صباحكم جميل بإذن الله F:
دائماً أحب التنويع بالفطور و تجربة أفكار جديدة... فجبت لكم معاي كم فكرة إن شاء الله تعجبكم :)
نبدأ بسم الله...
...فرنش توست بالموز و البينت بتر...
الكمية تكفي لشخصين...
بيضتين
ربع كوب حليب
رشة قرفة
رشة ملح
4 قطع توست
موزة حجم كبير، تقطع شرائح
بينت بتر
في البداية نخلط البيض و الحليب و القرفة و الملح في وعاء عميق...
نسوي ساندويتش عادي، ندهن التوست بالبينت بتر و فوقه نصف شرايح موز...
نسكر فوق الموز بقطعة توست ثانية، و نضغط عليها شوي عشان تمسك في بعض... طبعاً مع 4 قطع توست بيكون عندنا 2 ساندويتش موز و بينت بتر... نقطعهم بالنص عشان يكون عندنا 4 مثلثات...
نحمي المقلى، و نذوب فيه قطعة صغيرة زبدة مع شوي زيت... و نبدأ نغمس مثلثات التوست بخلطة البيض و الحليب... لازم يتشرب التوست الخلطة...
و نحمرهم في المقلى على الوجهين...
و هذا شكلها النهائي مع رشة عسل طبيعي فوقها...
...فرنش توست بالتفاح و الكاراميل...
للكاراميل بنحتاج:
كوبين سكر
كوب و ثلثين كوب كريمة، بحرارة الغرفة
ملعقتين زبدة
ربع ملعقة صغيرة ملح بحر (خشن) مطحون
(اللي مو متوفر عندها الملح الخشن، لا تستخدم الملح العادي، لكن ممكن تستخدم مكانه زبدة مملحة)
نجهز في البداية الكاراميل...
نجيب مقلى كبير و عميق و نذوب فيه السكر على نار هااادية...
لازم ننتبه للسكر ما يحترق! طبعاً الحواف راح تبدأ تذوب أول، فنستخدم ملعقة خشب أو سليكون و نبدأ نحرك السكر اللي ذاب شوي شوي بإتجاه أطراف السكر اللي ما ذاب في الوسط... لا تحركونه كله مرة وحدة! بتلاحظون إن السكر يبدأ يذوب من تحت بعد، فنحركه بنفس الطريقة...
و في الأخير بنحصل على لون كراميل غامق... لكن إنتبهوا للحرارة، ما نبي السكر يوصل لمرحلة إنه يحترق و يطلع دخان، لأن طعمه راح يكون مر!
الخطوة هذي بتحتاجون تلبسون فيها قفاز المطبخ عشان يحمي يدكم من الحرارة!
نرفع المقلى على جنب و بسرعة نضيف الكريمة و نحرك بخلاط شبك لحد ما يتجانس السكر مع الكريمة...
احرصوا إن لازم تكون الكريمة بحرارة الغرفة! أنا غلطت و كانت باردة لما استخدمتها، و على طول السكر مسك و صار كتلة كبيرة، و أخذ معاي وقت طويل عشان يذوب مرة ثانية!
نضيف الزبدة و الملح و نحرك لحد ما يذوبون تماماً...
إذا حسيتوا الكاراميل ثقيل كثير، ممكن تخففونه بربع كوب ماء...
نصب الكراميل في برطمان معقم، و نتركه لحد ما يبرد في حرارة الغرفة و بعدها ندخله الثلاجة، و بيكون صالح للأكل لمدة شهر!
نكمل باقي المقادير...
تفاحة، أنا استخدمت نوع ال gala royal (الملكي)
ملعقة كبيرة زبدة
بيضتين
ربع كوب حليب
رشة قرفة
3 قطع توست، مقطعة مثلثات
نقشر التفاحة و نقطعها شرايح رفيعة...
في نفس المقلى اللي سوينا فيه الكراميل، و على نار هادية، نذوب الزبدة و نضيف لها ملعقتين كبار من الكراميل اللي جهزناه، و نحرك لحد ما يذوب، بعدين نضيف شرايح التفاح...
نحرك عشان يتغطى التفاح بالكاراميل، و نتركه لحد ما يصير التفاح طري و تقريباً شوي شفاف...
نرفع المقلى على جنب، و نغطيه... و نبدأ نجهز التوست...
بنفس الخطوات في الطريقة السابقة، نخلط البيض و الحليب و القرفة...
نغمس التوست في الخلطة و نحمره...
و نقدم التوست و فوقه شرايح التفاح مع الكاراميل...
...توست بالنوتيلا و البينت بتر مع الموز بالكاراميل...
بنحتاج (الكمية تكفي شخص واحد):
قطعتين توست
نوتيلا و بينت بتر
ملعقة كبيرة زبدة
ملعقة كبيرة سكر بني (أنا أفضل أستخدم البني غامق)
موزة حجم كبير، مقطعة شرايح عرضية سميكة
ندهن التوست، وحدة بنوتيلا و الثانية بالبينت بتر...
أنا أدخلهم المايكروييف ثواني بس عشان يسيحون :)
لكن الخطوة هذي مو ضرورية!
نحمي مقلى صغير على نار متوسطة، و نذوب فيه الزبدة مع السكر البني...
نضيف شرايح الموز، و نتركها تغلي مع الكاراميل و نقلبها بحذر مرة و حدة عشان تتحمر من الجهتين...
و عند التقديم، نصف شرايح الموز فوق التوست، و نصب الكاراميل على الوجه...
و هنا نكون خلصنا الحلو... و يبقى آخر شي طريقة للتوست مالح :)
...فرنش توست بالبارميزان و البصل الأخضر...
نحتاج:
بيضتين
ربع كوب حليب
ملعقتين كبار جبن بارميزان مبشور
رشة ملح
رشة فلفل أسود
بصل أخضر مفروم
توست
نخلط البيض و الحليب و البارميزان و الملح و الفلفل...
نحمي المقلى و نذوب فيه ملعقة صغيرة زبدة، مع شوي زيت و نضيف لهم البصل الأخضر...
نقلب شوي بس لحد ما يذبل البصل... بعدين نغمس التوست في خلطة البيض و الحليب و نصفه في المقلى فوق البصل...
نحمره عالجهتين... و هذا شكله النهائي...
ممكن نقدم معاه طماط صغير مشوي، أو سبانخ مطبوخ مع ثوم و بارميزان زيادة عالوجه :)
إن شاء الله الأطباق عجبتكم... جربوها ترى جداً لذيذة... و عوافي إن شاء الله F: