العناية الاساسية بالشعر (ارشادات و نصائح خاصة جدا)

S

Stacy

مشرفة سابقة

19-01-2009 | 04:44 PM

ازيكم يا بنات يارب تكونوا كويسين دايما

انا قررت انزلكم الموضوع دى لانى للاسف شوفت بنات كتير جدا لسة محتارين ازاى يتعاملوا مع شعرهم و دى طبعا حاجة بضايقنى جدا

اولا: لان المنتدى مليان بالمواضيع الكتيرةو تجارب الاعضاء الشخصية و لكن لاسف لسة شايفة كتير من البنات محتارين و بيتعملوا مع شعرهم بطريقة غلط
ثانيا: و لانى من زمان جدا كنت زيكم كدة بالظبط بحب اهتم بشعرى اوى بس مش عارفة امشى على جدول معين او مش عارفة المفروض اجيب اية و مش اجيب اية و احط اية امتى و الكلام دى لحد ما ربنا كرمنى بجد و خدت كورس مع خبيرة المثيوثرابى دينا الجارم و الكورس دى الى خلانى بجد افهم انا المفروض امشى ازاى مع شعرى و استريحت الحمد للة بجد حسيت اكنى كنت ضالة الطريق بجد و وجدت الطريق فى الاخر الصح

المهم فى الموضوع دى هنقسمة لجزئين

الجزء الاول انا هتكلم عن الحاجات الى المفروض تكون عندك او تشتريها

الجزء التانى عن وقت و كيفية استخدامها و كلامى عموما هيبقى عن انواع الشعر كلها و لو فى استسنئات هقولكم طبعا

اولا الحاجات الى لازم تكون متوفرة عندك كعناية اساسية بشعرك

1- شامبو ماركة نضيفة حسب نوع شعرك

2- بلسم ماركة نضيفة برضو ( فى فى ماركات معينة حسب نوع شعرك)

3- بلسم الى بيفضل جوة الشعر

4- حمام كريم نصيف

5- ليسيون كويس من الصيديلة ومن عند دينا الجارم لانة معمول من الزيوت العطرية

6- حنة كويسة نضيفة

7- خلطة زيوت خاصة بيكى او زيت واحد انتى مرتاحة علية

8- ماسك لشعرك طبيعيى لمدة ساعة اكتر حاجة ( من مكونات طبيعية موجودة عندك فى البيت)

9- مشط خشب : دى اساسى و ياريت تنسى خالص انك تسرحى شعرك بمشط او فرش عادية

ثانيا: التوقيت و كيفية الاستخدام

1- الشامبو

الوقت: على حسب نوع شعرك يعنى ممكن مراتان للشعر الجاف اوى

و ممكن 3 او اربع مرات للشعر الدهنى او حتى ممكن عادى

تغسلى شعركل يوم بس بشامبو مخصص للغسيل اليومى فقط

و ممكن لو عايزة تقللى من غسل شعرك يوميا لو دهنى لو مش مترحة

زيت او خلطة بس مجرد انك بتغسلى عادى ممكن تغسلى بمياة بس

اوبمياة الورد هتخلى شعرك رحيتة حلوة اوى و تستعملى بلسم عادى بعدية

كيفية الاستخدام: لازم يكون شعرك مبلول اولا و بعد كدة تخدى جزء اد كورة ضغيرة و تفركيها فى ايديك الاول و بعد كدة تبداى تحطى فى شعرك و تعملى مساج بسيط جدا

ملحوظة : لو حطة فى شعرك زيت او خلطة خلى الاول الخلطة تنزل بالمياة بس و بعد كدة استخدمى الشامبو لاكن مش تحطى الشامبو مباشرة و انتى حطة زيت او خلطة على شعرك و غالبا مرة واحدة بتكون كفاية الى لومش حطة على شعرك زيت او خلطة صعب طلوعة من الشعر

2- البلسم :

الوقت: بتحطى بعد كل مرة تغسلى فيها شعرك

كيفية الاستخدام: بتحطى لى حسب المدة الى مكتوبة على العلبة و لو مش مكتوب حاجة دقيقةاو دقيقتين كافيين جدا

ملاحظة مهمة جدا: البلسم بيتحط على نص الشعر لحد اخرة و مش على الفروة يعنى من اول مكان التوكة لو بتعمل ذيل حصان لحد اخر شعرك و ياجماعة البلسم بالطريقة دى مش هيوقع شعرك خالص و هتستفيدى من ميزاتة هينعم شعرك و يحمية من انة تقصف و يبقى بعد كدة اسهل فى تسريحة

3- البلسم الى بيفضل جوة الشعر: ( للشعر الجاف فقط او الشعر الطويل)

Leave in conditioner

الوقت: بتحطى بعد ما تستحمى عادى جدا

كيفية الاستخدام: بتحطى عادى بنفس طريقة البلسم العادى من نصف الشعر لاخرة و تسبيى عادى مش بيتشطف اكنك بتحطى كريم تصفيف عادى على شعرك

ملاحظة مهمة: البلسم الى بيفضل جوة الشعر فقط لاصحاب الشعر الجاف او لاصحاب الشعر الطويل لان الشعر الطويل مش بيقدر يوصلة الزيوت الى بيفرزها الشعر الطبيعية الى بتحمى فعشان كدة بيبقى ضعيف و بسرعة بيقصف فا لو حتى شعرك دهنى و طويل استخدمية بس مش على الفروة زى ما قولت

4- حمام الكريم:

الوقت: مرة فى الاسبوع فقط او مرتين لو شعرك جاف ( لاننا بنستعمل البلسم علطول فا مش هتحسى انك محتاجة اوى)

كيفية الاستخدام: بعد ما تخلصى غسيل شعرك عادى بالشامبو و البلسم بتحطى على كل شعرك عادى و تسيبى المدة الى مكتوبة على العلبة و ارجوكم يا بنات التزموا بالمدة المحددة يعنى لو مكتوب 10 دقائق لو حطتيى نصف ساعة مش هيخلى شعرك سايح مثلا هيوقعلك شعرك بس و لو تقدرى تلفى شعرك بفوطة سخنة او تطلعى برة بعد الاستحمام تعدى تحت البخار او يكفيك بخار الحمام و انتى بتستحمى يعنى اى طريقة من دول كويسة

شوفو حمام الكريم دى فظيع بجد فى موضوعى

http://www.3roos.com/forums/t256916.html

5- الليسيون:

اتكلمت عنة كتير قبل كدة و هو بجد اروع اختراع للشعر لان استخدامة يومى و خفيف و نتائجة هايلة بجد

الوقت: يوميا مرة واحدة بس بليل مع مساج خفيف جدا او ضربات خفيفة جدا على الراس

كيفية الاستخدام: الكمية الى انتى محتاجها بسيطة اوى يعنى بلى صوابعك العشرة باليسيون و ابداى بالمساج لمدة دقيقة دقيقتين بس ( شوفت ناس بتقول لمدة ربع ولا نصف ساعة بس دى تهريج للاسف )

شوفى موضوعى دى اتكلمت فى عن اليسيون بالتفصيل

http://www.3roos.com/forums/t256916.html

6-الحنة :

الوقت: مرة اسبوعيا فقط ( تبقى هايلة بجد)

كيفية الاستخدام: مش محتاجة شرح بس شوفى موضوعى دى لو مش عارفة الطريقة الصح

http://www.3roos.com/forums/t246289.html

ملاحظة مهمة: اعملى طريقة الحنة للتغذية مرة واحدة فى الشهر فقط لكن الحنة للون عادى تقدرى تستخدميها كل اسبوع

7- خلطة زيوت خاصة بيكى او زيت واحد انتى مرتاحة علية

الوقت: تستخدمى خلطة زيوتك او زيتك المفضل يوم اه و يوم لا بليل قبل النوم بعد استخدامك لليسيون تستنى شوية ساعة مثلا و بعد كدة ابداى حطى زيتك

كيفية الاتستخدام: لو خلطة زيوتك دى بتهدف لتنمية و تطويل الشعر يبقى حطيها على الفروة

لكن لو لمجرد ترطيب و تنعيم الشعر حطيها على نصف الشعر لاخرة فقط

و بعد كدة ممكن تلفى شعرك بورق السلاطة دى و بعد كدة البسى فوقة بونية بلاستك

ملاحظة مهمة جدا: احسن ان الزيت يكون دافى عشان يفيد الشعر بطريقة كويسة الزيوت الباردة مش مثالية خالص بس تدفئتة بطرق معينة مش على النار لا على البخار او حمام مائى و لو مكسلة تعملى الحوار دى بعد ما تحطى الزيت لاما تعدى تحت البخار بشعرك كدة عادى قبل البونية او اى حاجة لمدة 10 دقائق بس لاما بعد ما تلبسى البونية وورق السلاطة دى تجيبى اى سشور و تشغلى على البونية مش على شعرك مباشرة كدة غلط خاص بس لمدة ربع ساعة كدة بس و تنامى و لما تصحى تستحمى و تغسلى شعرك يعنى حوالى اربع او تلات فى الاسبوع فقط لا غير

8- ماسك لشعرك طبيعيى ( من مكونات طبيعية موجودة عندك فى البيت)

الوقت: الماسك بيتحط ساعة ساعتين بالكتير اوى مرة واحدة فى الاسبوع( يفضل فى اليوم الى مش هتحطى فى زيت فى شعرك)

كيفية الاستخدام:عادى اخلطى المكونات و قسمى شعرك و ابداى جزء جزء لحد ما تخلصى شعرك كلة و لفى شعرك بعد كد بورق السلاطة و بعد كدة بونية و استخدمى طريقة السشوار او البخار بس فى حالة البخار هتكونى بس حطة الخلطة على شعرك يعنى قبل ما تبسى البونية و كدة تعدى تحت لبخار 10 دقائق بس و بعد كدة اغسلى شعرك كويس

ملاحظة : فى ناس بتغسل شعرها بمياة بس و فى ناس بالشامبو بس انا شايفة على حسب خلطتك يعنى لو تقدرى تشيلها بالمية بس يكون كويس لاكن لو الخلطة مثلا فيها نخاع لازم شامبو

( بانسبة ليا دايما اعمل ماسك النخاع مع عسل و زيت مخصوص او ساعات اى زيت )

لو عايزة طريقتة شوفى موضوعى عن النخاع

http://www.3roos.com/forums/t253059.html

9- مشط خشب :

دى اساسى و ياريت تنسى خالص انك تسرحى شعرك بمشط او فرش عادية

الوقت: احسن وقت لتسريح الشعر :

1- قبل الاستحمام لفك اى عقد فى و خصوصا لو طويل

2- قبل النوم لازالة اى اتربة و فك العقد ( لان يا بنات العقد لاما بتكبر بجد ممكن تعملك مشاكل انا اعرف واحدة صاحبة اختى كان شعرها طويل جدا لاخر الظهر و تقيل جدا بس جاف اوى فضلت مش تسرحة كذا مرة لحد ما عمل عقد جامدة جدا مكنش ليها حل غير انها تقص شعرها و فعلا قصتة كلة لحد رقبتها تقريبا تخيلو الكارثة )

فا لو واحدة شعرها طويل من فضلك واظبى على تسريحة تفاديا للمشاكل

3- بعد الاستحمام لام شعرك ينشف ( حطوا تحتها ميت خط) محدش ابدا ابدا يسرح شعرة و هو مبلول

كيفية الاستخدام: عادى مش محتاجة شرح بس فى نقاط مهمة اوى

اولا لازم تكونى مش مستعجلة لانك لو مستعجلى هتقطعى شعرك بجد يعنى اهدى كدة و اعدى و خليك صبورة

ثانيا لو شعرك جاف اوى من تحت او فى عقد حطى زيت او كريم حاجة بسيطة اوى بس عشان تساعدك و مش شعرك يتقطع فى زى سبراى كدة بيبقى ممول للاطفال لفك تشابك الشعر دى بجد ممتاز و تقدرى تجيبى و هو موجود فى اوريفلام كمان

ثالثا: ابدائى طبعا قسمى شعرك نصفين او اكتر و ابداى براحة خالص من تحت الاطراف براحة خالص لفوق حبة حبة

بس كدة انا كدة ادتلكوا الخطوط العريضة الى تمشوا عليها و دى يعتبر جدولى الاساسى للعناية بشعرى لكل الى سئلونى انا اية جدولى

و عايزة اقول نصيحة لكل بنت: العناية المستمرة بالشعر هى الى بتجيب نتيجة هايلة لاكن مش الزيوت السحرية يعنى جدول بسيط بس استمرى علية طول عمرك, عمرك ما هتلاقى مشاكل ابدا فى شعرك و هتلاقى شعرك بجد فى احسن ما يمكن و صحى و طويل و بيلمع فا بلاش ارجوكم الجرى الاعمى وراء منتج بيطول الشعر فى شهر او حتى اتنين مفيش الكلام دى الى بيطول الشعر هو برنامج كامل التزمتى بى طول حياتك و نظام صحى سليم سؤاء فى اكلك او فى حياتك اليومية عامة

و يارب تكونوا اتعلمتوا منى اى حاجة كويسة

و ياريت تدعولى بجد و تقيموا موضوعى لو عجبكم

و اشوفكم على خير

t

tobe

عروس رائعة

19-01-2009 | 04:52 PM

جزاكى الله كل خير على هذه المعلومات المفيدة

S

Stacy

مشرفة سابقة

19-01-2009 | 05:19 PM

tobe;8493313:
جزاكى الله كل خير على هذه المعلومات المفيدة

مرسى يا حبيبى

يسعدنى مرورك

ز

زمـــردة

عروس مبدعة

19-01-2009 | 05:32 PM

جدول حلو اوى وفعلا انا هبتدى امشى علية لان شعرى طويل وناعم وما بهتمش بية ولما بهتم بية بهتم غلط فابتدى يبوظ

j

jasy2008

عروس متألقة

19-01-2009 | 05:38 PM

معلومات مهمة جداااااااا مرسى اوى

S

Stacy

مشرفة سابقة

19-01-2009 | 05:39 PM

b0nb0n;8493653:
جدول حلو اوى وفعلا انا هبتدى امشى علية لان شعرى طويل وناعم وما بهتمش بية ولما بهتم بية بهتم غلط فابتدى يبوظ

خلاص يا حبيبى شوفى انتى ناقصك اية او كنتى بتعملى اية غلط و ابتداى فى الجدول دى و انشاء اللة تشوفى شعرك بقى احسن بكتير

و مرسى يا حبيبى على ردك

ربنا يكرمك

S

Stacy

مشرفة سابقة

19-01-2009 | 05:40 PM

jasy2008;8493678:
معلومات مهمة جداااااااا مرسى اوى

مرسى يا حبيبى ربنا يكرمك

ز

زمـــردة

عروس مبدعة

19-01-2009 | 05:48 PM

هو البلسم اللى بيفضل جوة الشعر موجود فى لابوتية ولا اشترية منبن هو بتهيألى vo5ولا فى ماركات احسن

م

ميااااااده

عروس ماسية

19-01-2009 | 05:49 PM

الموضوع بجد ممتاز
بس انا قيمتك قبل كده وعشان كده مش عارفه مش عايز يقيم تانى ليه
جزاكى الله ككل خير

م

ميااااااده

عروس ماسية

19-01-2009 | 05:50 PM

انتى تقصدى البلسم اليه لا يشطف لانى بستعمل نوعين بلسم
بلسم اليه بحطه واغسله علطول وفي بلسم جيبته من ايفون مكتوب
لا يشطف وده بستعمله زى الكريم بس مبقربش اى بلسم او حمام كريم
على الفروه عشان ميتساقطش الشعر

S

Stacy

مشرفة سابقة

19-01-2009 | 05:52 PM

b0nb0n;8493760:
هو البلسم اللى بيفضل جوة الشعر موجود فى لابوتية ولا اشترية منبن هو بتهيألى vo5ولا فى ماركات احسن

