السلام عليكم ورحمة الله وبركاته ..
كنت كاتبة القصة من زمان قبل لا أكمل اربعين النفاس .. بس حصلت لي ظروف وما قدرت أنزل القصة وعذرووووني عالتأخير :o..
هلا بكروشات عروس .. مثل ما وعدتكم بإني أكتب لكم قصة ولادتي بولدي جسوم .. هذا أنا وفيت بوعدي .. مع إني للحين تعبانه بسبب الخياط ماعرف أقعد مثل الناس والعالم ..
المهم .. كنت في شقتي بروحي لا أنيس ولا ونيس :( .. وكنت كلش تعبانه .. كان في ذاك اليوم أخوي يجهز حق خطوبته ورحت وياه ومع اختي السوق عشان يكمل تجهيزاته وستشيرنا في بعض الاغراض ..
للساعة 10 في الليل كنت حدي موصلة من التعب .. بطني ورجولي وكل جسمي .. وقلت لهم خلاص اشتروا لي عشا ورجعوني الشقة :cool: ..
بعد ما وصلت بس تعشيت وقعدت شوي عالمنتدى ورحت نمت .. الساعة 3 الفجر اوتعيت من النوم وحسيت إن ثيابي الداخلية متغرقة ماي ورحت بدلت ورجعت عالسرير .. وما توقعت إنها بوادر ولادة .. لأني سمعت من عمتي وأختي إن إذا بينزل الماي أول بتسمعين الكيس ينفجر (بق) وبعدها مباشرة ينزل الماي !!!! ..
وانتظرت الأذان وصليت ورجعت نمت .. وقعدت 9ونص .. كان عندي ثياب متجمعة بغسلهم (a) .. بس لما شفت روحي تعبانه قلت خلهم يولون وبروح اقعد عالنت أحسن بشوف من ولدت ومن للحين ما ولدت ! (y) ..
وكنت اكلم صديقتي عالمسنجر وتسئلني ها بشري في آلآم .. قلت لها إي بس أحسها عادية نفس اللي كل يوم تجيني .. وأحس بتأخر في ولادتي لان يقولون إن البكر تتأخر ساعات ..
وإستأذنت منها ورحت أكوي لي ثياب وأسبح عشان أروح بيت أهلي .. وأنا أسبح حسيت بماي دافي ينزل مني وألم تحت .. بس بعدني ما سمعت صوت الكيس ينفجر .. فقلت هذا عادي مو ولادة ..
وأنا أصلي الظهر كان بعد ينزل مني الماي وأحس بألم كبير تحت .. في هالوقت أوتعى زوجي من نومه كان لأن راجع الصبح من الشغل .. وبغيت أقوله خل موبايلك عالكولينج ولا تقفله يمكن أي وقت أتصل فيك .. بس بعدين هونت لأني قلت يمكن بس علامات ومو ولادتي اليوم ..
وبعدها ركبت السيارة وأنا أسوق مو قادرة كان الألم قوي نوعاً ما بس يحتمل .. ووصلت بيت أبوي بالسلامة ! .. وقبل الغدا قلت حق أمي إني أحس بألم تحت وقاعد ينزل مني شي دافي مثل الماي بس ما سمعت صوت " الطق " !!!!! ..
فقالت لي هذي علامات ولادة .. وحطت الغدا وكنت أبي أتغدى بس الألم ما خلاني وكان يروح ويرجع .. واخذت رطب وقعدت آكل فيه دام مافي آلم .. وبعدها لا تلوع جبدكم بس اللي ما يعرف شيسوي!! :) قلت لامي براويج الكوتيكس وقولي لي اذا ماي ولا هرمون عادي ! :ss: .. وراويتها اياه وقالت لي اي هذا الماي ..
وبعدها توضأت وأخذت القرآن وقرأت سورة مريم وسورة الزلزلة والمعوذتين والفاتحة والتوحيد ..
وكل يجيني الألم أشوف نفسي ما أقدر أقعد ولا أنبطح ولا أوقف .. أروح أتمشى على طوووووول البيت وأنا " أصلي على النبي محمد وآل محمد " ..
