تجربتي مع دايت سنتر والعيب مو منهم "مني أنا"

الله يسلمكم اشتركت في دايت سنتر الشهر اللي طاف كنت ابي انزل تقريبا 6 كيلو علشان اوصل للوزن المثالي

الأكل كان أوكي لذيذ أنا كنت اختار المنيو أول بأول ..أقوللهم شنو اللي مااحبه فمايسوونه لي
الريوق خفيف ويشبع والغداء مقبول وكل يوم العصر سويت والعشا سندويشات كل يوم شكل مره برغر ومره بيتزا ومره كلوب ساندويش..الخ ..
وكان احلى شي عندي الريوق والسويت والعشا أما الغدا مب ذاك الزود الدجاج ناشف وقاسي وزفر شوي ..
نصحتني الاخصائيه وايد على الاقل اتحرك فالبيت أو امشي نص ساعه 3 مرات فالاسبوع والتزم بالأكل وأشرب ماي وايد اقل شي 6 أكواب علشان مايصيدني امساك
المهم أول اسبوع التزمت بأكلهم بالضبط وماخربته بس ماكنت اسوي رياضه رحت نهاية الاسبوع عند الاخصائيه وزنتني نزلت في هالاسبوع كيلوين طرت من الوناسه لأني ماتعبت والكل لذيذ ومع هذا نزل وزني بكل سهوله..هي عرفت اني ما ألعب رياضه ..فقالت لي انه من حظج انج نزلتي بدون رياضه كيلوين بس جذيه ماينفع لأن الاسبوع الجاي بيثبت وزنج ومابينزل

يعني الاسبوع الاول نزلت 2 كيلو

الاسبوع الثاني التزمت بعد بالنظام
مرااات كنت ابدل وجبه من وجباتهم بوجبه من بره وانتبه من الكميه وانه يكون فيه مشوي وسلطه عشان مااخرب النظام لكني ماكنت اسوي رياضه ولا أتحرك ولاأشرب ماي
مااهتميت لكلامها كنت حاطه فبالي اني بنزل مثل مانزلت فالاسبوع الاول
فالنتيجه صادني امســــاك
وعلى نهاية الاسبوع زرت الاخصائيه ووزنت انصدمت اني مانزلت شي وقالت لي "مو مشكله مرات يكون الوزن ثابت بس الملابس تحسينها بدت توسع شوي
وماأكذب عليج ان استمريتي مثل هالاسبوع ماراح تنزلين اشربي ماي اشربي ماي اشربي ماي وشوية حركه فالبيت"

يعني الاسبوع الثاني 200 كيلو يعني ولاشي

الاسبوع الثالث نتيجة الاحباط اللي صادني فالاسبوع الثاني فبديت شوي اطنش حق بعض الوجبات واكل من أكل البيت بس على خفيف وبدت تتجمع وجباتهم فالثلاجه
المشكله انامب قادره العب رياضه لأني ماأقوم الصبح وفالليل اكون ملتزمه بمواعيد وزيارات فمايكون عندي وقت ..الامساك كان مستمر معاي
فنتيجة هالأسبوع اني كنسلت زيارة الاخصائيه لأن مالي ويه :o وبديت اتحسف اني اشتركت ودفعت مبلغ وقدره 3000 ريال على كيلوين وشويات

يعني الاسبوع الثالث0 كيلو بميزان البيت

والحين انا فالاسبوع الرابع والاخير والثلاجه بدت تمتلي بوجبات دايت سنتر
ماشتهي اكل من أكلهم مع انه زين مافيه شي
بس اتريق واتعشى منه حتى السويت ماآكله



تعلمت من هالدرس
رجيم بدون رياضه ماينفع
الرياضه اولا مع التخفيف من اكلنا العادي وتقليل الدهون والحلويات
ولا نحرم نفسنا بس ننتبه عالكميه




حبيت انكم تستفيدون من تجربتي وماتستعجلون وتدفعون مبالغ وانتوا مب قد الالتزااااام