::::تاجرات مملكة البحرين .. حياكم :::::

:eek: شنو مافي غيري وينكم تجرات البحرين

السلام عليكم

ايوة اختي دخلي بشلايلك .. و قولي هذا للبلد الفلاني و هذا العنوان و ابيه على البريد العادي ... و هذا للبلد الفلاني و العنوان هنا .. و ابيه ممتاز ... شعليك يبا فلوس و بتعطينهم .. ليش الاحراج ...

على فكرة انا الطرود ابعثها مع الدريول و اخلص .. و اكون معطته فلوس عشان يشتري الكرتونة الخاصة بالطرود و فلوس للشحن .. و بس

مشكوره اختي انا الحلوه على الرد

عجبتني دشي بشلايلك حسيت روحي داشه مدرعمه خخخخخخخخخخخ:D

انا لاني اول مره بطرش اغراض لبره عشان جذي مادري شناطرني في البريد

يعني الكراتين كم سعرها تقريبا عندكم؟ وهم اللي يلفونها ليولا انا ابسط و ألفلف :D

زين ما يأثر كم طرد بتطرشين يعني لمن يشوفونك زبونه دايئمه و يوميا يايه ولا اسبوعيا يايه تطرشين بيقولون تاجره و تتاجر .. ما يحسبون عموله او رسوم على هالشي؟؟



مشكوره انك عبرتيني دام البحرينيات ما بينو (f)

عجبتني استفساراتك مراوي..

أنا مرتين شحنت للخارج

المرة الأولى كانت توزيعات عروس (فساتين صغار) وكانوا بكرتونة كبيرة انا غلفتها بنفسي وكتبت عليها العنوان وكل شي وكالعادة (غلطتي المعتادة) طلبت مبلغ شحن 5 دينار وبعدين كلفني 10 دينار! وبما أنه كانت أول خطوة نحو التجارة استحيت اخبرها ان زاد المبلغ وضاعت من جيسي على ما يقولون!!

المرة الثانية هم بعد اكتشفت اني هبلة شوي! @@ مو تتطنزون عاد!

كان عندي طلبية للخارج لكذا دولة.. واستانست على عمري وغلفتهم بنفسي كل وحدة لحالها وكتبت العنوان وكل شي .. لما رحت البريد نقعوني يمكن ساعة وانا اكتب في الأوراق.. لأن كل طرد لازم تملين له 4 نسخ من الأوراق الخاصة بالطرود أو الشحن.. المهم.. يوووووووووووم خلصت عطيتهم القاري المشحون طرود
إلا يقولون لي (ما يصير)!!!!!!!!!!!!!!

شنو ما يصير؟؟؟

آل شو؟؟ آل لازم يكونون مغلفين بقرطاس لأن البلاستيك ممنوع!!
وانبطت جبدي لأني ذابحة عمري أدور أجياس نايلون تنفع اكتب عليها وهالحجي!

اضطريت أرجع بهم البيت وأغلفهم مرة ثانية بقرطاس!

طبعاً الغلطة الحين بقولكم شنو (مو بس على البلاستيك) لاااا

إلا على قيمة الشحن

ما كنت عاملة حسابي عدل! وطلبت على الكل مبلغ شحن واحد! مع ان المفروض كل ما زادت القطع أزيد قيمة الشحن لأن الوزن يزيد (بس راح عن بالي) <<< هبالة

وطبعاً اللي طلبت قطعة وحدة مشت عدل! واللي طلبت كذا قطعة (وهذا هم الغالبية) دفعت من مخباي!!
يعني كأنك يا زيد ما غزيت :D

وفوق هذا نسيت مسألة الجمارك اللي عند استلام الطلبية

أول مرة استلمت طلبية 50 جاكيت وصلوني بكارتونين كبار (كأنهم كوارتين تلفزيون)
واستلموني البريد يبون يدفعوني جمارك وما طلعوا إلا لما اخذوا مبلغ جمارك وفوقه مبلغ للوزن والتخزين يا زعم!

بس حلو الواحد يتعلم من اخطاءه ... والحمد لله على كل حال

انا عندي مشكلة في تسويق فساتين العرايس.. رغم اني نجحت في كم طلبية بس وايد يمشون بطيء عندي

على فكرة إذا حابين أوفر لكم فساتين زفاف بالجملة للي تبي تبيع أو تفتح مشروع تأجير مافيش مشكلة تراسلني واتفاهم معاها!

بييييه الله يستر 5 دينار للشحن؟؟؟ انا قالو لي يمكن حول ال3 دينار اوااقل يمكن بشوي مو متذكره بس حاطه في حسابي مصاريف طارئة في البريد

اوريانا يعني الحين يوم تروحين تودين الجاكيتات لازم اقرطسهم ولا هم بيحطونهم في كارتون ولا شلون شنو السالفه

توترت الحين

جم اخذو عليك الجمارك اوريانا؟؟

يعني هم يحسبونها على العدد الكراتين ولا القطع ولا الوزن ولا على شنو بالضبط؟؟

الله يستر من الوزن انا بضاعتي بعد جاكيتات يعني الحين المفروض اوديهم مقرطسين بقراطيس ولا اوديهم بأكياس عاديه وهم هناك يلفونهم بورق خاص فيهم؟؟

بالنسببه لفساتين الاعراس انا تعاملت مع شركة معينة اللي هو تطرشين لهم الموديل و يسوون له اياه نفس الشي .. بس شلون تضمنين انهم بيفصلونه نفس الشي مثل ماطلبتيه

انا فكرت اتاجر فيهم لان ربحهم حلو بصراحه بس كله اخاف يوصلني الفستان غير عن الصوره او مافيه لمعه و اتفشل مع الزبونه

بشوف تجربتك شلون معاهم :)

الجمارك 5% من قيمة كل قطعة... يطالبونج بفاتورة وإذا ما عندج يقيمون السلعة اللي عندج

يعني إذا القطعة مثلاً ب10 دينار.. وعندج 50 قطعة.. ياخذون عليج 5% من 500 دينار (قيمة السلع اللي عندج) يعني تدفعين لهم 25 إلى 27 دينار تقريباً.. لأن هم يزيدون على ال5% بعد نسبة ما اعرف شلون يحسبونها يا زعم للاستلام والتخزين

بالنسبة للفساتين... انا تعاملت وبعت تقريباً 4 لو 5 فساتين

بس يبي لهم صبر وناس توثق فيش وما تحن!

كل الفساتين اللي طلبتها كل واحد أحلى من الثاني... واحد بس شوي ما ارتحت منه وحسيت روحي ظلمت فيه العروس وظلمت نفسي

كان فستان خطوبة... وتعرفين هم ينزهقون لين تقولين لهم فستان ملون مع ان اللون كان ذهبي وكان صدمة بالنسبة لهم ان ذهبي.. وصلني الفستان نفس ما ابيه الموديل لكن الطرحة كانت مأساة واضطريت ارد للعروس جزء من المبلغ عشان تسوي لنفسها طرحة لأن الطرحة ما اتفادت منها كانت ما لها خص بالمرة

كل الفساتين اللي طلبتها كانت فساتين زواج لونها أبيض فما كنت اعاني في اللون

بالنسبة للمعة والقماش.. المصنع اللي اتعامل معاه اعرفهم واتكلم معاهم على طول.. ولأني احب التفصيل وهالسوالف فأدقق لهم على كل شي وحتى نوعية القماش اطلبها.. يعني ما اخليهم يختارون لي قماش على كيفهم.. فأختار نوع القماش بنفسي واقول لهم حطوا تفتا أو ستن أو حرير أو أورقنزا أو شيفون على حسب حتى الشك اتشيرط فيه (محسوبتج تحب تصمم وترسم موديلات وأغلب ملابسي تفصيل ولهذا اهتم)

الشي الوحيد اللي اتمنى لو أسويه هو ان أفصل تصاميمي.. بس صعب أن أرسم لهم وأضمن انهم يسوون نفس اللي ابيه

عكس إذا صورة.. أي موديل أقدر أسويه بسهولة

نسيت أجاوبج على التغليف

بصراحة ما ادري عن ظروفهم وطرودهم بس سمعت أن نشتريهم وما فكرت اسأل ولا شي

كفاية المصاريف اللي خسرتها.. ولهذا صرت اغلف بنفسي

بس لازم ورق (كارتون ظرف.. كيس ورق أي شي ورق

بس بلاستيك ونايلون لا!

إرسال الطلبيات يتم بالوزن

هو كان سابقاً البريد الممتاز بدينارين ونص
بس حالياً البريد الممتاز بأربعة دينار أول كيلو أو نص كيلو ما أذكر

البريد العادي مو متأكدة دينارين ونص لو 3 دينار

بالنسبة للجاكيتات.. يعني بعضهم طالبين 6 جاكيتات.. وهذول ثقال! وانا طلبت عليهم بس 4 دينار!
وكان المفروض اطلب تقريباً 8 دينار!

لأن الجاكيت الواحد تقريباً فيه نص كيلو! يعني إذا بتحسبين الحسبة بتضيع!

مشكوووره اوريانا و الله يوفقك و يزيدك من حلاله ان شاء الله

تدرين احس انك انا و سبحان الله نفس مجال اللي تشتغلين فيه اشتغلت فيه لاني مثلك احب هالسوالف

الثيابات و تصميم الفساتين من جذي اشتغلت فيه بس تدرين ماقاعده اطلع ارباح لاني مع كل شحنه اطلبها لاااازم اطخطخ لي جم قطعه حقي فيطلع طولها بعرضها خخخخخخخخخخخخخخخخ

ههههههههههههه نفسي :D

الجاكيتات يوم طلبتهم طلبتهم لنفسي بس لأن لازم هول سيل قلت يلا افتح المجال للبنات :D ولا حصلت ربح.. كله يروح في النثريات :D

بس بسألش سؤال.. انتي تحسين روحش تقدرين تسوين دعاية عدلة وتجذبين الكستمرز؟

اي منهم تقصدين خارج المنتدى ولا داخل المنتدى؟

بصراحه ماعرف اسوي دعايه قويه و يمكن ما اعطي القطعه حقها كله اخاف يقولون" اكيد بتقول جذي قاعده تسوق لنفسها"

بس اكتفي اني اعرض عليهم و اقولهم اذا تبون من هالموديلات انا شاريه حق روحي منها بس لانه لازم بالجمله فإذا يعجبكم و تبون تطلبون معاي اهلا و سهلا

حتى في المنتدى اشوف بنات وايد يمدحون بضاعتهم بشكل كبييييييييير و من حقهم بس انا اخاف اسوي جذي و اخلي البنت تبني افكار خياليه و بعدين تجي البضاعه مو مثل مارسمت في بالها

اكتفي بذكر الحقائق عشان تكون على بينة من غير تهويل الحقيقه :)

الا بسألك اوريانا انتي شقد تاخذ وقت الشحنه عشان توصلك و عن طريق اي شركه شحن يوصلونهم لك؟

انا شركتي ماتتعامل الا مع البريد الحكومي الصيني عندهم و وايد يتأخر يعني صحيح انها توصل خلال 7 ايام من تاريخ شحنها لكن قبل الشحن ياخذون لهم جم يوم بعد عبال ما تدخل البضاعه مرحله تشييكها قبل التصدير لايكون في اي قطعه خلل

اهو هالخطوة تجنبني وصول اي قطعه فيها خلل و بالتالي ما اتفشل مع الزبونه ولكن في نفس الوقت تضيع وقت وايد


شقد تاخذ لك وقت من تحولين الفلوس لين توصلك البضاعه ؟

من ناحية الدعاية.. أنا نفس الشي.. أحاول أمدح شوي بس ما اعرف.. اخاف مثل ما قلتين يقولون اعدل لروحي.. وفي النهاية أقول لهم انتوا براحتكم... بس يبي لنا شوي نتعدل ونمدح :D مافي فايدة جذي

الشحنة تاخذ نفس المدة اللي تاخذها عندش تقريباً

يعني حوالي 10 إلى 15 يوم كامل
من اول ما ادفع الفلوس لحد ما توصلني

واتعامل مع البريد الحكومة

وأفكر اتعامل مع TNT بس سمعت يقولون غالي واجد وما يسوى
وناس ثانية تمدح فيه

انا مره شحنو لي شركة ثانيه عن طريق اراميكس

خلال اسبوع او اقل وصلتني لحد البيت و وايد مريحه هذيلين لازم تروحين لهم المكتب عدل؟

انا اخر مره رحت لهم مكتب البريد استلمت منهم

وايد احاتي اغراض البنات احس مابيوصلون عندهم الا طالعه روحي

يعتمد.. إذا الطلبية كبيرة والطرد كبيرة تروحين تستلمين من عندهم لأن لازم تفتحينه وإذا شافوه وايد كبير يطالبون بالجمارك

أما إذا كان الطرد صغير يجيبونه للبيت

ان شاء الله عالاحد بتوصل الشحنه ( على حسبتي )

بنشوف شنو بيصير من سوالف :)

الجمارك حبوبات 5% + 2.5 دينار رسوم إدارية
بالنسبة للشحن اطلبي منهم كتيب الأسعار أو استفيدي من الجدول اللي بموقعي ( خلاصة الكتيب اللي عندهم )
ستايل جديد للتسوق
و إذا عندج شحنات وايد لبرة أو تشحنين بشكل يومي
اطلبي من عندهم دفتر أرصدة بريد ممتاز أو مسجل حسب الخدمة اللي تتعاملين معاها و مليها في البيت علشان ما تتعطلين و لا تعطلين اللي هناك بعد :)
و البريد ما يهتمون إذا كنتين تتاجرين أو غيره شغلتهم يستلمون الطرد و يدزونه و الباقي مو شغلهم
أما إذا مستلمة شحنة كبيرة ( مستلمة مو رايحة تشحنين ) هني ياخذون عليج جمارك
إلا بسألكم
مرت عليكم زبونة اسمها ملاك محرق ؟
تعاملتوا معاها؟
جاوبوني بعدين بقوللكم القصة

Oriana;8443661:
من ناحية الدعاية.. أنا نفس الشي.. أحاول أمدح شوي بس ما اعرف.. اخاف مثل ما قلتين يقولون اعدل لروحي.. وفي النهاية أقول لهم انتوا براحتكم... بس يبي لنا شوي نتعدل ونمدح :D مافي فايدة جذي

الشحنة تاخذ نفس المدة اللي تاخذها عندش تقريباً

يعني حوالي 10 إلى 15 يوم كامل
من اول ما ادفع الفلوس لحد ما توصلني

واتعامل مع البريد الحكومة

وأفكر اتعامل مع TNT بس سمعت يقولون غالي واجد وما يسوى
وناس ثانية تمدح فيه

TNT يا عمري ما يسوى إلا إذا طالبة 500 قطعة و فوق هني ممكن توزعين سعر التكلفة على القطع بس أقل بيطلع عليج وايد غالي
EMS أو البريد المسجل للشحنات الصغيرة من الصين بيكون أرخص نوعا ما
و في طريقة بعد أرخص من الاثنين و ممتازة حق الطلبيات المتوسطة يعني بو 300 أو 400 قطعة و هي عن طريق المطار
يعني يشحنون لج على شركة طيران بس لازم سجل تجاري و مستندات بالمحتوى بدقة و مخلص يتابعه لج الشحنة بس الحلو فيها إنها من تنشحن لحد ما توصل ما تاخذ لها ساعات أو بالكثير يوم واحد بعدين يبقى عليج الشطارة في التخليص

مرت عليكم زبونة اسمها ملاك محرق ؟
تعاملتوا معاها؟

راسلتني وطلبت رقمي وعطيتها اياه .. ليش ؟؟ خير