الساعة 4 العصر أمي بخرتني بقهوة وقالت إذا طلق ولادة راح يزيد وإذا طلق استقبال راح يبرد .. ومن بخرتني زاد علي الألم وقمت أصيح من الألم وأحضن أمي .. واخذتني غرفتهم وبطحتني عالسرير .. وكل ما يرجع الألم أقول لها مو قادرة وديني الحمام ( أعزكم الله ) وأرجع اللي في بطني .. أقولها أحس إني بـ خّرّج تكرمون بس خايفة أعصّر .. وكان الألم قوي قوي لا يحتمل .. وقمت أقول لامي بتسبح يمكن يخف الألم .. وخليت جسمي تحت الدوش بس الألم زاد وقعدت أضرب الجدار من كثر الألم .. أمي طلعتني ولبستني ومشطت شعري .. وبطحتني عالسرير .. وخلال هالفترة يتصلون في زوجي وهو لا حياة لمن تنادي لأنه في سابع نومة والموبايل مسكر ..
وأنا الألم عندي يروح ويرجع أقوى وكل ما يجيني الألم كنت أرجع اللي في جبدي كله .. على الساعة 5ونص صار الألم أقوى وأقوى حتى صرت اتقولب على السرير وأنادي (( يا الله ساعدني )) ..
في هاللحظات اتصل زوجي من شاف المسكولات وقالت له أختي تعال بسرعة أختي اللي هي أنا في حالة ولادة .. وعلى طول جا بيت أهلي ومن شاف حالتي قال لي يالله عالمستشفى .. وأنا ما رضيت قلت له بعدني هذي كلها مقدمات واللحين إذا رحت بيأذوني وكل وحده تجي وتدخل يدها أعزكم الله .. وأبوي كان يسمعني فقال لزوجي ماعليك منها خل نوديها اللحين لا تولد علينا في البيت ..
المهم شالوني للسيارة .. وقلت حق زوجي ودني مستشفى الولادة القريب منا عشان بس يجيكوني إذا ولادة بروح السلمانية إذا لا برجع البيت .. وفي السيارة زاد الألم وظليت أرفس برجولي وأضرب الكراسي بيدي .. وكلها 5 دقايق ووصلنا المستشفى وسووو لي سالفة قال لهم زوجي جيكوها اذا ولادة ولا لا .. وما رضت القابلة لإن ما يولدون بكر مو مرخص لهم .. وعصب عليهم زوجي وقال لهم بس جيكو الرحم منفتح ولا لا .. بعدها دخلوني الغرفة وجيكت الرحم وطلع إنه منفتح 7 سم .. فاتصلت مباشرة بالإسعاف عشان ينقلني السلمانية حق الولادة .. فدقوا عليهم فخبروهم إن مافي أسرة .. فخلهم يودوني جدحفص للولادة ..
دخلوني الاسعاف وكانت القابلة وياي .. كل من يجيني الألم قالت " خذ نفس لا يعصر " .. وفعلاً من تاخذين نفس عميق وتطلعينه بالزفير يخف عليج الألم شوي ..
واتبعت تعليماتها .. لين وصلنا دخلوني غرفة المخاض وجيكوا الرحم طلع فاتح 9 سم .. فقالت لي المولدة اللحين من تحسين بالألم عصري .. فمن يجيني الألم أقعد أصرخ قالوا لي لا تصرخين عصري .. قمت اصيح أقول لهم شلون أعصر مو عارفة !!! :confused: ..
فقالوا لي كأنج في الحمام أعزكم الله .. المهم بعد كل هالمعاناة طلع راس البيبي .. وبعدها طلعوه ووزنوه كيلوين و800 جرام وراووني أياه وكنت في قمة السعادة :D .. وآلامي تبخرت من شفته :) ..
وهذي قصتي وإن شاء الله ما أكون مللتكم فيها لأني أحس وايد طولت خخخخخ (a) ..
اللحين صار عمر وليدي شهرين و19 يوم ..
راح أخلي صورته وقت ثاني لأن موقع التحميل مادري اشفيه مو راضي يحمل الصور ..