ابني وحماتي بالله عليكم فيدوني

السلام عليكم ورحمة الله وبركاته
بداية احواتي قبل ما اي اخت منكم تحكم على المشكلة انها تضع نفسها في محلي وتقوللي حتحس بايه وبعدين تقوللي اعمل ايه
انا ابني يحيى عمره سنة و8 شهور ماشاء الله عليه زكي وبيتكلم بعض الكلمات
المشكلة انه بيعامل حماتي على انها هي امه حتى انه بينادي ليها ماما وانا بدا يناديني باسمي ولغى كلمة ماما ومع ذلك ماكانتش هي دي المشكلة
المشكلة بدات لما جوزي حكم على ان يحيى يبات هناك كل يوم سبت لمزاجه الخاص علما ان جوزي كان بيعيب على اخوية لما كان بيسيب ابنه عندنا عشان نفس الموضوع المهم احنا طبيعى بنقضي يوم السبت هناك وفي واحدة بتيجي تنضف البيت يوم السبت فجوزي بيصحى ياخد يحيى ويوديه عند جدته عشان الست اللي بتيجي ولما الست بتيجي تخلص بانزل انا اروح بدا يحيى في الفترة الاخيرة يتجاهل وجودي هناك لدرجة انه لو حب ياكل او يشرب او يعمل حمام اعزم الله يجري على ماما اللي هي مش انا طبعا ولما اقوله تعالى انا حاعمل لك يجري مني ويعيط حتى لو انا حملته مش بيرضي عاوزها هي طول الوقت وفي يوم فضلت اكتر من ساعة اطلب منه يبوسني مرضاش الا لما هي قالت له
وكنا لما نيجي ماشيين انا وابوه من هناك وسايبينه يقولنا من عند باب الشقة واحنا بنسلم عليه ( يالا امشي ) وعاوز يقفل الباب ولما هما بيجوا عندي بيكون نفس الحال عندهم واخيرا كانت امبارح
دعيتهم فحضروا عندي ومن ساعة ما حضروا ويحيى على قاعد مع جدته مش راضي يسيبها لدرجة انها قالت لي خديه شوية بس ادخل الحمام اعزكم الله ولما اخدته كان على ما طلعت مات من العياط خلاص حتى انها طلعت تجري من الحمام واخدته وهدا جدا معاها ويشاور لها على ويقول لها اضربيها
المصيبة لما جم ماشيين ولما مشيوا فضل ابني ينادي عليهم ويعيط لدرجة انه ماكنش قادر ياخد نفس ويترمى على الارض ولما اروح اشيله واطبطب عليه يضربني ويزق نفسه عشان ينزل ما اشيلهوش لدرجة اني صرخت في وجه وقلت له ( هو انا مرات ابوك انا امك ) وهو ابدا فضل لحد ما جاه ابوه اول ما جاه كنت انا كمان مت من العياط فبيسال مالنا قلت له خد يحيى عند جدته بيقولي لا قلت له خد يحيى عند جدته وصممت انه يروح لها بس نفسيا انا مش قادرة اصف لكم حالتي
ده ابني انا اللي تعبت فيه ومعاه وانا اللي بسهر جنبه في مرضه وبلعب معاه في فرحه انا اللي باقضي معاه حياته كلها ازاي يحب حد اكتر من امه
والله يا بنات مش لانها حماتي لو انها امي ميحبها اكتر مني انا حاكون في نفس الحالة اعمل ايه مافيش حاجة هي بتعملها انا مش باعملها حتى اني بدات اتغاضى عن بعض تصرفاته الغلط عشان ما ازعقلوش اعمل ايه
والله انا مش تافهة والموضوع عندي مش صغيير قيدوني بالله عليكم