعة وصلت وما تأخرت
يوم وصلت شيكت الا تقول لي وصل التوسع 8 ما شاء الله وانا أستغفر وأقرا اللي يجي على بالي بهالفترة لأن الألم بدا يزيد بس للأمانة يا بنات وربي يشهد ان شكثر للقرآن والأذكار أثر في تخفيف الآلام وبالذات آلام الولادة اللي ما لها مثيل
حتى الدكتورة لاحظت تقول لي ما تتألمين قلت لها بلا بس الألم مو متواصل يروح ويجي ومو قوي وااجد
قالت الحمد لله يالله شدي حيلك وان شاء الله كلها شويات وانتي قايمة بالسلامة قلت لها ان شاء الله يارب يسمع منك
قالت لي بس بفتح كيس الماي عشان ربي يسهل وتولدين بسرعة وأول ما حطت يدها الا تقول لي البيبي مسويها بس لا تحاتين لأن انتي على وشك ولادة ولا بيصير الا كل خير قلت الحمد لله على كل حال واللي فيه الخير يسويه ربي
المهم حطوا جهاز التخطيط وقياس الطلق وبدت المرحلة الثانية والأصعب كل شوي إبرة وما اعرف شنو
زوجي كان ملازمني بكل المراحل بس يوم صار الجد شفته يطلع ويدخل ومرة يقرا قرآن ومرة يجي يحط الأوكسجين وآخر مرة مسكين ضربته على إيده خخخخخخ مسكين قلت له ما ابيه خلاص ما ينفع الألم وصل حده لأن قرب تشريف حبيبي
وصل التوسع لعشرة وانا ماسكة نفسي عشان لا أصرخ بس يوم صار لازم أدفع لا شعورياً صرخت وقربت يمي الدكتورة قالت قولي يا الله ودفعي وان شاء الله دقايق والبيبي طالع
والحمد لله رب العالمين على الساعة 10.29 مساءاً شرف حبيبي ونور عيوني محمد ونور دنيانا وخذوه ينظونه ولفوه في منشفة كبيرة وحطوه على صدري وانا دموعي تنزل واحمد ربي وخذه أبوه أذن وأقام في إذنه وهو يبتسم لي ويقول لي الحمد لله عالسلامة يا أم الأبطال ربي لك الحمد
يعني كانت فترة الطلق بس أربع ساعات من ست ونص لي عشر ونص ربي لك الحمد وهذا بفعل التوكل على رب العالمين وقراءة القرآن الكريم والأذكار
وبعد الولادة والخياطة خذوني لغرفتي وخواتي والأهل كانوا كلهم ينتظروني
والكل يبارك ويهني على عطايا ربي
وبسسسس هذي قصتي وقصة تشريفه حبيبي
والله يقوم كل حامل بالسلامة وربي لا يحرم هالنعمة على جميع المسلمين والمسلمات وربي يرزق كل محروم ومحرومة يارب
-
