اللي يشوف بلاوي الناس

السلام عليكم ورحمة الله وبركاته
كيفكم يا حبايب عساكم تكونو بخير
النهاردة كنت في مشوار أثر فيا أوي وحبييت أحكيه لكم
اليوم يا جماعة رحت لدار للمسنيين والعجزة ( الحمد لله الذي عافنا مما إبتلاه هؤلاء وفضلنا على كثير ممن خلق تفضيلا كثيرا ) يا جماعة والله العظيم لو شفتو فعلا الناس اللي انا شوفتهم حتحمدوا ربنا كتير جدا وحتحسوا قد إيه إنتو في نعمة انا حسيت ان الحاجات اللي انا باعتبرها مشاكل وهموم ولاحاجة فعلا ولا حاجة بالنسبة للحالات اللي شوفتها
شوفت _ وربنا يعافينا جميعا _ مسنة مش مرتاحة في أي وضع لا هيا قادرة تمشي ولا هيا مرتاحة وهيا قاعدة طول النهار تتسند على حد وتمشي وهيا بتإن أو تبكي ولما قعدت ربنا يعافيكوا كان ينزل من فمها ريالة ( اللي إخوانا الخلايجة بيسموها زعابيل )
ومسنة أخرى قاعدة وجسمها كله بيترعش وأغلب المسنات مش واعيين إيه اللي بيحصل حواليهم بالظبط مثل اللي واخد مخدر مش داريين بأي شئ
وصورة تانية شوفتها في دار العجزة شابة والله بدون مبالغة والله شاهد على ما أقول شابة جميلة شعرها جميل ووجها جميل وعودها جميل لكن المسكينة قاعدة على كرسي متحرك مشلولة الله يعافينا ومش بتقدر حتى تقضي حاجتها بنفسها بدون مساعدة حد والدار اللي قاعدة فيها مفيش حد بتكلمه ولا حد بيسأل عليها انا صعبت عليا أوي يا جماعة البنت دي خاصة تخيلوا هي إزاي بتنظر للمسقبل تخيلوا أملها في الجواز او ان يكون ليها عيلة او حد يحسسها انها حبيبته وانها مراته وتفضفض له ويحن عليها حنان الزوج وانها انسانة زيها زي أي حد الناس او يكون لها اولاد يراعوها بعد كدا وناس تانيين وحالات تانية كتيييير تدمي القلب
أنا مكتبتش الكلام دا عشان أغمكم لا والله بل عشان تحسوا بنعمة الله علينا واننا مش عاجزيين الحمد لله لو بصيتوا لنفسكم احنا فعلا زي ما بيقول شكسبير في رواية هاملت عجبا للإنسان الكائن الغير محدود القدرات
فعلا لما شفت الناس دول حسيت الحمد لله والشكر لله بنعمة ربنا عليا حسيت ان الأمل كبير حسيت ان فعلا احنا فكرنا هو اللي ضيق مش قدراتنا هيا اللي ضيقة
الأمل في كل مكان لعمرك ما ضاقت بلاد بأهلها لكن أحلام الرجال تضيق هذا البيت لعمرو بن الأهتم التميمي
مشكورين لإتساع صدركم وحكون سعيدة لو ضيفتم ردودكم وآرائكم