قصة ولادتي الغير متوقعة

مرحبا يا كروشات ويا أمهات

رجعت لكم مع قصة ولادتي... كتبت لكم انها غير متوقعة لأني قدمت كثير عن موعدي ... موعدي كان 16/2 بس الله شاء وقدر اني اولد في هاليوم الظاهر بنوتتي مستعجلة :D وتحب السربرايز :cool:

في هاليوم كنت قبل ما أنام موصية زوجي وكأن قلبي حاس إني راح أولد ... قلت له حبيبي اذا صادني ألم ولا شي وقعدتك من النوم اقعد لي مو ما تقوم وتقول لي لي الحين ما صار موعد الولادة ... قام يضحك وقال لي ان شا ءالله... طبعا زوجي نام واني لي الحين ما نمت لاني كل ليلة ما يجيني نوم الا وقت متاخر.... وعلى الساعة 2 رحت السرير علشان انام الا ما اشوف الا ماء ينزل... صراحة انزهقت :confused: خصوصا لاني اول مرة وما اعرف شي بس الي اعرفه ان اذا نزل ماء يعني ولادة وكان ينزل مني بكثرة ومعاه شوية دم... ومباشرة اقعد زوجي اقول له قوم يطلع مني ماء ... المسكين قام منزهق ههههه يقول لي شنو... قلت له قوم ودني المستشفى... فزع وقام مباشرة اتصل في ابوي علشان يجون لنا الشقة .... انتظرنا ولي الحين ما فيني الم بس ماء وهو يقول لي شنو تحسينن قلت له ما ادري :ss: بس كأني بولد.... وجا ابوي ومعاه امي ... ورحنا المستشفى ... دخلوني على غرفة الولادة واني لي الحين ما جاني ألم ... وقالت لي الدكتورة ان الرحم مفتوح 5 سم ... ولم قعدوني على السرير حسيت بألم يروح ويجي ... واني اقرا آيات ونادوا زوجي يجي يشوفني وكانت الساعة اربع ... مسكين زوجي قعد شوي معاه وشكله خايف مو قادر يتكلم ... بعدين قالت له الدكتورة خلاص الحين اطلع... طلع وبدأت الآلام تزيد ... حسيت بآلام فظيعة ... الطلق كان قوي .. حتى من شدة الالم قمت اصرخ عفست لهم المكان ههههه حتى ما توقعت اني اصرخ لاني هادية بطبعي ...:o

ومع رحلة الآلام الي استمرت من الساعة اربع الى سبع وشوي طلعت كتكوتتي الحلوة سارونة ... ويوم شفتها نسيت التعب كله.. الله يخليها لي ولابوها ان شاء الله ويسهل على كل حامل يا رب....