:: محتـــــاره :: تعالي ساعديني !!

ام عــلاوووي 01-12-2008 19 رد 2,011 مشاهدة
ا
السلام عليكم يا احلى امهاات في عروس ..

اليوم جايه وحامله وياااي اكبر حيره !!

الموضوع و ما فيه ..انو باذن الله اذا رب العالمين اراد على نهاية شهر2..

زوجي حاب يروح مصر .. وقترح عليي اروح معاه .. بس بشرط !!

انو لما اروح لازم اخلي علاوي عند بيت ابوه .. واذا ما ابغي احد يمسكه خلاص..

اقعد مكاني .. وطبعا اني بيت اهلي ماعندي احد يقدر يجوده او يهتم فيه ..

اهو قال الى امه وقالت اوكي..بس اني احسها صعبه !!
(اهم اذا امانه بيهتمون فيه بس اخاف من لصغار الي هناك يغفلون عنهم يسون في ولدي شي !! )


ماعمري فارقته من جبته على الدنيا للحين !!

الا اربع مرات اخليه واروح مشوار ومايجي ليل الا هو عندي..

هو في وقت السفر ان شاء الله بيكون عمره سنه بضبط ..

واني مو عارفه اقرر !!

احس صعبه اخليه !! وبكون طول السفره احاتيه وقلبي عليه !!..

واحس صعبه اخذه معاي !! لانو مصر مشاوير وغير طلعاتنا طويله..

وشلون تغير الحفاظ وباقي الامور والخ ..

ماعندي خبره بهذي السوالف ..

يااارربي وايد احاتي وافكررررر .. وللحين ما اخذت قرار ؟؟!

ياليت تحطون روحكم مكاني!!!
وتقررون ولا تنسون اذا قررتي تروحين!!
شنو استعداداتج بلسفر مع بيبي عمره سنه!! وخصوصا مصر ..


بنتظار نصايحكم واتمنى بعد مداخلاتكم اخذ القرار ..!
م
مرة كنت في نفس موقفك...

بس السفره كانت للعمره...

و بنتي كانت أصغر من إبنك كتير...

قلت لزوجي...إنت تصرف كإنها مش موجوده...أنا اللي بتكفّل في بنتي...

و فعلا...إستعنت بالله...و الحمد لله السفره كانت ما أحلاها...و رحنا و إعتمرنا و إنبسطنا...

حتى لو غلبت شويه...بس الموضوع الآن صار ذكريات...

ما كنت أقدر أتركها...قلبي بياكلني عليها...و لو لا قدّر الله صار فيها شيء....كيف يكمل السفره !

( ديري بالك...على نهاية شهر 2 بيكون الجو بررررد شديد في مصر )

و حاولي مع زوجك...و الله كريم يكتب لكم اللي فيه الخير
ا
شكرااا كثير مرموم على ردك عليي !!

ربي يجزاج كل خير..

المشكله مو في موافقة زوجي .. زوجي اذا اصريت عليه راح يوافق ..

بس شلون راح ادبر اموري مع ولدي هناك؟؟! هذي ورطه ثانيه !! وسبب ثاني يخليني افكر واايد ..

ومن اهم الاشياء الا خايفه منها .. تبديل الحفاظ وغيره وحنا بره وطلعاتنا طويله راح تكون !!

عموما ثانكيو نورتي موضوعي .. يالقمر ..

اتمنى اشوف اراء البنات وحلولو الى كل الخيارين!!
م
أختي بتبدلي الحفاظ زي ما الأمهات في مصر يبدلوا الحفاظ :)

مش شايفه فيها مشكلة أبدا...حتى لو بدلتيه في السياره...

أختي مصر بلد عامر مش مهجور...في كل مول راح تلاقي مكان لتبديل الحفاظ...و حمامات و أماكن صلاه...

يعني ما في معاناة أبدا بهذا الخصوص...ما تقلقي
ف
صباح الخير فديتج

مرموووووووووم ردودج وايد تعيبني ... بس تدرين انا كنت ناوية اسير العمرة في رمضان وبنتي كان عمرها اربع شهور وما صار نصيب وقالولي اصلا ما يجوز اني اسير العمرة وعندي طفلة وارضعها لانه يمكن اكون في العمرة وصدري مليان حليب واهيا هني تبكي ... هذا والله اعلم

اختي صاحبة الموضوع ما احس في صعوبة ابدا في انج تاخذين وليدج عندج .... شوفي انا سافرت من وبنتي عمرها 3 شهور والحمدلله ما تعبت وايد ... شوفي بقولج نصيحة حتى لو كانت امك والله ثم والله شوفي امي ما اظن في مثلها بالكون تموت على بنتي طبعا حفيدتها الاولى تعتبر وتربيها وتبغيها وتقولي اي مكان اسافر اهدها واعرف امي ما بتقصر فيها ابدا بس صدقيني قلبي يحترق ما اقدر .... نصيحتي لا تهدين ولدج ...

خذيه وياج ودشي على موضوع احتياجات الطفل للسفر وبتستفيدين وايد ... وانا وزوجي ناوين نسافر على بداية شهر ستة بعد ما اسوي لبنتي حفلة من تكمل سنة تاريخ 30/5 وبعدها بنسافر بعون الله اذا انكتب لنا وبناخذها ويانا ....

تعودي تاخين شنطة غير عن شنطة ملابس واغراض وليدج .... خذي شنطة للطلعات فيها الحفاظ والحليب والاكل وملابس احتياط

بخبرج عني شوفي الشنطة اللي ما تفارقني ابدا شنطة بنتي صغيرة عادي تنشل كانها شنطة عادي وماركة بربريز بعد ... حطي فيها 4 حفاظات + العلبة اللي تجي 3 طوابق حطي فيهم كلهم حليب بودرة + علبة ثانية فيها بسكويت او سيريلاك او اي شي تأكليه ولدج ولا تنسي تاخذي وياج (الصحب والملعقة لولدج) عشان تأكلينه + المرضعة اهم شي + لبستين كاملات احتياط + تعرفين المناديل المنظفة للحفاظ خذيها معاج بتنفعج تنظفين الحفاظ الله يعزج اذا بال وتنظفين جسمه اذا توسخ + اذا سوى شي كبير اكيد البلاد فيها حمامات + لا تنسي الدلة اللي تجي طويلة اللي تحفظ الماي الحار خذي ماي حار اي وقت تبغين تسويله اكل او حليب عندج ماي + خذي احتياط زبادي يتسلى فيهم + اهم شي لعبه تشغليه بها شوي


بتشوفين الاغراض كانها وايد بس لو تلاحظين نحن من نسافر نشيل الشنط الكبيرة ونحن طالعين نتمشى اللي تنحط بين الايد الين الظهر اكيد فاهمتني وبتشيل هالاغراض كلها وصدقيني اولا بتستمتعين بالرحلة وقلبج يكون مرتاح وفي نفس الوقت بتشوفين وناسة علاوي اشلون بتكون ....

الله يوفقج ويحفظلج علاوي وابو علاوي ويوفق ريلج يارب في دراسته

اتمنى اني افدتج واسفة اني طولت في الكلام ...
ا
هلا اختي انا راح احكي عن نفسي في حال كنت في موقفك تمااااما :

مستحيييييل مستحيييل اترك طفلي صغير بهالسن عند احد حتى لو امي بصرااااحة
انا لما رحت الحج اخذت محمود كان عمر 8 شهور مو سنة وربك اعاااانني بشكل كبير وعاادي كنت اطعميه واابدله البامبرز وكل شي عااادي واحنا كنا لا فندق ولا بيت بالحج وبعرفة كمان

حتى يرتاح قلبك اختي نصيحة خذي ابنك بهالسن هو بحااجتك وحنانك يدفيه بالبرد صدقيني
مشاويرك طوويلة عادي جدا خذيلخ شنطة كبيرة نوعا ما تنحمل بيدك وخللي داائما معك احتياط لبستين داخلي وجوارب وكمان لبستين او حتى لبسة خارجي وجاكيت يكون دافي
وعلبة فيها اكل اما جاهز من اي صيدلية او جهزي قبل بوقت ودواء واحد انصحك فيه اما ادول او فيفادول المهم تناسب عمره ويكون خافض حرارة ومسكن للالام
وحليبه ومناديل معطرة واكياس صغيرة للبامبرز وعطره والبامبرز ..... في اي مكان بتروحيله لازم يكون في مكان ثاني تقدري تغيريله طبعا ان شالله هالمكان بكون حمام عادي طبعا خذي ابنك وغيريله البامبرز واستخدمي القماشة حقة التغيير بحيث تحطي ابنك عليها ماتحطيه مكان ثاني وعااادي غيريله الحفوضة

