شيخة الزينات هلت واقبلت -- مقتطفات من حفلة خطوبة ...

[grade="FFA500 4169E1 800080 FF4500 FF1493"]مساء / صباح الخير يا عرايس يا حلوات ..[/grade]

اول شي ترددت وااااجد قبل انزل الموضوع بس يوم شفت الكل ينزل مواضيع تجهيزات .. قلت خليني اشارك اخواتي العرايس في مقتطفات من حفل ...

[glint].. خطوبة بنت اختي ..[/glint]

بعدما جهزنا و راكضنا واستقرت الامور .. وحددنا المكان والزمان (صالة الدانة (1) - 30-8-2008م) .. قررت خالة العروس هذيان عاشقة انها تعزمكم يا عرايسنا الحلوات .. فارسلت لكم بطاقة الدعوة ..

هذي كوشة العروسة .. طبعا هي الكوشة الموجودة فالصالة ولاغيرناها ولا اضفنا لها اي شي ..لان ماكان فيه وقت اسوي هالشغلات لاني كنت مسافرة ورجعت وبعد يومين كانت حفلة الخطوبة ..

انا ماراح اعرض لا صور مكياج العروس ولا التسريحة ولا الحنة احسها تفاصيل ما تنعرض عالنت بس جزء بسيط من الفستان بيظهر فالصور.. اللي كان تفصيل المصصم غلين في مشغل الكينزا في البوكوارة ومكلف فوق ال 600 دينار (شامل الطرحة واكسسوار الشعر ومعاه جاكيت ينلبس فوق الفستان لوحد بيدخل وبتتغطى العروس او شي مثلا اخوها او عمها) لان الفستان قصته كوكتيل من فوق .. لونه ازرق سماوي مدخل فيه الابيض والفضي في الشك والسوارفسكي .. المكيااج كان عند عايشة البلوشي (حطت لها تدرج من الرمادي مع البني الترابي والفضي وداخل العين كحل ازرق نيلي والروج كان وردي على احمر يشبه لون الكرز بدرجة افتح) ماكنت مقتنعه فيه واجد بس بعدين حسيته احلى خصوصا فالصور لان لو حطت لها ازرق بيصير تووومج .. شعرها كان في الرونق عند فتحية .. رحت الصبح انا واخت العروس وخذينا رقم للعروس وارقام لباقي الاهل اللي معانا .. شعورهم عند الفلبينيات والمكياج عند فاطمة البحرينية .. نعوومي كان ..ويوم ابتدوا في العروس اللي قبلها مباشرة اتصلنا فيها عشان تجي مع امها.. خلصت شعرها بدري عالساعة 2 تقريبا .. وعايشة جات على 4 وما كان عندها الا العروس وانا .. :D .. مكيجتها ويوم خلصت مكيجتني

فالوقت اللي كنا فيه في الصالون المعرس خذ الشبكة و رصيد الباقة والاغراض اللي معاها وبعد ما صلى وكشخ ولبس راح القضيبية لحديقة الازهار وودا معاه الشبكة ثبتوها له في الستاند واعطوه اياها مع باقي الاشياء اللي كانت عبارة عن مقص كبير بقولكم قصته بعدين .. و سكين كبيرة للكيك و ملعقة كيك .. وشوكتين صغار و ملعقتين صغار وكاس كبير للايسكريم .. ماحبيت احط عصير لان الفكرة مستهلكة ..

بعد ما خلصنا كلنا مشينا من الصالون طبعا على دفعات .. وانا واخت العروس والعروس كنا آخر ناس طلعنا من اهلنا من الصالون .. لان اختي ام العروس جهزت من بدري مع اختي الثانية و طلعوا لازم يروحون الصالة قبلنا عشان يستقبلون المعازيم ..طبعا اختي من الربكة خذت معاها عباة العروس واكتشفنا هالشي يوم جينا بنطلع .. ماقصروا طبعا اللي بالصالون عطونا بشار "مشمر" صلاة عشان تتغطى فيه العروس .. كانت مصخرة بصراحة خخخ :D

يوم رجعنا البيت العروس بدلت ملابسها .. وعطرناها ولبست الفستان بعدين بخرناها .. وجاء خطيبها وقعدت معاه على ما انا واختها نبدل ..وحطينا لها المبخر وقلنا لها بخريه لووول :D

طبعا انا فالبيت عصبت حدي يوم جابو ستاند الشبكة لان نفذوه لي شويه غير عن اللي كنت ابيه .. بس شسوي مافيه وقت للتغيير .. خلصنا لبس وطلعنا بسيارتي وهم بسيارة المعرس راحوا محل الايسكريم عشان يعبونه ايسكريم قبل ما يجون الصالة..

التصوير كنا ماخذين ام يقين باكج بو 150 (روووووعة) .. اتفقنا مع الصالة يخفضونا المبلغ اللي يعطونه للاستوديو احنا بنتصرف .. فرجعوا لنا 100 دينار وزدنا عليها طبعا 50 للفوتوغرافي .. و60 للفيديو كان استوديو الاسطورة ..(كان فاشل بصراحة)..

يوم وصلو المعاريس قعدوا يتصورون في الغرفة بعدين طلعوا على زفة شيخة الزينات .. ومشوا المعاريس بروحهم لان العروس متفقة مع اهل المعرس ان يمشون لحالهم .. بس عشان خاطر عمتها وعيالهم الصغار يبون يمشون فالزفة .. خليناهم يمشون بروحهم ورى المعاريس بمسافة وينثرون الحلاوة والفلوس واللي يبونه يعني زفتهم لحالهم .. :D ..خلصت الزفة و حطوا العشى .. اللي كان بوفيه تبع الصالة ..

والناس تتعشى طبعا صارت تلبيس الشبكة والدبل .. اللي هم سبب عصبيتي فالبداية .. فكرتي كانت ان نجيب مخدة كبيرة تتزين .. ويتزين معاها مقص كبير .. عشان يقدم للمعاريس (نفس جوتي سندريلا عزكم الله خخخخ) .. ويقصون فيه الدبل اللي تكون مثبتة اصلا في باقة العروس بشرايط فضية طوويلة .. وبعدين يلبسونها .. بس الفلبيني تخربط وحط لي المخدة مع مخدة الشبكة في الستاند مال الشبكة .. وقت التلبيس اختي ام العروس مسكت الباقة والمعرس بالمقص قص دبلة العروس من الشريطة اللي في باقتها مثبته ولبسها ونفس الشي العروس قصت دبلة المعرس ولبسته..

لاحظوا الدبل عليها مربع احمر مربوطة بالشرايط الفضية في الباقة ..

يوم خلصوا لبس الدبل والشبكة .. قطعوا الكيك .. واكلوا الايسكريم اللي ساااح في الثلاجة لان الصالة مافي مطبخها فريزر ...خخخخ..

كأس الايسكريم عبارة عن حوض سمج صغير .. شفته حلو ويناسب فكرتي فشريته ووديته يزينونه لي مع الباقة ..

الحفلة كانت حلوة ومتعبة وفيها احداث ما تنسي :wink: .. بس مابعور راسكم بباقي التفاصيل :tongue:.. اعجبكم موضوعي لا تنسون تقيمونيييي ..(y)