Ba7reneyah;8008799:
انا ببنتي البكر كنت منومة في المستشفى وطلبت انهم يرخصوني ورفضوا ، قلت لهم بوقع اني أطلع على مسئوليتي و فعلا وقعت ، في حرمة في المستشفى قالت لي شكلج بتولدين ، قلت لها لا يسمعونج الممرضات لا بولد و لا شي .. وأخذني زوجي من المستشفى لبيت جدي قريب اذان المغرب ، أذن المغرب وقمت بتوضا للصلاة ، حسيت بشي دافي نزل ، ما عرفت شنو ، رحت الحمام و نظفت نفسي وتوضأت للصلاة ، توني بصلي إلا خالي منادني ان في تليفون لأمي ،دخلت غرفة خالي أرد عالتليفون و كان خالي يطالعني وفجأة حسيت باشياء تنهمر مثل الشلالات ماي ودم ، وجه خالي تغير و خاف ، جيت اتحرك من الغرفة بس خايفه أوسخ المكان ، سمعت خالتي تقول لي لا تتحركين وسختي المكان ، امي ما كانت موجودة و اتصلت على زوجي ما حصلته ، وكانوا يدورون لي سيارة عشان اروح المستشفى ، بعدين حصلوا زوج خالتي و كنت فشلانه واحس بالخجل منه
نسيت اخبركم عن وين حسيت بالطلق بولدي ، صليت الظهر وظليت على نفس سجادة الصلاة ما تحركت ، توني وقفت وبكبر تكبيرة الاحرام عشان صلاة العصر إلا احس بشي منفجر وماي ودم ينزل بغزارة على سجادة الصلاة ، ومثل وقت ولادتي ببنتي ، لا أمي موجودة في البيت و لا زوجي ، الحمدلله اختي كانت موجودة لكن للأسف زوجها طلع بسيارتهم ، وراحت اختي بيت الجيران وما كان عندهم سيارة ، وراحت بيت جيرانا الثانيين وبعد ما عندهم سيارة ، وظلت اختي مسكينه تصيح تدور سيارة بينما أنا كنت مبتسمه ولا كأني بولد :o