قصتي: تسقيط ثم ولادة ووفاة والآن انتظر التسقيط

مو قادرة اسو ياي شي قبل ما اكمل

احس انه هم وابيه ينزاح عن قلبي

توفت بنتي في نفس الليلة الساعة 1

الصبح سمعت امي تتكلم في التلفون عبالهم انا نايمة لكني اسمعهم

تقول يعني نقولها بتدفنونها


ما بتخلونها تشوفها اخر مرة

وامي شالت سلة بنتي من يمي

اقولها وين بتودينها بنتي يتجي

ودخلت في حالة هستيرية

اتصلت في زوجي وهو يبكي يقول انا في المقبرة

اقول له شيسوون في بنتي

غص المسكين بعبرته
بندت التلفون وانا ابكي

رجعت اتصلت
اقول له لا يسوون في بنتي شي

ابيها ابي اشوفها

قال بس حبيبتي خلاص

سحبت امب التلفونمن ايدي

ودخلت في حالة ما يعلم فيها الا الله

الكل تجمع حواليني كانهم في مجلس عزا

اطالعهم واقول انا بحلم

انا وبنتي ما فينا شي

وين بنتي

لين جا زوجي ما قدرت اشوفه حسيت ان احلامنا تتكسر

ويوم ورا يوم ورا يوم ما قدرت انساهاخصوصا اخر صورة لها


حتى لما كنت احاول احمل صورتها في بالي

كل ليلة اقلب ال5 صور اللي عندي لها في التلفون

اليهال يسألوني ببرائتهم وين البيبي وللحين بنت حماتي 4 سنين تقول انتي كان عندج بيبي وين راح

وانا اغص بعبرتي

حاولت ان الحياة تمشي طبيعية لكن الزمن قال صبري راح تشوفين

وتمر الايام وبعد ما حسيت ان جسمي ارتاح عقب الولادة بست شهور وبنتي محفورة جرح في قلبي كتب الله اني احمل بعد 3 شهور من المحاولات الفاشلة اللي كل شهر تنتهي بصياح ونياح لأني ودي افرح بكلمة ماما

حللت عقب ما ياتني الدورة في عيد ميلادي

والحمدلله طلع خطين

بس فرحتنا كانت ناقصة لأنها كانت خوف مو فرحة

المهم تمر الايام واروح مواعيدي وتعب الشغل اللي ما فرحت اني توظفت لأني ما كنت ابي شغل
لا ابي طفل
واحسب الايام والثواني علشان موعدي

ولما كملت الرابع وبدخل الثالثث وفي يوم 24/11/2008 اروح الموعد واسمي باسم الله تقول الدكتورة شخبار البيبي اقولها مادري
تقول للحين ما تحرك؟

اقولها هدا اللي مخوفني

وتجي تكشف الترا ساوند وتدقق صار لها فترة ما تكلمت بعدين تقول البيبي ما يتحرك وما اقدر اشوف نبض

سالت دمعتي واقول لها ارجوش حاولي مرة ثانية وتحاول ما فيه فايده

انا هني انهرت حسيت ان الدنيا طاحت على راسي

جودت روحي شوي
الممرضات جو يهدوني ابدا

حاولت اسالها جم سوال استفسر اشوف بس ما كان في بالي ذيك اللحظة الا كلامها ان جنيني توفي

قالت لي اسبوعين اذا ما نزل تعالي

طلعت وانا ما اشوف الطريق سقت السيارة رحت لدكتورة ثانية

قالت الجنين مشوه ووقف من 15 اسبوع وانتي لازم الحين 18

فاضت عيوني سالتها وشنو الحل وليش؟ هذا الثالث ربي للك الحمد

قالت ليي يمكن دمج ودم زوجج ما يتطابقون ما يتناسبون

قبل لا تحملين المرة الجاية روحي سوي سوي تحالليل انتي وزوجج وانا في بالي يعني احمل مرة رابعه بعد كل اللي صار الحمدد لله

رجعت البيت لما كلمني زوجي من الشغل حس فيني شي وكان هذا قبل لا اروح الدكتورة الثانية

اتصلت فيه من البيت قلت له تعال

قال اشفيج قلت له اول تعال

على طول لما دخل ما قدرت امسك روحي وارتميت في حضنهع وانا اقول في قلبي سامحني ولا مرة فرحتك

قعدت اصيح اصيح واهو ما قدر يجود عمرة يبي يعرف شنو صار شنو قالوالي

ما قدرت قلت له خلاص قال خلاص شنو قلت خلاص

يبي يهديني قال الحين احنا المفروض متعودين

في ذيك اللحظه حسيت اني ما اصلح له ياما تعذب معاي
ولا مرة فرحته كاملة ليلتها كنت اقوله تعال معاي الموعد قال لا بجي في اخر المواعيد كانه حاس ان فيه شي وقلت له باجر بشوف شنو جنس البيبي ما امداني افرح وكنت مقررة ان من بعد هالموعد اخبر اهلي افرحهم معاي لاني عديت الخطر

الحين اقوله ما ابي احد يدري خلهم فرحانين وا ابي احد يضايق بسبتي كل واحد عنده مشاكل مو فاضي

بتحمل كل اللي يصير بروحي حتى لو اموت

زوجي مصر ان يخبر امي

ان يكون فيه احد يشاركنا هالشي
انا رافضة

الحين ما خبرتهم اني حامل خبر يفرحون فيه بخبرهم اني بسقط

مو عدله

وهذاني انتظر رحمة ربي وفرجه

انتظر هالبيبي ينزل وترجع حياتي ما فيها نقطة فرح

افكر اني ابتعد واخلي زوجي يعيش حياته

حرام اظلمه معاي ودي انه يفرح وانا بفرح له حرام يتعذب ماله ذنب

راح اتحمل بروحي وانتظر ربي يمكن يتذكرني وياخذني اليه مع اولادي اللي راحوا كلهم

اللي عندها نصيحة شنو اقدر اسوي الحين ياريت ما تبخل علي حتى ولو بدعوة