الي تبي تقرا قصة ولادتي حياها هني

مرحبا ياعرايس

اليوم بقول لكم قصة ولادتي بولدي حسن الله يخليه
بس امانه كل الي تقرا اول شي تدعو لولدي بالصحه والعافيه و ثاني شي تقول ما شاء الله لانه ولادتي ولله الحمد كانت مسهله ......... يعني الولاده تضل ولاده بالمها وبكل الي فيها بس لله الحمد وبشهادة دكتورتي تعتبر ولادتي من الولادات السهله

نبدأ القوووووووووصه :

من قبل لا ادخل الشهر التاسع وانه على طول اقول اني بولد باول يوم من شهري بس طاف يوم وثاني واسبوع واثنين وانه كل مره اسال الدكتوره متى بولد تقول مو قبل 27-12 الي هو الموعد الي حسبوه لي واخر مره قالت لي 5-1 طبعا انه صادني اكتآب احس اني حدي تعبانه وابي اولد الين يوم الخميس 25- 12 كنت قاعده عادي في بيت ابوي ما في الم وما في شي يوحي بالولاده الين وقت صلاة المغرب بعد الاذان قلت بروح اسبح قبل لا اصلي لانه الخميس هو يوم جمعتنا العائليه والعايله كلها تجي بيتنا
اول ما دخلت الحمام الا اشوف ملابسي الداخليه مليانه دم وظل قلبي يدق وجسمي يرجف .....مع اني كان بالثامن صادني نزيف بس مو بهالكميه الي شفتها
على طول نزلت لامي وخبرتها وكانت هناك عمتي اتصلت ببنتها دكتوره تسالها الا تقول دام نزل دم وهي ما فيها طلق فلازم على طول تروح المستشفى طبعا هالكلام خوفني اكثر يعني بدت الافكار في راسي اش بصير معقوله صار للبيبي شي واذا بولدوني وانه ما فيني طلق يعني بحطون عليي طلق صناعي او بسوون لي قيصريه ما ابي واشوي انزل الدمعه بس جودتها لاني ما ابي قدام امي اخرعها ولانه مثل ما قلت لكم الكل كان في بيت ابوي عماتي واعمامي واعيالهم
رديت ركبت اسبح واتجهز ونزلت الا امي مسويه لي بخور تقول لي يمكن فيش طلق خفيف عشان يحمى اكثر و سوت لي زعفران اشربه بس ما في فايده ما حسيت بشي ابد ( انه مجربه الزعفران في ولادتي ببنتي اول ماشربته حمى الطلق عدل) واتصلت بزوجي بعد ما نزلت الا هو مسكين قاعد ووجهه اصفر مسكين جهزت شنطة اليد مالتي وخلية فيها ادعية تسهيل الولاده وماي مقري عليه
المهم طلعنا من البيت ووصلت المستشفى الساعه 8 ( مستشفى البحرين التخصصي)على طول ركبوني قسم الولاده وجت لي القابله عرفتني بنفسها وقالت لازم افحصش عشان اشوف الرحم فاتح او لا طبعا انه هالفحص عندي اخس من الولاده اموت لما يفحصوني المهم قلت لها يا الله شوفي ودخلت يدها ةانه اصرخ من الالم وقالت لي الرحم مفتوح 2 سم بس لانه هذي الولاده الثانيه فشي طبيعي انه يكون فاتح بس خل نسوي تخطيط ونشوف حطت التخطيط بس ما في طلق او بالاصح شي عادي يعني يدوب يوصل 10 ويرد صفر مره ثانيه قالت اتصل بدكتورتك اخبرها واشوف شنو تقول ولما كلمت دكتورتي قالت لها خليها تحت الملاحظه للساعه 10 اذا فتح الرحم اكثر معناها ولاده حتى لو ما فيج طلق واذا ما زاد تردين البيت
في هالفتره الي ننطرها للساعه 10 بزلت الكفتيريا مع زوجي تعشينا وبعدين درنا على الغرف نختار الغرفه الي نبيها وطبعا خلال هالفتره التلفون ما سكت من الاتصالات امي ابوي اختي عماتي بناتهم وانه اقول لهم نطروني عشر ونص بكون عندكم في البيت خخخ
الساعه 10 جاتني الدكتوره الي على الكول في الطوارئ وفحصتني الا تقول 4سم بس الرحم سميك ....... اهني قلبي سوى حفله كل انواع الدق كله خايفه يحطون عليي طلق صناعي
