ازيكوا يا حبايبي :032::032:
بقالي كتير مانزلتش موضوع هنا بس جيتلكوا النهاردة
ومعايا اللازانيا من مطبخي
وبالصور
وبالتفصيل
طعمها روووووووعة واحلي من لازانيا مركاتو ايطاليانو
كمااان هههههههههههه :037:
نبدأ الطريقة بقي
اول حاجة عملت البشاميل ودي المقادير بتاعته :
الزبدة وعليها الدقيق وقلبتهم علي النار وبعدين
ضيفت اللبن الدافي وملح وفلفل ومربع جبنة كيري
ومكعب مرقة دجاج (بس نسيت اصوره) وقلبت لغاية
القوام اللي انا عايزاه
وطبعا في اللازانيا والنجرسكو وكدة يفضل قوام
البشاميل يبقي خفيف شوية
ودة البشاميل بعد ماخلصته وسبته علي جمب
علي فكرة التواريخ اللي علي الصور مش مظبوطة
وبدأت اعمل الحشو بقي والمقادير اللي استخدمتها كانت :
لحمة مفرومة-قطعة زبدة او سمنة-صلصة طماطم-
ماشروم-ملح-فلفل اسود-زعتر جبلي-روزماري-شطة-
بصلاية-ثوماية
طبعا فرمت البصلة والثومة وصفرتهم في الزبدة
وضيفت عليهم الماشروم وبعدين اللحمة المفرومة
وعليها ملح وفلفل وشطة واول ماستوت اللحمة
حطيت علايها حوالي 3 معالق صلصة وزعتر وقلبت
وقفلت عليها وسبتها برضو علي جمب ودة شكلها
اللازانيا بقي
سلقتها في مية مغلية فيها ملح وزيت لمدة دقيقتين
او اقل علشان ماتتهراش وتتقطع وطلعتها علي طول
وحطيتها في مية ساقعة فيها ثلج علشان ماتلزقش
في بعضها وفردتها واحدة واحدة بعيد عن بعض
علشان ماتلزقش
علي فكرة فيه ناس مش بتسلقها اصلا بتحطها كدة
علي طول بس بتعملها قبل ماتحطها في الفرن بكام
ساعة علشان تطري من البشاميل والعصاج وبيقولوا
نفس النتيجة بس انا ماجربتهاش كدة بصراحة
بعد كدة جبت الطاجن بتاعي وحطيت فيه معلقتين
بشاميل ووزعتهم كدة
وحطيت فوقيهم طبقة لازانيا كدة
وبعدين فوقيهم طبقة من اللحمة المفرومة
وفوقيها وزعت معلقتين بشاميل
ورشة جبنة رومي وجبنة موزاريللا
رشيتهم علي البشاميل كدة
وبعدين طبقة لازانيا وهكذا بنفس الترتيب
كررت الترتيب دة 3 مرات كمان
وفي الاخر بقي حطيت طبقة بشاميل كبيرة فوق
الوش ورشيت عليها جبنة رومي وجبنة موزاريللا
ورشة زعتر جبلي ورشة روز ماري
الزعتر والروز ماري علي فكرة ادولها طعم مختلف
تماما
وشكل كمان :014:
ودخلتها بقي الفرن وهو سخن لمدة عشر دقايق او
ربع ساعة بس تاخد جراتان
وهنا بعد ماطلعت من الفرن
الديكوريشن اللي فوق الوش دة جوزي اللي عمله
بس فاااااااشل اوعوا حد يعمله ههههههههههههههه :085::085::085:
اتمني تكون عجبتكوا يارب ومستنية ردودكوا
وتقييماتكوا يا قمرات
ودعواتكم ليا بقي ربنا يهديلي بنتي ويباركلي فيها
ملحوظة : الموضوع مجهود شخصي ولاأاحلل نقله لأي منتدي آخر
تسعدني زيارتكم مواضيعي دائما :
http://forums.3roos.com/showthread.php?t=504680
اكلة صيني لذيذة وخفيييييييييييفة
http://forums.3roos.com/showthread.php?t=506332
دجاج محشي بالكاري من مطبخي
http://forums.3roos.com/showthread.php?t=514250
النجرسكو من ايدي بالصور
http://forums.3roos.com/showthread.php?t=519281
الدجاج بالبرتقال (( ابتكار من مطبخي ))