السلام عليكم عروسات << وسلام خاص لعروساتنا المقبلين على الولادة
حبيت ابشركم بولادتي بكتكوتتي الحلوة << ادعوا ليها بالصحة والسلامة والهداية من الله سبحانه وتعالى
كثر ماتعبت بحملي طيلة التسعة اشهر
وحامي كان كريييه وتعب وروحة ورجعة للمستشفى
وخصوصا ان عندي اطفال فتبهدلت لاقصى درجة << ولله الحمد
وبدا عليي علامات مشابهة للطلق من نهاية الثامن وخفت ليكون اولد بكير قبل التاسع
خخخخ << مادريت اني بكمل التاسع وباخد كم يوم من العاشر بعد
كنت طيلة حملي مواظبة على قراءة القران واكل التمر والمشي وخصوصا في الشهر التاسع
مليت من كثر ماانتظر يوم ماتشرف الكتكوتة << ربي يحفظها
واخر يوم ليي في البيت قبل الولادة كنت راجعة من التسوق حسيت برطوبة خفيفة ربي يكرمكم
ونمت في الليل وماوعيت الا ادان الفجر بحرارة في الاسفل << اتاري الماي الله يكرمكم نزل
وسبحت وصليت وظليت صامدة للساعة عشر
لما اطمنت ان اطفالي راحوا الروضة
وكنت مترددة بين اني اروح المستشفى لو لا << بعدين اتصلت لاختي وامي وخبروني اني لازم اروح
رحت السلمانية وطبعا حولوني على جدحفص
في طريقي فكرت ورحت البيت وسبحت وريحت ومريت صليت في المسجد ودعيت ربي كثيييييير وظليت اقرى سورة مريم وبعض السور واكلت تمر
لما وصلت ظليت انتظر يجي الطلق ماجى
للفجر حسيت بطلق مثل ماكنت متعودة يجيني طيلة الشهر التاسع
وهم يجون يسالوني بدا الالم ؟ اقول ليهم لالا للحين خخخخخ:wink:
وظليت متحملة الالم وكنت حينها اقرى سورة الزلزلة وبعض السور
وادعية لتسهيل الولادة
ياربي لما طلبت من الدكتورة تجيك لي جم انفتح الرحم تقول ليي لسة بدري مافيه اعراض عندش ولا يبين انش تتالمين << يعني تبيني لازم اصارخ حتى يبين
ابتعدت عن الصراخ وظليت كل مايجني الطلق اخد نفس عمييق واقرا الزلزلة
ولما طلبت مني انام واريح قلت ليها مافيني نوم << جيكت الا اني وصلت ثلاثة سم
حتى قالت ماشاء الله عليك كل هدا متحملة الالم
وطلعت وجت دكتورة غيرها وجيكت الا وصلت خمسة ماشاء الله << احمدك ياربي ياكريم
طلبت اني اروح الحمام الله يعزكم ولما علمت اني مو بكر رفضت اني اروح تقول يمكن توليدن الحين
قالت ليي يمكن ساعة بس وتولدين واني اقول ماشاء الله ماشاء الله << واجد ترى ساعدت نفسي في الولادة بالراحة النفسية والجسدية والقران اوله
بعدين زاد الالم قلت ليها بعسر عشان اولد << طبعا رفضت الدكتورة الاولى اما الثانية قالت خلها تجرب يمكن تولد قبل لا ينفتح الرحم عشرة سم
وماشاء الله ماشاء الله ،، تعسيرتين والا بنتي ظهرت كتكوتة صغيرة وناعمة ولله الحمد
بعد ثلث ساعة من كلام الدكتورة
حتى اللي هناك صلوا على النبي لان ماتاخرت في الولادة ولاني ولدت قبل لا ينفتح الرحم عشرة
بس ترى هدا لان بنتي صغيرة فساعدتين كثير << ربي يخليها يارب:tongue:
ماعليش طولت عليكم
بس حبيت اخبركم ان الراحة النفسية والجسدية مهمة للولادة
ولا تنسون المشي يساعد واجد حتى لو اتاخرتون في موعد الولادة بس يساعد وقت الطلق
وكذلك التمر
ولا ننسى سورة مريم والزلزلة وقت الطلق والادعية طيلة الطلق ***************
ربي يهون عليكم يارب وتجربون وتشوفون << ترى الولادة سهلة ادا الوحدة ساعدة نفسها :cool: