كيف اتعامل مع الشغالة ........ماعندي خبرة ....ساعدوني ؟؟؟؟؟؟؟؟

السلام عليكم ورحمة الله وبركاته
أختي الغاليه اولا تعاملي مع الخادمه بحدود لان مهما تقربت منها هي بتتكاسل في الشغل وبعدين ما له داعي تقعد معاج في الصاله تكلمي معاها بس لا تعطينها بالزياده لان يا اختي هن يجين يشتغلن وانتي ما بتظلمينها او ما له داعي القسوه معها اولا علميها شغلها في التنظيف والترتيب وعلى نظام معين والنظافه اهم شي اشتري لها حاجاتها من صابون وشامبو وغيره وانتي انشا الله ما بتقصرين معها اهم شي شغلها
وحاولي انج انتي تخدمين زوجج مش الشغاله واتمنى اني افدتج؟؟؟؟

شوفي حبيبتي هي بالاول والاخير انسانه تعاملي معاها علي هالاساس انا اجلس مع شغالتي واتكلم معاها لما يكون زوجي برا البيت وماعندي احد وممكن نشرب شاي ونضحك بس مو دايم :smile:لما تغلط وجهيها اوتغاضي عن الغلط بعد ما تفهم انك لاحظتي عامليها زي اختك وشوفي كيف ترد المعامله بالمثل ويمكن تكوني السبب في اسلامها او التزامها اذا كانت مسلمه الدين المعاملة وقدوتنا الرسول صلى الله عليه وسلم واول ماتجي فهميها الي تبينها تسويه والي تتركه والله يوفقك يارب

ما قصرت اختي رنيم الامارات
في كلامها ومثل ما قالت ما له
داعي تقعد معك بالصاله اذا زوجك مو موجود
ولكن ما يمنع انك بين فترة والثانيه تسولفين معها سوالف
يعني مثلاً تقولين لها انتم في بلدكم كيف
تحبون تطبخون الرز من باب الانسانيه
ايضاً ما يمنع مداعبه خفيفه وابتسامه انسانيه لها
لانها بالنهايه بشر
زينا زيها ......
حاجه ثانيه لاتطلبين منها عشرين شغله في وقت واحد
وفي نقطه اشدد عليها وهذي هي مبداي مع الشغلات
الخادمه لخدمتك اما زوجك انت المسئوله عنه
ولازم تكون فيه قوانين انه ما يطلب منها شيئ ابد
ولا يكون اي احتكاك بينها وبينه باي شكل
عشان كلاً يعرف حدوده>>>>>>مشيهم على العجين ما لخبطووووش
ودائماً يكون الدعاء مستمر بان الله يجعلها
مقدم خير عليك وينفعك بخيرها ويبعد عنك شرها
اللهم آمين
وان شاءالله تولدين بالسلامه
تحياتي

اللة يجزاكم خير

[السلام] السلام عليكم ورحمة الله وبركاته[/السلام]


بصراحة ما عندي خبرة في الشغالات...بس إن شاء الله البنات يفيدوكي...:smile:



.................................................


مـخـتــــارات من مواضيعــــي :


يـا صنــاع الحيــــاة....تـعـالـــوا قــولــوا لنــا أفـكـاركـــم في الإيـجـابيـــة....


~'*¤!||!¤*'~(( مسابقــــة: مـواقف و مـشاكل زوجيـة تـحتاج مـنا إلى حـكمة و حسن تصرف...شاركينــــا ))~'*¤!||!¤*'~

