كلام الناس يضحكني

السلام عليكم ورحمة الله وبركاته

كيف الحال عرايس ؟؟

بنات انا اليوم بغيت اقول لكم سوالف صارت لي واضحك على نقص عقول اللي سواهم معاي وعلشان ما تحسون انكم وحيدين في المعاناة ،، انا يا بنات كل يوم ادخل القسم واقرأ معاناتكم وقصصكم وصرتوا مثل خواتي ،،

يا عروسات انا صار لي من تزوجت 6 سنوات و4 شهور وما مره حملت حتى لو اسقط يعني حمل نهائياً مافي والحمد لله على كل حال المهم بقول لكم ،،
هذا سلمكم الله يوم جات وحده من قريباتي اللي ما شاء الله عليها اذا بغت تحمل تحمل ،، المهم عندها ولد عمره سنتين وانا امووووت على العيال بهالعمر واحب العب معاهم عاد يوم شافتني العب معاه قالت لي اخذيه لج << تحسبني صندوق التبرعات ومن يومها وانا ما امسك ولد اي احد حتى ابتسامه ماابتسم له علشان ما احد يتبرع لي ويفهمني غلط

القصه الثانيه ان وحده ثانيه من قريباتي بعد حملت واهي تمنع قاموا يقولون وانا جالسه يوووو ياليت لو فلانه << طبعاً فلانه انا المقصوده بها ،، مع انّي ما اغلط على احد ولا اجرح احد بس ما ادري ليش يتعاملون معاي بهالطريقه أصلاً انا قليلة كلام
لا والقهر يقولون لي انتي حساسه بزياده

اما القصه الثالثه هذي حسيت انّي اتقطع فيها لما تزوجت اختي و مافي احد متزوج الا انا واهي وانا كل شهر ادعي لها ماتعاني معاناتي والحمد لله حملت بس للأسف ما احد قال لي :confused: ،،
بعدين امي حضنتني وقالت لي يمه تمنيتج انتي ،، انا ما بكيت لما امي قالت لي كذا لا انا بكيت لما قالت لي ان اختي جات قالت لها انا حامل وامي ولا اي تعبير حتى ما فرحت لها :(
حسيت ان الذنب ذنبي قتلت فرحة اختي وانا كل يوم اعاني من الناس ومن روحي واضحك وابكي

يالله الحين خلصت القصص قوموا ناموا تصبحون على خير :D