قصة ولادتي بالتفصيل .. وكل ماتعلمت من الولاده .. ادخــــــلي لتستفيدي ..

بسم الله الرحمن الرحيم ..

انا بحكيكم اليوم عن قصة ولادتي بالتفصيل الممل عشان اللي على وشك ولاده تتنبه وتحط ببالها اللي ماحطيت ببالي >> يعني ليلي طويل وانا احكيكم ..
انا اخذت شهري التاسع وزاد عليه 12 يوم من العاشر .. وكلكم تعرفون ان الدكتوه قالت لازم تجين وتاخذين طلق صناعي .. عاد اختكم مسكها الخوف من بعد ماتعشيت يوم الاثنين لأن صباح الثلاثاء ابروح وتركب لي الطلق ..
وماعاد حطيت بمعدتي شي لأن كثير بنات قالوا حتى لو خذتي الحقنه الشرجيه بتوسخين وقت الدفع وقلت ماراح افشل روحي .. ونمت .. صحيت الصباح جهزت وانا متوكله على ربي بس ماقدرت آكل شي ابد ..رحت للدكتوره وشيكت علي وقت ماكان زوجي يوقع اوراق الولاده .. طلعت المويه ناقصه عالبيبي .. والرحم مفتوح 2 سم ..
طلعوني لغرفة الولاده .. لكن مارضوا يدخلون زوجي كانت زحمه وعدد اللي يولدون كثير فدخلت لوحدي .. غيروا ملابسي .. وعطوني الحقنه الشرجيه .. وانا قلبي بيوقف من الخوف .. دخلت الحمام معاها مرتين وتريحت هالكلام الساعه 11 الظهر .. جتني الممرضه وركبت الطلق .. وانا مااحس بشي ابد ..جتني الدكتوره ولقته فاتح 3 سم وشوي قالت راح افتح لك كيس المويه عشان يحمى الطلق ..وبس فتحت الكيس وكأني بعالم ثاني بدت التقلصات كل 5 دقايق اشوف الموت دخلوا زوجي شوي هداني وطلع والطلق كل ماله يحمى يحمى ويزيد .. وانا آخذ نفس واستغفر واحاول مااجهد روحي بس ماعاد اتحمل سبحان الله صرت كني شابكه عالكهرب وطلبت ابرة الظهر .. جت طبيبة التخدير وعطتني اياها واااااااااااااه ارتحت راحه تامه خذيتها وانا 4 سم ونص .. وكانت الساعه 3 العصر شوي الا بديت ارجف ارجف .. شيكتني لقت الرحم فاتح 7 سم وشوي عاد انا بطير من الفرح قربت اشوف بنتي .. جتني الممرضه وقلبتني ووجهها معتفس وانا مروقه اتصل بزوجي واقول حبيبي شوي واقولك اني ولدت ..لأن الرحم ماشاء الله فتح بسرعه .. وهي كل شوي تسحب اوراق نبض البيبي وتشخبط فيها وطارت عالدكتوره تناديها الدكوره جتني تخيلوا اتخيلها بتقولي يالله الحين بتسوين بوش ..
بس للأسف قالت لي الرحم رجع يقفل والبيبي نبضه ضعف لازم قيصري :ss:
والله والله والله كأني تنقعت بثلج وصرت ابكي واقول ابي زوجي ..طلعت شرحت له الوضع وراحت تستعد للعمليه وهو جاني وهداني وانا من الصدمه صرت بدنيا ثانيه كنهم بيودوني للقبر نزلوني للغرفه وطبعا" التخدير بنفس ابرة الظهر يعني انا واعيه ودخل معاي طبيب تخدير عند راسي وعطاني جرعه ثانيه غطوا عني من الصدر ونازل مااشوف اش يسوون وعطوني مثل المهديء.. تخيلوا من الخوف اقول بالله يادكتوره ماتقصين شي انا بعدني احس <<<خخخخخ كذابه بس خايفه . المهم الدكتوره بدت وانا مااحس الا بشد وضغط خفيف فجأه قوي وطلعت بنوتتي تصيح وتبكي وهم يقولون جبتي بنت حلوه << برضو كذبه شكلها كان معتفس ويضحك فديت روحها .. وصرت ابكي بكى مو طبيعي :confused: لأني تخيلت انهم بيحطونها عصدري وانحرمت من هالشي ..
شالوها وودوها الحضانه .. وطلعوها لزوجي وهو يبكي برا .. وانا تميت اسولف مع الدكتوره وهي تخيطني وعملت لي خياطه تجميليه للقيصريه ماشاء الله مو مبينه ..وبعدها ودوني غرفة الافاقه وجاني زوجي حبيبي وهو ميت من الفرحه وخبر اهلي واهله .. وجونا للمستشفى ..


الاشياء اللي خذيتها عبره من ولادتي //
لاتروحين تولدين وانتي مجوعه نفسك ابد .. انا تعبت بعد العمليه وقبلها من الجوع ..

ابرة الظهر هي فعلا" ابرة الرحمه والهرج الفاضي والشلل والتعب ماله اساس من الصحه فنصيحه مني لوجه الله تاخذونها اذا ربي يسرها لكم ..

اكثر شي دمرني في ولادتي هذي اني ماحسبت حساب القيصري تميت متخيله اني بولد طبيعي لأن ماعندي سبب يمنع ونسيت انها تصاريف من رب العباد فنصيحه احسبي حساب القيصري والطبيعي ..

لو حملتي لاتقولين لأحد على حساب حملك انا اللي برد طلقي وتعب نفسيتي ان العالم طفشوني ليه ماولدتي ليه ماولدتي ؟؟

وهذي قصتي وقصة ولادتي دعواتكم يالغوالي لي ولزوجي ولنور دنيتي (( لمار ))