المهم قالو لازم ترقدين لانج بتولدين ...انزين وين الطلق قالو لي لا تحاتين بنعطيج ابره ترخي الرحم لانه سميك والين الصبح اذا ما صار طلق بنشوف شنو نسوي !!!
نزل زوجي يخلص اوراق المستشفى وانه دخلت غرفتي الي اخترناها وفتحت التلفزيون اطالع وشوي اقرا في ادعية تسهيل الولاده ولا كانه شي صاير وطبعا الاتصالات للحين متواصله بس ما قلت لهم شي قلت بخلوني الليله تحت الملاحظه وبكره الصبح برخصوني ......... لاني مو عارفه شنو السالفه وما ابي اقول لهم ولاده وانه يمكن اقعد اليوم بطوله
بعد ما خلص زوجي جا معاي الغرفه قلت لهم بروح اتمشى يمكن يتغير شي وقمنا نتمشى في الممرات ونشوف الغرف ونركب وننزل الين الساعه 12 قلت له خلاص ابي انام رديت الغرفه وسو لي تخطيط ولا شي متغير الطلق يدوب يوصل 10 وعطوني ابرتين مثل ما قلت لكم حسب كلامهم عشان ترخي عضلات الرحم والثانيه عشان تهديني وانام وفعلا نمت ولا قعدت الا الساعه اربع الا ربع الفجر من الالم ........... واخيرا وصل الطلق بس حسب الي قاعده احس بيه توها البدايه لانه الفتره بين الطلق 6 دقايق قلت الحمد لله اذا واصلت جذي يمكن عالظهر اولد على طول قعدت اقرا في ادعية تسهيل الولاده واقرا سورة الزلزله وادعو ربي يسهلها عليي وانه اون بروحي وزوجي راقد بس مسكين حس لانيني ونط بسرعه .....اش صار اروح اناديهم قلت له لا تو الناس وانه اطالع الساعه صارت المده 4 دقايق بين التقلصات والتقلص الواحد يدون حوالي 45 ثانيه والالم يزيد بس للحين ما صار متواصل (حسب ما صار لي ببنتي ) طبعا القابله ما وهلتنا الا هي داخله تبي تسوي تخطيط تقول لي تحسين بالم اقول لها شوي وانه بالغصب مجوده روحي عن الصراخ ولما حطت التخطيط تشوفه يوصل 80 قالت خلاص شكلش بتولدين بندخلش غرفة الولاده قلت لها بس للحين الطلق مو متواصل قالت لي بس لازم نوديج لانه بعدين يمكن ما تقدرين تتحركين
دخلوني وجت دكتورة الطوارئ عشان تفحصني قالت الرحم فاتح 6-8 سم والطلق وصل 100 والمسافه بين التقلصات 3دقايق قالت لي خلاص ولاده وبنتصل لدكتورتج عشان تجي تولدش
كلها ربع ساعه الا هي واصله وفحصتني قالت 8-10 لرحم والطلق وصل 120 بس العجيب في الامر انه الطلق يوصل 120 وبعدين يرد 10 يعني يروح نهائيا ما احس بطلق ولا شي والمده بين التقلصات ظلت 3 دقايق مو راضيه تقل اهني قلت لزوجي عطني الماي المقري عليه اشربه
المهم ضلينا على هالحال والدكتوره تقول لي من يجي تقلص ابدي بوووووووش وفعلا بديت اسوي بوووش بس المشكله انه في وصت البوووووش يروح الطلق وما احس بشي ولا اني ابي ادفع والدتوره تضحك تقول ولادتج عجيبيه اول مره اشوف وحده بتولد والبيبي بيطلع والطلق يختفي منها
ما اطول اكثر من جذي قالت لي الدكتوره غمضي عينج وتخيلي انه بيج امساك ولازم تدفعين وفعلا سويت جذي مره مرتين والثالثه ما اسمح الا الصريخ وياس ياس يو كان دو ات وبعدها صراخ البيبي
الساعه 6 و 21 دقيقه الصبح شرف الشيخ حسن بصراخه على هذي الدنيا ولله الحمد
طبعا كل الي استغرقته ولادتي من الساعه اربع الا ربع الين 6 وثلث لما ولدت عشان جذي تقول لي الدكتوره انها ولاده مسهله