للموظفات ...فقط

والله الموضوع حلو.. وأتمنى التجاوب..

لأني توظفت شهرين وسافرت بعد الزواج على طول.. وان شاء الله برجع..وابي أستفيد..

يعني صج.. ألى أي حد..

لأن اللي أعرفه أن الزوجة مب ملزومة تدفع ولا فلس حتى لو كان راتبها أكثر من زوجها.. لا وبعد يصرف عليها حتى كسوتها ..هذي من ناحية الشرع

لكن الحياة ألحين تتطلب التعاون.. وعيب على المره تتجاهل وتعاند.. وتسبب مشاكل..

لكن كل شي بحدود.. والمطلوب منكم تفيدونا من هالناحية..

وألف شكر لج أختي ضحى

تحياتي

أشكرك أخت عروس بعيده على التجاوب....
واتمنى من كل أخت موظفه تشاركنا بتجربتها للاستفاده ;)
وشكرا مره اخرى اخت عروس ,,,,وان شاء الله عروس دائماً

السلام عليكم ورحمة الله وبركاته..

هلا فيك عزيزتي / ضحى


تشكري على طرحك لموضوع قد يسبب احياناً

بعض المشاكل بين الازواج لعدم الاتفاق

وانشاء الله تجدي التفاعل من الاخوات الموظفات و الكل يستفيد

بارك الله فيك

لك تحياتي

:clap:اختي العزيزه ضحى الموضوع جيد للطرح ولكن هناك البعض يخاف من اظهار الحقيقه:pain:لانهن يخافون من ازواجهم او انهممايبغون يقولوا الصراحه وهي انهم هن اللي يدفعوا كل شي من والى:confused:هو التعاون بين الزوجين مطلوب ولكن بحدود مثلا انا مصاريف البيت اثنينا نشترك فيها الفواتير.......هو اللي يدفعها مصاريف الاولاد هو يشتريها واذا انا حبيت اشتري اي شي لهم اشتري من راتبي.مصاريفي الشخصيه وهدايا صاحباتي من عنديتغيير اثاث هو اللي يدفعها وهكذا وياريت باقي الموظفات يشاركوا.:down: ولكم تحياتي ......عوافي:up:

أشكرك أخت سراب,,,انشاءالله يكون هناك تفاعل
وماأدري ايش القصه مافيه أي ردود يعني خوف مثل ماقلتي :D
يعني أعضاء المنتدى كلهم طلبه ولا ايش
ياهووووووو :rolleyes: وووه ردو ..بلييييز :confused:

:confused: :confused: :confused: :confused: :confused: :confused: :confused: :confused: :confused:
دموعي خلصت ...عطوني وجه

السلام عليكم ورحمة الله وبركاته

انا بعد بصراحه
اريد استفيد من تجارب المتزوجات
ياريت يخبرونا
لان فعلا السالفه تحير
مع العلم بانى اشتغل
بس عندى تساؤل
كيف اسوي وياه

وسلام

الاخت ضحى مشكورة وايد على ها الموضوع الرائع،،، بالفعل يستحق النقاش لانه الكثيرات يفهمون ها الموضوع غلط وبمجرد ما يحطون فلس من عندهم يحسون انه ريلهم بخيل،،،

انا اللي اشوفه،،، انه يعتمد على دخل الريال،،، لو كان دخله ضعيف لازم على الحرمة انها تشارك لو بالقليل في المساعدة وما فيها شي لو تتعاون،،،

واحيانا الريال يكون محتاي لدرجة انه ممكن يطلب من زوجته انها تعيره فلوس،،، وانا بصراحة مول ما اشوف فيها شي لانه اذا ما بيلجأ لزوجته بيلجأ حج منو؟ الغريب؟!!!! واي حرمة هاي اللي ترضى انه ريلها يطلب من الناس

عني انا وايد كريمة او بمعنى اصح ما عندي خلاف او مشكلة ولا حتى احس انه غلط اني اصرف على البيت من ناحية الجمعية مثلا او اعيالي وحتى لو بغي ريلي واحتاج وها الشي نادر ما ببخل عليه لانه ريلي واعز الناس عندي كيف ارده وهو دوم اللي ما يقصر ويايه،،، طبعا ها يختلف بالنسبة للي ما يقدر وهمه بس انه ياخذ بدون ما يفكر انه يرد وللاسف ها الشي شائع ها الزمن والريال قام يشترط انه الحرمة تشتغل قبل ما ياخذها حتى،،،

الزبده انه يعتمد على الوضع ووضع الزوج بالذات بس عموما الحرمة مب مجبورة انها تدفع بس اذا من خاطرها ها الشي وايد زين،،، وعني انا من النوع اللي يستحي وايد يطلب الا بالمحدود وما اقدر ازن على زوجي بالطلب هذا وانا ما كنت اشتغل ما بالج اذا انا اشتغل،،،

بس بعد لازم الحرمة ما تعود ريلها دوم انها تنفق وايد من مصروفها عشان ما ينسى مسئولياته تجاه زوجته وبيته وعياله وكونه هو رب الاسره وهو المفروض انه يقوم بها الشي،،،

يعني الزبدة الزبدة كلها على حسب الوضع وبالمعقول بالنسبة للمرأة

حقيقة هذا الموضوع شغل بالي كثيرا واحب اقولك اني متزوجه حديثا وسوف ارد عليك من واقع تجربتي في البدايه فعلا اساعد زوجي في مصروف البيت ولكنه لم يطلب مني ذلك ولكن كان من منطلق احساسي انه ينفق كل راتبه في البيت كما انني دخلت جمعية لتوفير مبلغ تحسبا للمولود القادم ان شاء الله ولكن والدتي تنهرني دوما على ما افعل لذا اشك دوما هل انا على خطا ام على صواب

