شوفو قصتي وشو صار معي يا صبايا

السلام عليكم ورحمة الله وبركاته والصلاة والسلام على أفضل الخلق و المرسلين محمد صلى الله عليه وسلم
صبايا أنا حابه اعرض لكم قصتي وأجعلكم تشاركوني فيها ................
لما كان عمري 16 سنه انخطبت أنا وأختي لأخوين بس ما صار نصيب وتركنا وبعدها بشهر اتزوجنا من عائلتنا اخيين بس كانت كارثة العمر انه ضلنا عندهم بس شهر واحد وربي يشهد على انه بس شهر وبعدها رجعنا على بيت اهلنا وصارت مشاكل كتيره في هاي الفتره ما كنت صاحيه لشي من كتر المشاكل اللي كانت حولينا سالتني امي اذا الدوره اجتني ولا لا قلتلها انها ما اجتني وعلى طول اخدتني وعملت فحص حمل والنتيجه كنت حامل ومش داريه عن شي من الهم والزعل وكنت صغيره 16 سنه يعني مش متل هلىء واعيه ورجعنا على البيت وابي خبرهم اني حامل بس ما سالوا وانا ما كان بهمني شي الا الحمل لاني كنت كتير احب العب دور الام واحمل دايمه لعبتي معي اطعميها واغريلها بس في يوم وانا كنت واقفه في المطبخ حسيت بشي نزل علي ورحت على طول اشوف الاوهو دم نازل علي وحكيت لامي طبعا قالتلي ارتاحي مع اني ما كنت مساويه شي بس قدر ربنا وهيك بدى عند وجع شوي شوي وضل يقوى وفي الليل ما عرفت انا م من كتر الوجع وصار عندي وجع رهيب لا عارفه انام على بطني و لا انام على ضهري وانا طول الليل ابكي من الوجع واختي تبكي معي والحمد لله على كل شيء وطلع النهار وانا بتلوى من الوجع وصار الوجع اقوى من قبل وانا مش شايفه شي من كتر الوجع وباخر النهار التاني دخلت على الحمام اعزكم الله الا وقطعه كبيره من اللحم بتنزل مني وبعدها اختفى الوجع بقدرة الله وضلت تنزل علي الدوره وكاني في النفاس والحمد لله على كل شيء هيك ضلنا من شهر 10 الى شهر 8 السنه اللي بعدها معلقين لا متزوجين ولا مطلقين بس خلصنا منهم والحمد لله كلنا كنا فرحانين لانه خلصنا منهم بس الكارثه الكبيره انه ابي صار عنده وجع في صدره وطلع عنده تسكير في الشرايين ولازم يعمل فتح لهاي الشراينن وكل هالشي من زعله علينا انا واختي لانه ما في غيرنا بنات عنده وهو بحبنا كتير وخسر مصاري كتير منشان يسعدنا وانا ما كان همي نفسي على قد ما كنت خايفه على ابي من انه يصير فيه اشي لسمح الله وبتصدقوا لانه عمي الكبير الله يسامحه كان السبب في كل المشاكل وابوي هو الاخ الصغير بين اخوته واعتبر عمي الكبير بمثابة اب اله واحنا كنا متزوجين اولاد بنتوا وهو اللي وقف يقول انه بدنا نطلق وما بدنا نخسر وشي وبالفعل تنازلنا عن كل حقوقنا ودفعنا فوق كل هاد بس منشان راحتنا وسعادتنا .........
بلا من طول سيره أختي الكبيرة كان معها توجيهي يعني مخلصه ثانويه كملت على طول سكرتاريه وإدارة أعمال وانا ما كنت مخلصه المرحلة الثانوية فعملت انتساب واخدت التوجيهي وكملت سنتين تربية طفل في الكليه وفي هاديك الفترة كانت أختي تشتغل سكرتيره في جامعة القدس وكنت ازورها لانها قريبه من كليتي واروح معها في تلك الفترة شافني أستاذ في الجامعة وحب يتعرف علي بس انا كنت خايفه وما اعطي ريق حلو لحد لاني كنت مفكره كل الرجال متل بعض فما كنت احكي مع حد ابدا الا انه هاد الأستاذ اجى وتعرف علي وسألني إذا كنت مرتبطة بحد وحكيت له قصتي وشو صار معي ورغم هيك طلبني من اهلي لانه كان شايفني ومش مصدق حاله لانه الحمد لله انا ربي خلقني جميله وحلوه وكل اللي بشوفني بقول لزوجي ما اجمل مرتك وما احلاها وخواته مش مصدقين حالهم في الحمد لله على الخلقه التامه واجى وانا رفضت ما كنت بدي اتزوج واعيد الكره مره تانيه بس النصيب رجعني اله وصار بينا قصة حب كتير حلوه ادت في النهايه الى الزواج والحمد لله انا مبسوطه معه ومرتاحه وماعمره حسسني ببشي ابدا بس صار لي خمس سنين متزوجه وماصار عندي حمل ولا مره وعملت اربع عمليات حقن بس ما زبطوا وهلىء بستنى يوافقواعلى الزراعه لانه احنا ما في عندنا مشكله والله اعلم.........
وعلى فكره اختي اتزوجت بعدي بسنتين وانجبت ولدين بطيروا العقل الله يخليهم ويحفظهم من أي مكروه ، شفتو قصتي وشو صار معي !!!!!!!!!!!!!
يمكن اللي مصبرني هو ( المؤمنون اشد بلوه ) الحمد لله رب العالمين
اللهم اني مسني الضر وانت ارحم الراحمين