شي يمكن يفيدكم و تحملون ان شاء الله

السلام عليكم ورحمة الله و بركاته

كيفكم عرايس؟؟ ان شاء الله تكونون بخير ..

بدخل في الموضوع على طوول..

انا كنت مثلكم!! 24 ساعه في هذا القسم.. المتأخرات عن الحمل.. و كملت سنه و نص من زواجي و ما حملت .. لين ما الله رزقني والحمدلله انا الحين حامل في الشهر الخامس و عقبالكم يا رب.. و بقولكم شو الاشياء اللي ساعدتني ..

اول شيء... غيري نفسيتج.. اهم شي في السالفه النفسيه.. لا تخلين الموضوع مسيطر عليج و على تفكيرج.. ادري انه صعب و كل شهر تنتظرين بفارغ الصبر عشان تحللين.. بس حاولي و دوري اي شي يشغلج.. سواء دراسه والا شغل.. او مثل ما انا سوييت.. رياضة

والله ما توقعت انها تجيب نتيجه.. بقولكم القصه..
شهر 8 اللي فات كنت خلاص محطمه كل شهر اسوي تحلييل و آخر شي .. خيبة امل.. خاصه يوم يكون زوجج حاط امل وياج!!.. و نفسيتي وايد تعبت.. فقررت اشيل الفكره من راسي نهائي..
انا ما ادرس ولا اداوم و ما عندي شغل غير التفكير متى بحمل و بنشغل بعيالي.. فقررت اشترك في نادي رياضي..
سجلت ايروبك.. و كل يوم الصبح اسير.. اشوف البنات.. اسوي رياضه.. تتغير نفسيتي.. تغير جسمي.. و اهم شي .. صحتي.. و اول ما سجلت تكلمت مع المدربه و قلت لها سالفتي.. قالتلي.. هاي الرياضه و خاصه الايروبك تزيد و تنظم الدوره الدمويه في الجسم و تعدل الهرمونات و بتحملين بسرعه.. فاذا مو حاطه في بالج تحملين تحملي.. انا قلت في خاطري الحين انا ما خليت شي ما سويته و آخر شي الرياضه بتخليني احمل!!
المهم استمريت في النادي شهر تقريبا و كان شهر 9 بداية رمضان..و لاحظت شي غريب!! الدوره نزلت علي في موعدها بالضبط!!!! اليوم 28 نزلت.. و انا في حياتي ما انتظمت دورتي ابدا.. والله استغربت و استانست في نفس الوقت.. المهم..نزلت عليه الدوره في اول رمضان 2-9-2008 و ارتحت كمن يوم و بعدين رديت اسير النادي لين نص شهر رمضان.. و خلص الاشتراك في النادي.. قلت بستريح الحين و عقب العيد اسجل مره ثانيه..عقب العيد كان المفروض الدوره تنزل .. انتظرت يومين.. بس ما نزلت!! هني شكيت في الموضوع قلت ما دام انه الشهر اللي طاف نزلت في موعدها.. اكيد في شي .. و سرت الصيدليه و خذت تحليل حمل و سويته.. و انا والله مب حاطه في بالي اني اكون حامل.. والمفاجئه .. طلعت حاااااااامل ..

والله ما تتخيلون شكثر فرحت,, ما صدقت عيوني.. ولا زوجي.. كل يوم يسألني.. انتي حامل والا كنت احلم!! هههه و على طوول يت في بالي المدربه اللي استهزأت في كلامها .. و كان خاطري اسير ابوسها...

خلاصة هذا الكلام كله.. اتركي عنج التفكير والادويه و اتجهي للرياضه.. حتى لو ما كنتي متينه.. بالعكس الرياضه مو بس حق المتان.. الرياضه صحه و تزيد السعاده و تغير النفسيه وايد و في الآخر انتي المستفيده.. جسم حلو و مشدود..تنتضم هرموناتج.. و بتتغير نفسيتج..

اتمنى انكم تستفيدون من تجربتي.. و عقبال ما تحملون ان شاء الله..

و ادعولي الله يثبت حملي و يرزقني بالذريه الصالحه..