اهم حاجة لاتحتاسي امام زوجك بابنك بالعكس اثبتيله ان وجود الطفل ماغير رحلتنا بالعكس زادكم اطمئنان وسعاادة والاهم انك تثبتي هالشي لنفسك بانك تكوني دااائما ريلاكس وتتعاملي مع الامور بخبرتك المعهودة ببيتك

وربي يختارلك الخير ان شالله انا حطيت نفسي مكانك وهذا اللي اعمله دااائما بكل نزلاتي لسوريا
ف
صدق نسيت اقولج تاخذين في الشنطة عطر حقه وكريم الحفاظ اهم شي
ع
عــادي حبيبتي ما فيهــا شي خذيـــه معــاج وخليه يستانس
ومـا شــاء الله الامهـــات ما قصـــرن...
توكلي حبيبتي على الله وسافري وولدج معــاج...
أ
عليكم السلاام أخت شذى الروح

بقولج عن تجربتي :

لما رحت العمرة ما أخذت ولدي و كان عمره سنة ونص و أبوه مو رااضي
كان يبي ياخذه معاناا و أنا ماا رضيت

خفت عليه وخفت اني أتبهدل و ابهدله معااي أخذت بنتي بس و كان عمرها أربع سنوات ونص

اتندمت اني ماا أخذته و ظليت كل أحاتيه رغم اني خليته عند أمي و خوااتي و متأكدة انهم بيهتمون فيه و
بياخذون بالهم منه ولاا بيخلون أحد يقرب منه وماا صدقت الـ 12 يوم اتمر و أروح له أشوفه و أبوسه و أضمه لصدري ,,

ولما كمل السنتين ما خليته ساافرت معااه سوريا وكانت اشوي السفرة متعبة بس حلوووة وكان باالي مرتااح لأنه عيااالي جداام عيني ،،

يلاا أختي اتوكلي على الله و قرري و اخذيه معااج و روحي لمصر أم الدنياا و انتي مطمئنة القلب و مرتااحة الباال

و أهم شي جهزي كل أغرااض البيبي و احتياجااته ولا تنسين خافض الحراارة و الكااميراا لالتقااط أرووع الصور بربوع مصر لأجمل الذكريااات ..

و رحلة سعيدة ،،

ا
شكرراا لكم ,, لكل وحده ردت عليي ..
ويجزاكم الله كل خير يارب ..

بالنسبه حق تغير الحفاظ !! انا حاطه له اهتمامه وخايفه منه لانو لما نطلع مثلا وسط البلد ..

ونظل ساااااعااات وفتره طويله نتسوق ونتمشى والخ مثلا هني شلون راح اغير له !!

مو متخيله !

عموما انا فكرت كثير وانا اكتب الموضوع وانا اقول باخذه وياااي.. وارجع اقول لا بخليه اخاف عليه والخ ..

يعني حيره كبيره بس اكيد قدام عيني اهون بكثير من اكون بعيده عنه ..

نبغي تجارب بقية الاخوات ..

بنتظارركم ..
م
انا شخصيا - وذكرت هالشي في اكثر من موضوع - ما اقدر اترك عيالي واسافر عنهم مهما صااااااااااااااار يعورني قلبي وما لي قلب اسافر واستانس واغير جو بدونهم حتى لو كانوا متعبيني ومدوخيني لكن التعب يهون وهم معاي ولا ان اخليهم واسافر مع اني متأكدة ان لو بخليهم عند احد من اهلي او اهل ابوهم ما بيقصرون والله بس انا مااقدر وفي الاساس انا طلعات ما احب اخليهم واطلع مو بعد سفرات (a)