والله انا راتبي 8065 ريال وشارطة على زوجي انه يعطيني 1500 شهريا وطبعا اذا في مناسبة مثل الاعياد ولة عرس حد من هلي المبلغ يختلف والله اني مااحط ريال في البيت ولا في امل اني احط شي من جيبي وبعدين في رجاجيل اذا شافوا الحرمة هي اللي تصربف على البيت يتعودون عللى الشي والله اعرف وحدة كانت تساهم مع زوجها في مصروف البيت واللي صار ان زوجها خلاص صار يعتمد على راتب زوجته ويجمع فلوسه حق سفراته وانا انصح كل وحدة انها تخلي راتبها لها وبس حتى العيال هو ملزوم بهم ولو كانت حالة الزوج كلش تعبانة تساهم الزوجة بس مب دوم




لحد يزعل وجه نظر

بسم الله الرحمن الرحيم

بالبداية انا مش متزوجه بس حبيت فعلا ها الموضوع وفعلا احنا حتى في تجمعاتنا مع صاحباتي على طول اسمع ها العبارات انا ما بساعده بشي بالبيت ويعني هو متزوجني عشان اصرف عليه .............الخ وعندي كذا حاله من الاهل متزوجين كانت فيهم الزوجه تساعد زوجها دايما بس بعد كم سنه صار الزوج يعتمد على زوجته بكل المصاريف وللاسف هم ثنتين وصلت فيهم المشاكل لحد ما وحده فيهم طلعت من بيته وراحت لبيت أهلها وطالبه الطلاق لانه صار يعتمد عليها بكل شي ولا يجيب شي أبد للبيت والثانيه بعد طالبه الطلاق



يعني لما نجي لاسباب الطلاق نقول سخيفه بس بجد ها الموضوع لو ما كانت الزوجه منتبه من البدايه ومرتبه معاشاها على أساس زين تكون النهايه جدا مؤلمه

وأسفه لو كانت مداخلتي مش في محلها بس عجبني الموضوع وانتي اختي بصراحه ما قصرتي جبتي موضوع صاير ها الايام مشكله بالمجتمع

بمنتهى الصراحة الموضوع مهم جدا ومناقشته مطلوبة

جزاك الله خيرا أخت ضحى

صحيح أنا لسة ما تزوجت بس بتزوج قريب إن شاء الله والموضوع هذا يشغل بالي مش لأن زوجي غامض فيه بس بيني وبين نفسي أفكر في ذلك .. هو شخصيا قال لي أنا ما أريد منك ولا فلس والبيت أنا ملزوم فيه وشغلك وراتبك هو لك وعلشان تخرجي من جو البيت فقط وعمره ما سألني راتبك كم ..

لكن زوجي راتبه ضعيف وإذا اعتمدت على راتبه بس أحس بالمقارنة بالعيشة اللي أنا متعودة عليها راح أتعب كثيييير علشان هيك أفكر إني أصرف بس بدون ما أقول له

يعني الأصل أنه هو المسؤول الأول والأخير عن هذه الأسرة بكل متطلباتها الأساسية وليس الكماليات يعني لو كان عنده فائض الواحدة ممكن تفكر في الكماليات بس لو الراتب على قد الأساسيات فليس من حق الزوجة أن تكلفه بما لا يطيق .. إذا خاطري في شيء من الكماليات بصرف من راتبي

يعني مثلا فاتورة موبايلي ليش يدفعها .. أنا اللي أهذر وهو راتبه ضعيف وأذبحه بفواتيري حتى الله ما يرضاها (هذا على سبيل المثال)

ولو البيت يحتاج إلى الأساسيات أيضا راح أجيبها من راتبي وأحاول قدر المستطاع ما أخليه يعتمد علي في ذلك أو ما ألفت نظره كثير لذلك عشان ما يعتاد عليه

وأنا من الحين دائما أبين له إنه هو الواجب عليه كذا وكذا حتى يحط إنه هو هذا الأساس واللي هو أصلا مقتنع فيه

بس بالنهاية الزوج والزوجة واحد .. ستر وغطا على بعض .. والتعاون حلو

:smile::smile::smile:

مع تحياتي

والله موضوع مهم و واقعي حيل و كلنا نمر فيه .. انا مالجة لي الحين ما عرست .. و من الحين شايلة هم هالموضوع .. انا شفت بنات و حريم وايد من بداية حياتهم قامو يحطون معاشهم كله بايد الزوج عشان يصرف منه مع معاشه و وصلو لمرحلة انها اذا ما يابت المعاش او خذت منه شي لنفسها تنطق و تتبهدل و يمكن توصل للطلاق !! يعني الريال اعتبر انه هذا حق له .... واكو بعد وحده من اهلي .. مره كبيرة .. عمرها الحين يمكن 47 او اكثر .. ما تعرف شلون تسحب فلوس من البنك .. تدرون ليش ؟؟؟ لانها من تزوجت و كرت البنك مالها عند زوجها و هو اللي يسحب و يصرف و يسوي اللي يبيه .. و طبعا لاعب بمعاشها لعب .. وهي مسكينة ما تدري وين الله قاطها ...


انا لمحت لريلي انه معاشي لي .. بس لما احس انه البيت محتاج شي بشتريه .. بس مصروف البيت عليه و ما ينطر مني شي الا برضاي و لما انا ابي احط على البيت ...

والله مادري ... شي يحير .. بس المهم انه الزوج لا يعتبر معاش الزوجة حق من حقوقه ابدا و لا يتمادى و يوصل انه يسألها عن معاشها ... طبعا لو ظروفه مو زينة لو محتاج مؤقتا مافيها شي لانهم ازواج .. و ستر و غطا على بعض .. لكن بشكل عام .. مو من حقه ياخذ شي من الزوجة ..