بالنسبة لي دايما احسن معاملة الشغالة وما اضغط عليها وايد بالشغل خصوصا يوم اشوفها تعبانه بالفعل او مشغوله لحد راسها وبالعكس اساعدها عشان ما اتحس اني مضطهدتنها او ما اراعيها كأنسانه،،، وهاي المعاملة هي اللي مخلتنها تشتغل من خاطرها وضميرها وهيه مبتسمة وراضية حتى لو هيه تعبانه دون ماتتشكي ويوم اشوف عليها شي ما انهرها من اول مرة بس ارشدها واقولها انتبهي مرة ثانية،،، الصراحة احيانا تكرر الغلط كذا مرة بدون ما تاخذ الكلام وفي كل مرة اشد عليها في الارشاد اكثر من السابق وآخرتها يوم اضطر اني انهرها تزعل وتمد بوسها شبرين بس هييج الحزة ما اعطيها ويه عشان تعرف شغلها عدل وما تخترب عليه،،،،يعني كوني طيبة بس بحدود،،، وإذا نهرتيها على شي غلط تكرره مب مشكله عشان ما تكرره مرة ثانية وبتلاحظين بروحج عجب انها تسنعت،،، يعني خلج وسط في التعامل،،، عن بشكارتي مثلا دايما دايما ألاحظ عليها انها تتظاهر انها ما تسمع يوم اناديها وكذا مرة اسكت لاني وبكل امانه اعذرها احيانا من كثر الشغل ومن كثر ما هي تعبانه ولكن مرة مصختها وايد يوم كنت اناديها وتأجل وتأجل على قولتها "صبري ماما" والصراحة وايد صبرت عليها هذاك اليوم بالرغم من انه اللي بغيته منها شي جدا بسيط وما يباله شغل وآخرتها يوم اناديها مرة أخيرة تتجرأ انها تقولي وبكل بجاحه:"انا مافي اجي الحينه انزين" وكأنه انا اللي اشتغل عندها مب هيه على ها الصبر كله والمهله اللي عطيتها اياها،،،والله راد انه اعصابي تفلت هذاك اليوم ونهرتها بطريقة جدا قاسية لدرجة اني ما احترمتها وذليتها كونها بشكارة عندي وغصبن عنها تسمع كلامي،،، استغفر الله العظيم كنت وايد معصبه هذاك اليوم لانها قلت ادبها عليه،،، حتى هي تفاجأت يوم شافتني في هاي الحالة وشافت فيه ها الجانب العصبي اللي عمرها ما شافته وكانت جدا منصدمة مني بس انا ماهمني هذاك اليوم لاني شفتها انها مصختها وقامت تتعدى حدودها ويايه خصوصا اني وايد مراعتنها ومن الصدمة تمت تصيح حتى زوجي عصب عليه وقالي لازم تراضينها وتعطينها على الاقل فلوس كترضية وبالفعل عجب ما هديت راضيتها بس حذريتها انها تتجنب انها توصلني لين هاالمرحلة وياها لاني عمري ما بتقبل منها انها تكلمني بها الشكل وبدون احترام،،،ومن اقولها تسوي شي تسويه على طول،،، والصراحة من هذاك اليوم وهيه متسنعه وما تتجرأ تتجاهلني وانا اناديها او تقولي كلمة خارج حدودها كخادمة،،،

انا طبعا ما اييد النهر بهاي الطريقة بس الصراحة هم اللي احيانا يطلعونج من طورج بدون ما تحسين،،، عشان جيه لازم تتحكمين في اعصابج شويه وتكونين عادله في كل الحالات،،، انا من النوع اللي اصبر واصبر واسكت وايد وآخرتها انفجر،،،

على العموم


من ناحية انج تضحكين وياها وتسولفين شويه او تخلينها تيلس وياج شويه وتطالع التلفزون انا ابدا ما اشوف فيها شي إلا كل خير واحسان والرسول صلى الله عليه وسلم كان جدا متواضع مع خدمه ويحسن معاملتهم حتى كان يخليهم يآكلون وياه،،، بإمكانج انج تسمحيلها تشوف التلفزيون وياج شويه يوم زوجج مب موجود بس عاد مو ترابعينها وتستوون ربع،،، لا،،، يعني مثلا يوم تطلب مني البشكارة انها تيلس شويه عشان تشوف التلفزيون وانا موجودة ما امانع بالعكس لكن اخليها مثلا تيلس على الارض وتطالع شويه وعجب فترة اطلب منها مثلا تخدمني في شي عشان ما تتعود على التلفزيون واليلسه وايد،،، والصراحة انا دايما اوفر لها اللي تحتاجه وتطلبه ودايما دايما اسولف وياها واضحكها لانها في غربة وبعيده عن اهلها وما عندها حد تكلمه غيري وحرام انها تشتغل طول النهار والليل بدون ما تمارس حقها شويه في الترفيه عن نفسها بالكلام،،، يعني مافي انسان يقدر يعيش حياته بدون ما احد يكلمه لو بكلمه طيبة،،، وحرام انها تشتغل وتعطي طول الوقت بدون ما تحصل شي طيب في المقابل،،، خصوصا لاني ما نعتنها من التحدث مع جيرانها من الخدم وما احب اعودها على الوقفه على الباب والكلام الزايد مع الخادمات،،،،

وسلامتج الغالية وسمحيلي على الاطالة

مرحبا اختي حبيت اوضح وجهت نظري

اني مستغربه منش ليش ها الخوف الشي ما يستدعي

انتي بتتعاملي مع انسانه مثلي ومثلش يعني كل ما كانت معاملتش

حسنه بتلاكي منها نفس المعامله وادا كنتي قاسه معها ابدا ما بتشوفي

الراحه اهم شي تكوني معها هادئه طيبه وتكوني معها مثل الصديقه

بتكون مخلصه لش اني اتعامل مع شغالتي مثل على ها الصوره بس

مخلصه الى حد الدرجه واهم شي الثقه والله يوفقش .....

تحياتي

:up: