انهارده هنعمل بودنج بجيلي الفراولة...
هو سهل جدا وسريييييييع جدا جدا
واسعفني اوي..ف وقت بسيط كان عندي طبق حلو ولذيذ وحاز الاعجاب :)
وادي الطريقة....
اول حاجه المقادير
باكيت بودنج ...انا جبت ماركة سان جورج وجبته بنكهة الفراولة
لبن...نصف كيلو
باكيت جيلي بالفراولة
سكر..حوالي معلقتين كبار
فراولة للتزيين
الكمية دي تكفي خمس اطباق...:)
الطريقة بقى...اول حاجه عملت الجيلي بحيث يلحق يجمد
وطريقة الجيلي طبعا سهله جدا...
بنجيب كباية مية سخنه وندوب فيها الباكيت ولما يدوب كويس نضيف ليه كباية مية ساقعه
انا هنا بعمل حاجتين
اول حاجه اني بحط المية السخنة والجيلي ف الخلاط واضربهم عشان اتاكد انه انضرب كويس
واضيف له المية الساقعه واضرب كمان شوية
وتاني حاجه اني بعد مابخلص مابصبهوش على طول ف الاطباق..بسيبه يبرد شوية...
المهم..ونصبه ف الاطباق العميقه لحد نصها بس كدا
ونحطه ف الفريزر بحيث يجمد بسرعه على مانعمل البودنج
نيجي للبودنج بقى
غليت اللبن نصف كيلو لبن = كبايتين ونص
وبعدين اخدت منه نص كبايه
ونضيف ليها مسحوق البودنج...ونقلبه كويس بمضرب صغنن ولا شوكة بحيث مايبقاش فيه اي كلاكيع
وبعدين نضيف السكر ونقلب كويس
وبعدين نضيفه على اللبن السخن...ونقلبه كويس اوي ونتاكد من انه ماكلكعش
ونرفعه على النار شوية...مع التقليب المستمر
هلاحظ وانا بقلبه على النار انه بيتقل معايا..وبيتبدي ياخد قوام زي المهلبية كدا
لما يتقل كويس اطفي عليه واسيبه يبرد شوية
ولما يبرد..اشيله بالمعلقه وافرده على الجيلي الي لازم يكون جمد...ومش سايل...مش قصدي متلج بس يكون ماسك نفسه
واعمل منه طبقه عاليه كدا
واحطه ف التلاجة شوية كمان
وقبل التقديم اقطع الفراولة واضيفها عليه
وده الشكل النهائي
وده من الجنب
وبالهنا والشفاااااااااااااا