بصى حبيبى البلسم الى جوة الشعر الى اعرفة لحد دلوقتى من VO5 بس

و فى حاجات VO5 فى لابوتية بس مش عارفة هتلاقى و لا لا لان مش ساعات كل المجموعا بتكون كاملة فاهمنى فا انا متعودة بطلبة من صيديلة كبيرة جمبى فا اطلبى احسن من صيدلية كبيرة

S

Stacy

مشرفة سابقة

19-01-2009 | 05:55 PM

ميااده2006;8493766:
الموضوع بجد ممتاز
بس انا قيمتك قبل كده وعشان كده مش عارفه مش عايز يقيم تانى ليه
جزاكى الله ككل خير

مرسى اوى يا حبيبى بجد :)

ربنا يكرمك بجد على التقييم

و هو فعلا مش ينفع تقييم العضو مرتين

مرسى جدا لمرورك(f)(f)

n

nona.aly2008

عروس نشيطة

19-01-2009 | 06:00 PM

ربنا يكرمك على المعلومات القيمه والغاليه الي انتي بعتاها دي بس انا مشكلتي ان شعري ملمسه ناعم لكن مجعد من عند الجزور ومفرود وكويس من تحت وابتديت اهتم بيه ياترى البرنامج ده حيقدر يفرد الشعره ويرجعها زي ماكانت زمان

ز

زمـــردة

عروس مبدعة

19-01-2009 | 06:02 PM

انا قيمتك فعلا مبسوطة اوى بالموضوع(y)

ا

الحب هو الحياة

عروس ماسية

19-01-2009 | 06:21 PM

موضوع هايل ميرسى ياقمر وتم التقييم

ر

راعية الفراري

عروس ذهبية

19-01-2009 | 07:53 PM

جزاك الله خيرا

م

محبوبه الغالي

عروس رائعة

19-01-2009 | 08:05 PM

مشكوره الله يجزاك خير

S

Stacy

مشرفة سابقة

20-01-2009 | 06:17 AM

nona.aly2008;8493864:
ربنا يكرمك على المعلومات القيمه والغاليه الي انتي بعتاها دي بس انا مشكلتي ان شعري ملمسه ناعم لكن مجعد من عند الجزور ومفرود وكويس من تحت وابتديت اهتم بيه ياترى البرنامج ده حيقدر يفرد الشعره ويرجعها زي ماكانت زمان

بصى يا حبيبى انا شايفة شعرك حلو اوى مش دايما الشعر اليس هو الى حلو على فكرة و كويس انك بقيتى تهتمى بى بس بالنسبة للبرنامج انة يقدر يفرد شعرك و يرجعة زى ما كان لو انتى اصلا شعرك كدة ممكن طبعا لكن لو دى طبيعية شعرك مقدرش اكذب عليكى و قولك ايوة العناية بالشعر دايما هدفها انها تخلى شعرك فى احسن حالة ممكن يكون عليها لكن مش ينفع تغير طبيعية الشعر

S

Stacy

مشرفة سابقة

20-01-2009 | 06:19 AM

b0nb0n;8493881:
انا قيمتك فعلا مبسوطة اوى بالموضوع(y)

الحب هو الحياة;8494073:
موضوع هايل ميرسى ياقمر وتم التقييم

راعية الفراري;8495070:
جزاك الله خيرا

محبوبه الغالي;8495176:
مشكوره الله يجزاك خير

مرسى اوى بجد يا بنات كلكم واحدة واحدة

ربنا يخليكوا ليا بجد(f)(f)

و b0nb0n و الحب هو الحياة مرسى اوى على التقييم

S

Stacy

مشرفة سابقة

20-01-2009 | 06:21 AM

ميااده2006;8493778:
انتى تقصدى البلسم اليه لا يشطف لانى بستعمل نوعين بلسم
بلسم اليه بحطه واغسله علطول وفي بلسم جيبته من ايفون مكتوب
لا يشطف وده بستعمله زى الكريم بس مبقربش اى بلسم او حمام كريم
على الفروه عشان ميتساقطش الشعر

ايوة حبيبى هو نفسة البلسم الى مش بيتشطف بس استعملى نوع واحد بس احسن يعنى لاما البلسم العادى لاما البلسم الى مش بيتشطف فاهمنى