ووأغلي عرايس
25\1 من كل سنه ذكرى زواجي
ومرت الحين سنه على عرسي
" ماشاء الله .. لا اله الله الله "
وانا اتصفح صور العرس
تميت اتذكر تفاصيله
وعشان طلب بنات غاليين علي ماقدرو يحضرون عرسي
قلت لازم اشاركم بعض الصور
يمكن اقدر افيد بشي بسيط
...
كلمة حق
ابي اقولها قبل ابتدي موضوعي
...
انا من البنات اللي جهزو فموضوعنا الغالي
تجهيز عرايس وتثقيف بنات قطر
للغاليه على قلوبنا بنت الغالي
احب اشكرها واشكر كل البنات معانا ويارب نفرح قريب
ولولا هالموضوع ماكنت عرفت اشياء وايد
ولاتعرفت على بنات غاليين شرفوني فعرسي
احب اشكرهم كلهم وكل وحده وقفت معاي
والله كل ماشوف فيديو العرس اتذكركم كلكم
مشكورين والله انتو غاليين على قلبي
.....
وكلمه حق ثانيه
للغاليه (امي)
اللي كان تجهيزي كله عليها من الالف الى الياء وكنت اخذ رايها بكل شي وماقصرت معاي فكل شي ربي يخليلها لي لا هي ولا ابوي
وربي يخلي لكم امهاتكم بعد
واكيد بتشوف الموضوع عشان جي ابي اقول لها
برايفت (ماماتي احبج )
اولاً ...
بحط لكم معلومات مبسطة عني قبل ...
فكرتي حق لكي فالعرس كانت الستايل الروماني القديم
طبعا مع لمحة الخليجيه اللي مانقدر نقاومها بدون كرستالات يعني لازم نلمع هههههه خبركم عرس لازم
المهم فستاني كان ذوقي استوحيت فكرته من هالموديل
القصه ومن جدام نفس الي بالضبط
شانتون وتور وكريستالات
ومن ورا فيه حركه في نص الظهر نفس عين مفتوحه وظهري باين كانت فكرتي
نفذه لي محل الفراشه
وهاي الفستان اللي استوحيت منه الفكره وكانت حابته يكون ضيق من فوق ونافش من تحت
والطرحه قصيره نفس الصوره
تور بس دخلتها من تحت التسريحه
لبست تاج كبير نفس ستايل ملكات روما القدام
وبالصدفه عقب ماخذت التاج امي شافته فالنت طلع بالضبط بالضبط نفس التاج اللي لبسته حليمه بولند لما خذت ملكه جمال المذيعات ..
تسريحتي كانت شنيون كامل مرفوع مكسر
نفس ماقلت التسريحه القديمه
تقريبا ستايل مارلين مونرو
التسريحه ضبطتها لي نفس ما ابي ( منى السودانية) وركبت لي التاج والطرحه بشكل حلو
...
مكياجي عند الماكيره دينا الخوري
قلتلها ابي ميكب مارلين مورو كحل اسود وروج عنابي
بي انصحتني انه تحط لي مع الكحل الاسود لون وردي وعنابي يناسب عروس اكثر
وانا خذت برايها وطلع حلو الحمدلله وهاي تقريبا نفس اللي حطته له
روجي عنابي
.....
تقريبا هاي ستايلي
حاولت اقرب لكم الصورة
..
ليلة العرس
...
ستايل الكوشه سمبل
اوف وايت وذهبي وروز ابيض
..
بنات ترى انا الكوشه والطاولات مابالغت في اسعارهم والحمدلله طلع شي حلو وربي وفقني طلع على ذوقي
سويته في محل اكسوتيكا
وهاي جزء من الكوشه وقت ماكانو يشتغلون فيها
ستايها ستاير مع شمعدانات
الزفة ..
زفتي كانت خاصه هديه من الوالد والوالده ربي يحفظهم
كانت احلى شي بالنسبه لي فالعرس لانها مفاجاه
كنت قايله لابوي اتمنى زفتي تكون عباره عن اغنيه فيها عني وعن زوجي وعن امي وابوي
وعلى هالاساس انكتب الشعر من الشاعر القدير: خليفة السويدي
لحنها المبدع : مطر الكواري
والغناء دويتو بين : عيسى الكبيسي وفدوى المالكي
وايد حبيتها واعجبتني الحمدلله
....
فجاتني فكره اني حط شعر زفتي في بوردر واحطها على الكوشه بهالطريقه
والصوب الثاني من الكوشه
حطيت نفس البوردر فيه صوره لي ولزوجي
وطلعت الحركه وايد حلوه
....
ليلة الحنا
طبعا قبل الحنه بيومين بدت التجهيزات العدله
كلشي كان شغلنا امي والاهل ماقصروو
ومايحلا العرس الا بوجود اللتات
يوم حطوهم اهني حسيت اني صج بتزوج خخخخخ
وهني يوم يركبون الليتات
طبعا حتى دريولنا طالع فالصوره كانت مشتط يساعد وياهم
صور لكوشة الحنه
كلها شغلنا وكلها من الموجود فالبيت
قلت احط لكم صور من زوايا عشان يمكن تاخذون افكار
توزيعات عباره عن حنا
هذي توزيعات ثانيه
شغلنا ومتعوب عليه من قلب
عباره عن كيس في داخله بخور ودهن عود ونسيت بعد وشو
واهم شي البطوله صنع منزلي خخخ
وفي توزيعات وايد بس مالقيت لها صور
بطاقة الدعوة لحضور الحنا
تصميمي
وهذي بطاقات العرس
<<< فله تذكرتهم
نصيحه خلو لكم بطاقه وحده ذكرى انا ماعندي ولا وحده خلصو ماشاء الله خخخخخ
مقتطفات للحين اتذكرها وأشياء حبيت اذكرها عشان تفيدكم
(غلطات)
- غلطت اني حجزت وحده تشيل معاي الفستان
لاني ماكنت احتاجه لاني سويت فستاني خفيف ومب طويل وايد عشان مشيتي تطلع حلوه
وخربت الفلبينيه اللي تشل لي الفستان التصوير كله كانت تطلع فكل لقطه
(نصيحة)
-خلو فستان عرسكم خفيف تقدرون تمشون فيه لوحدكم بدون محد يساعدكم عشان مايخترب عليكم التصوير
مقتطفات حلوه اتذكره
- كندر -
بما اني اموت فالكندر وكل صديقاتي فالمنتدى يدرون
حبيبة قلبي العضوه قلب قلبي وعدتني انها تجيب لي ع الكوشه كندر
وبصراحه ماتوقعت لكنها كانت عجيبه وسوتها ويوم سلمت علي عالكوشه عطتني الكندر وحطيته في مسكتي
ويوم فالسياره وانا رايحه الفندق طلعته وكلته وماعطيت زوجي منه ههههههه
....
ومدري لمكن بعد اتذكر شي واقولكم
وهالاشياء اتذكرها لانها مصوره فيه اشياء صراحه نسيتها هههههه مخي فارط
...
ان شاء الله يكون عجبكم الموضوع
ارجوكم بنات هالصور شخصيه لحد ينقلها لموقع ثاني
...
وارجوكم بعد ادعولي بالخير لاتنسوني لما تشوفون موضوعي من الدعاء..
...
وانا بدعي لكم بعد
يارب يرزق كل آنسه بالزوج الصالح
ويرزق كل متزوجه بالسعاده والعيال الصالحين
ويرزقكم كلكم الخير وين مايكون
...
وبس :o