وعن تجاربي في السفر انا اللعام سافرت العمرة واخذت معاي عيالي اثنينهم الصغير كان عمره بس 10 شهووووور ويرضع وحفاظ وتعبني عدل والكبير كان عمره 3 سنوات ونص بس الحمدلله استانست معاهم رغم التعب والسنة الله عطاني مرة 2 ووديتهم معاي بعد لان ما لي قلب اخليهم والحمدلله احس ان زوجي نفسي ما له قلب نتركهم ونسافر :o
ا
انا سافرت ايران قبل شهر تقريبا وكان الجو هناك بارد وعندي طفلين اصغرهم كان عمره ثمان شهور واخذت معي ادوية من والى وجاه زكام صحيح بس استخدمت ادويته والحمد لله واذا على الحفاظ في المجمعات او السيارة دبري حالك هو اسمه سفر واهم شي تدفيه زين واستخدمي القبعة الا تجي على فمه وانفه بحيث يكون ملثم للاحتياط وحتى ابني الاول سافرت معاه وهو صغير وكان الجو بارد بس الله حافظه و انت وخيرة قلبك صحيح يتعبوا شوي بس بعد فترة بتكون ذكرى جميلة واهم شي برضى زوجك لابعدين يلومك
ا
والله ما قصروا البنات حتى أنا استفدت

وان شاء الله بالعطلة ناوية أعتمر وأفكر في ولدي اللي للحين ما جبته
أ
اتكلب على الله وخذيه
انا سافرت لسوريا24ساعه بالسياره وكنت احاتي عزوز مع الرضاعه وتغيير الحفاظ
بس الحمدلله صارت تساهيل
أ
أنصحك تأخذين ولدك حرام تتركينه بعدين كل شي متوفر في مصر لا تندمين وتقولين ليتني ما سافرت وتركت ولدي وسنه صغير يعني ماراح يتعبك وأقنعي زوجك المفروض يكون حريص على ولده
b
حبيبتي انا عن نفسي رحت مع بنتي وزوجي تايلاند يعني بد مو نظيفة بعد وكانت بنتي سنة ونص يعني اكبر من ابنج يعني تقدرين تسيطرين على ابنج اكثر من بنتي لان تمشي وماترضى تقعد في القاري بس كتبنت لي لسته شطولها شعرضها وانا من النوع اللي ماحب احتاج حق شي بالذات اكلها خفت انه مافي اكل يناسبها هناك

والحمدلله وااايد استانست اني اخدها لان لو ماخدتها بحاتيهاا وايد عالاقل هي وياي وزوجي ساعدني مع اني قبلها تركتها مرة للحج يوم كانت سنة بس الحج صعبة اوديها انتي مصر عادي احس

بالنسبة لي سويت لي قائمة كل يوم اضيف عليها شي اول شي:
ادوية كل الانواع بنتي وااايد تمرض
مراضع
بامبرز
حليب
صابونها مال ثياب
صابون تغشيل اللمراضع
طبعا ثياب من الالف للياء
قاري لحافات
خدت معاي نودلز وجبن وحلاوة وجبس
كلينكس معطر لتبديل الحفاظ في بره الفندق طبعا مااطلع من الفندق الا اذا بدلتها بعدين بعد جم ساعة اذا ماسوتها ادش حمام وابدلها سيدة واذا مافي حمام اقعد اي مكان في المجمع على الكراسي وابدل عادي تايلاند كان مافي مشكلة

انتي اذا تحتاجين حليب وبامبرز لاتزيدين وزن على روحش اكيد مصر فيها هالشياء انا كنت خايفة مااحصل وفعلا ماحصلت شي يناسبها هناك


نصيحة اخديها وياج عادي تستانس
م
أختي إذا مو ضامنه إن ولدك راح يكون بأمان في بيت أهل زوجك أخذيه معاك..

أنا تركت ولدي مرتين مرة قبل لايكمل السنة بأسبوع ورحت مع زوجي ماليزيا وكان صعب أخذه معاي عشان طول الدرب والتنقلات والحمدلله كنت مرتاحة أنه عند أمي وخواتي بياخذون بالهم منه بس الحين مستحيل أخليه ماشاء الله زادت شقاوته وحركته وعفسته يعني حتى أهلي يمكن يتضايقون..
ومرة خليته ورحت مع زوجي العمرة وهو له سنة ونص وبعد كنت مطمئنة....

أول مرة سفرته كان له ست شهور ورحنا بنهاية شهر واحد الأردن مع زوجي وأهلي وكان الجو موت برد.. بس ماحصلت صعوبة بتبديل الحفاظ بالمجمعات او المطاعم كنت أبدله والحمدلله ماتأذيت.. بس حصلت صعوبة بأكله لأن ولدي كان متعود على الخضرة المطحونة مالت البيت وأنا خذيت المعلب فما كان ياكل...

خلي كل أغراضك معاك وشيلي ثياب شتوية ثقيلة لأن الجود بارد هناك والله يسهل أموركم...
ح
وااو ذكرتين بمصرر عجيبة

اني اقول اليش اخذي ولدش وياش احس حل واني عن نفسي مستحيل اخلي ولدي واروح عنه اني لو اطلع مشوار نص ساعة اخذه ويايي مو سفرررر


اني سافرت مصر ولدي كان عمره سنتين وكان لحين يلبس حفاظ وما تغربلت كلششش

يعني هناك كل مكان بتروحين في حمامات او اقل شي كراسي يعني تقدرين تبدلينه لو على الكرسي
واني على طول ما اطلع الا وحاملة اليه بدلة وحفاظتين وغرشة ماي وكلينس في شنطة صغيرة يعني حتى لو مشوار ساعة ما اطلع الا فيهم
واذا في سوق او اي شي تقدرين تدخلين لو مطعم او صالون نسائي عندهم حمام تستخدمينه كلش مافي ورطة

وعن وسط البلد ترى في شقق مفروشة اجار في وسط السوووق في وسط البلد يعني عادي ترجعين البيت عقب ساعتين وتريحين وتطلعين مرة ثانية احنا اذكر كنا نروح ونجي جنى في ديرتناا وزوجي يروح ياخذ فواكه وغيرره واكل ولدي ونطلع وكان اكثر الوقت مشاوير وما نقعد لكن كلشش ما تغربلت في شي

اني عن نفسي رحت شهر 9 وكان الجو كلش بارد وخاصة الاسكندرية كاانت بااااااااااااااردة عددل هذا شهر 9 وجددي

احنا رحنا بس القاهرة والاسكندرية فقط وكنت حاملة لصدوقي الادوية الضرورية

وهي مصر كلها تنقالات واجد عندهم اماكن وزحمة احنا في القاهرة انتقلنا ثلاث شقق عشان مشاوير تصير قريبة يعني نروح شقة ووعلى طول نطلع متاحف وحدايق واسواق ومعارض وغيرره وبعدين ننتقل شقة ثانية عشان نصير قريبين من اماكن سياحية غير مثل الاهرامات وجددي يعني نقرب على روحنا بتغير الشقق لانة مصر زحمة فضيييييييييييييعة
D
عزيزتي... أنا سافرت في الصيف العام الماضي النمسا و إيطاليا و كان ولدي عمره 10 شهور... و طبعاً ما فكرت نهائياً إني أتركه...

فسويت بحث عن إستعدادات السفر، و كنت جادة في الموضوع لأني ما أبي إذا سافرت أتحسف إني ماسويت أو جهزت شي معين...

و كتبت قائمة بكل اللي بحتاجه و بسويه هناك، و طبعاً أخذت استشارة الأهل اللي عندهم خبرة و سافروا مع أطفال من قبل...

أكيد بيكون في تعب، و بيلزمج استعدادات واجد، و إنج تكونين حريصة على ولدج... لكن هذا ما يمنع إنج تستانسين و ولدج يستانس...

الصيف هالسنة صديقتي كانت بتسافر مع ولدها و كان عمره 7 شهور، فكلمتني تسأل شسوي؟

فرجعت للقائمة اللي عندي و حفظتها على ملف وورد و أرسلته لها... و الحين جيت بحمله و ما رضى يتحمل، و بحطه لج هنا... هو طويل لكن بيفيدج جداً إن شاء الله (f)



1- حليب بودرة... أحنا رحلتنا كانت تقريباً 25 يوم، فخذت معاي 5 علب صغيرة... و ما خلصتها كلها لأني كنت أرضعه طبيعي في الفندق و المطعم و السيارة... و الرضاعة أعطيه بس إذا كنا نمشي...

فإنتي شوفي، حسبي كم علبة حليب يخلص في الأسبوع تقريباً، و بتعرفين كم بيحتاج...
طبعاً هناك احتمال حليبهم غير عن هنا، فلا تعتمدين عليه، إحتمال ما يناسبه... عبي من هنا أحسن :)


2- رضاعات و حلم... أنا خذت معاي 3 في شنطته اللي في يدي... و 2 في الشنطة الكبيرة...
أنا خذت 3، لأن أحياناً نطول في الطلعة و ياخذ أكثر من رضعة، و ما عندي وقت أغسل له...

و أغسلهم بعدين في الفندق...


3- علب بلاستيك للأكل، يعني صحن صغير أو بادية عشان تخلطين له الأكل... أنا شريت طقم تقريباً 3 علب مع مغاطيهم و ملعقة بلاستيك و شوكة...



4- ترمس للماي... هذا تحطين فيه ماي مغلي حق الرضعات، و يكون حجمه وسط يكفي حق عالأقل 4 رضعات عشان تحطينه في شنطته اللي بتشيلينها بيدج...



5- حفايظ... خذي كيس واحد وسط، نصه حطيه في شنتطه اللي بيدج، و الباقي في الشنطة الكبيرة...
لأن في عندهم في بقالاتهم نفس الأنواع اللي نستخدمها...



6- مفرش لغيار الحفظات (changing pad)... هذا ضروووووري جداً جداً... في سيتي بلازا أو 0-9 بتلقين أشكال كثيرة، طبعاً هو عبارة عن قطعة بلاستيك، مثل السماط... انتي خذي النوع اللي يكون مبطن... يعني وجه يكون قماش و الوجه الثاني بلاستيك...
لأنج لما تحطينه على الطاولة حقت تبديل الغيار، بيكون البلاستيك بارد عليه و بيجزع مسكين... أما القماش بيكون زين حتى حق ظهره...




7- المناديل الرطبة... هذي عشان تمسحين له وقت تغيير الحفاظة، خصوصاً لما تكونون طالعين... أسرع لج... طبعاً خذي علبة معاج في شنطته اللي بيدج، و علبتين ثانيين في الشنطة الكبيرة...



8- فازلين، و مرهم حق إلتهاب الحفاظ... و خذي بعد كريم الجسم أو الزيت حق بعد السبوح...

9- خافض الحرارة تمبرا أو فيفا دول، و خذي تحاميل Voltarin و Tyleonl... عشان لا سمح الله إذا جاته حرارة... و انتي أحسن روحي حق دكتوره، و قولي له بنسافر و شنو آخذ معاي أدوية، و خليه يكتبهم لج... و ذكريه يعطيج ظروف فيها بودرة حق الإسهال، تحطينه في الرضعة مع ماي...
و لا تنسين مقياس الحرارة، ضروري...



10- شامبو و صابونة... أنا في البيت أستخدم له صابون سايل، بس حق السفر خذت صابونه عادية عشان ما ينكب علي السايل و أتوهق... خذي أحجام صغيرة... أو إذا تبين تشترين من هناك، براحتج [FONT=Wingdings]J[/FONT]

11- الشنطة الصغيرة اللي فيها مشط و مقص أظافر و مقص صغير... أنا حطيت مقياس الحرارة فيها...

12- مناديل الجيب، حطي بشنطته كم علبة...

13- فوط صغير، هذي صغنونة قد الكف، تلقينها طقم في 0-9... 5 مع بعض... تحتاجينها تمسحين فيها يده أو وجهه...

14- أكياس زبالة (و انتي بكرامة) حجم صغير، هذي بعد ضرورية جداً جداً... أنا خذت ربطة كاملة في الشنطة الكبيرة، و خذت منهم يمكن 10 أكياس صفطتهم و حطيتهم في شنطته اللي في يدي... هذي الأكياس الله يسلمج تحطين فيها مخلفاته ذات الروائح النفاذة خخخخ... خصوصاً لما تكونين في المطار أو الطيارة أو أي مكان عام حتى بالفندق... و أنا صرت آخذهم معاي حتى لما أروح أسيّر عالناس، عشان ما أخيسهم خخخخ..




15- بسكوت أصابع، أو أي شي يحب يقرمش فيه، خذي كم علبة في الشنطة الكبيرة، و الشنطة اللي في يدج... هذي عشان إذا زهقج و قعد يحنّ خصوصاً في الطيارة، تعطينه و يسكت...

16- لعبة أو قرقاشة أو عضاضة... اشتريهم جدد و خشيهم، عشان إذا صاح، تعطينه و ينشغل فيها... أما إذا كانت قديمة، يمكن يكون ملّ منها ولا تلفت نظره...
أنا شريتهم من مذركير، و عطيته في الطيارة، وحدة في الروحة و وحدة في الجية... و بالطيارة هم بعد بيعطونج له ألعاب...



17- سيريلاك و علب فواكه... هذي الله يسلمج نفعتني كثير... لأن إذا كنتوا طالعين، إحتمال ما تلقين أي أكل يصلح له... و الولد يجوع و الرضعة ما تشبعه...
فكنت آخذ معاي علبة فواكه، أو علبة أكل فاضية و أحط فيها سيريلاك، و إذا جاع، حطيت عليه الماي و أكلته... و اشتري له من هناك روبة (زبادي) بتلقينها في بقالاتهم، و خذيها معاج في كل طلعاتج... أنا أحياناً آخذهم كلهم، و شوفي اللي يعجبه...


جربت شريت علب الخضار، طعمها الله لا يوريج، فلا تجازفين، الفواكه طعمها حلو...

و في الفندق الله يسلمج، أنا كلمت خدمة الغرف، و قلت لهم عندي بيبي عمره 10 شهور و أبيكم تسوون له أكل بيوريه... كل ليلة أكلمهم و أقولهم أبي و جبة الطفل، و هم يجيبونها... و كل مرة شكل... مره بطاطس مهروس، مرة خضار مشكلة، مرة سوتيه و أنا أهرسها له... فإنتي سوي كذا أريح لج...
و نفس الشي لما نروح أي مطعم برا... لكن إذا ما يسوون بيوريه، أطلب له شوربة خضار يستانس عليها...

18. مراييل أو صدريات ورق... هذي حق استخدام مرة وحدة، فيهم لزقة، تلزق على الملابس... و إذا خلص أكل تقطينها... تلقينهم في كارفور... فإنتي سألي عنهم...


19- معقم حق الرضعات... الله يسلمج، احنا طبعاً في بيوتنا متعودين نغليهم عشان نعقمهم... طيب في السفر شتسوين؟؟!!
في الصيدلية أقراص لتعقيم الرضعات، و احتمال تلقينها في مذركير... أنا لما رحت لهم قالوا خلصت!!!

إذا ما لقيتيها، في محلول تعقيم سايل من Chiccoأو Pigeon... و إذا خذتيه لا تفتحينه إلا إذا وصلتي عشان ما ينكب في الشنطة... و انتوا راجعين لزقيه زين ما زين و ربطيه في كيس...
أنا جبت كرتون صغير، حق جواتي و انتي بكرامة... و حطيت فيه الشامبوهات و الكريمات و المعقم و سكرته و لزقته و ربطته بكيس و حطيته بالشنطة، عشان إذا انكب، ما ينكب على الثياب...


20- بطانية صغيرة... هذي بتحتاجينها و انتوا طالعين إذا الجو برد... أما في الطيارة يعطونج...بس أنا كنت حاطتها في شنطته معاي، عشان إذا نام في المطار...

21- طبعاً ملابس شتا... خذي له جاكيت متين بقبعة، و قبعة صوف و قفازات، و جواتي و شرابات... بيجامات متينة... هيلا هوبات... بيجامات داخلية تحت الملابس... لا تكثرين، قطعة أو قطعتين يكون من كل شي...
و اخذي له صندل واحد، عشان إذا صار الجو حر...


22. صابون ملابس، أنا لأني أستخدم له صابون الوزير، فخذت معاي كيس... و انتي براحتج، تبين تاخذين معاج، أو تشترين من هناك...

23. شنطة النونو اللي بتشيلينها معاج... أنا أخذتها من مذركير... عندهم تشكيلات كثيرة ماركة Avent... أنا خذت اللي تنلبس عالظهر و خليت زوجي يشيلها خخخخ... هي غالية، لكن حلوة، مقسمة، فيها مكان حق الرضعات و علب الأكل، و سحاب من تحت حطيت فيه الحفايظ و ال changing pad...
و فيها مثل كيس شبك، حطيت فيه أكياس الزبالة و الصدريات... و فيه سحاب على جنب، فيه كيس حراري عشان يحفظ الرضعات دافية...
و داخل الشنطة حطيت له غيار الملابس، و فوطة صغيرة و ترمس الماي و الألعاب...

24. علبة لحفظ الحليب... أكيد هذي عندج، العلبة المقسمة اللي تحطين فيها و جبات الحليب...

25. و لازم تاخذين معاج غرشة ماي صحة، عشان اللي في الترمس بيكون مغلي، و انتي تزيدين عليه عشان تخلينه فاتر... و الماي أنا أخليه مغلي، عشان أحياناً نطلع طول اليوم، و يبرد، أو يبرد بعد لما يكون الجو بارد بزيادة... و انتبهي، لا تستخدمين غير ماي الصحة!!!
و إذا اضطريتي، تستخدمين الماي العادي أغليه عالأقل 10 دقايق، أضمن للنونو عشان ما يجيه تسمم أو نزلة معوية!!!

26- جيبي علب صغيرة أو أكياس صغيرة، حطي فيها سكر نبات و نعناع ناشف و يانسون... عشان إذا جاله مغص، أو عشان تغيرين له بدال الحليب...

27. بالنسبة للعربة حقته، تأكدي إن المظلة حقتها كبيرة... يعني تنسحب للأخير و تتسكر عليه... عشان تغطينه لما يصير في مطر أو شمس أو برد و هوا... و في مثل الغطا شفاف، يصير تغطينه فيه إذا كان في مطر... سألي عنه في مذركير... و إذا ما لقيتي مكان تغيرين له الحفاظ، أنا كنت أغير له و هو في العربة...

28- شوفي إذا ما تبين تشيلين شنطة لج و شنطة له، شوفي أنا شسويت، جبت شنطة جلد صغيرة تتسكر بسحاب، حطيت فيها عدتي كلها (مكياج، كريم وجه، واقي شمس، علبة خياطة صغيرة، لزقات جروح و مسحات طبية، و لزقات للرجل خذتها من الصيدلية عشان لما تتجرح من المشي) و خليتها بشنطة ولدي... و شنطة يد صغيرة فيها الأشياء الضرورية اللي أستخدمها على طول، مثل المناديل و الجوال و كريم اليد و جل معقم لليد و البوك و كتيب أدعية و دفتر نوتة صغير و قلم و فرشاة أسنان صغيرة و معجون أسنان صغير، و نظارة شمسية و عطر صغير (أنا خذت تولة مسك من عبد الصمد القرشي لي و حق ولدي)...

29- لما تركبين الطيارة إذا كان بحضنج، بيعطونج له حزام تربطينه بحزامج...
أنا أول ما ركبت الطيارة، لبست ولدي بيجامته، عشان الأطفال عادة ينامون طول الرحلة... و عشان الطيارة باردة كثير... و قبل ما توصلون، غيري له... و إذا مثلاً بتنظرون في المطار مدة طويلة، خليه في بيجامته أريح له... أنا خليت ولدي فيها و الله شعرفه بالكشخة، حرام أحسهم ما يتحملون الكشخة مدة طويلة!!!

إن شاء الله ما نسيت شي...

وإذا حابة تستفسرين عن أي شي، أنا في الخدمة... و سفرة موفقة إن شاء الله (f)
ا
مشكورات جميع الا ردو عليي ربي جزاكم كل خير يارب ..

وبالخصوص اختي Daisy Ash

ما قصرتي اجابتج كانت متكامله على كل اسالتي ..

مشكوره كثييير ربي يجزيج كل خير

وانا مع زوجي بدون تقديم على الله راح نتوكل على الله وناخذه معانا ..

وان شاء الله ما يتعبني ..

اكثر شي التغير له وحنا بره وقلت حتى لو بالعربه اغيرله فكره حلوه ..

موفقين جميعا دعواتكم ..
X