محتارة مع روضة ومدرسة طفلك.. حياكم

ولد أختي كان في المنار وووووواجد استفاد منها وواجد عندهم تركيز على المحادثة بالانجليزي بس أختي كانت متضايقة منهم لأن أن أجازاتهم كثير وهي موظفة :lol: صارت تتوهق في ولدها بسبتهم بس هي عموما زينة وانشالله باقي البنات يفيدونش .

بوح الكلمات;13080950:
مشكورة ياسمينة الفريج وهدا بالضبط رايي في روضة أطفال المهنا مايسعون لتطوير نفسهم أبدا والمبنى كلش مو متعوب عليه ولدي كان فيها من قبل سنتين وهي على حطتها المبنى صار قديم وما يفكرون يصبغونها من برى على الأقل ! اما عن روضة أنوار الغدير أني واجد اسمع يمدحونها ودخلت على موقعهم وشفت انشطتهم وفعالياتهم صدق روعة وفعلا اتصلت ليهم عشان اسجل اولادي اثنينهم بس اتفاجأت ان رسومهم شوي أغلى من باقي الروضات اللي في عالي وما أقدر أدفع ليهم اثنينهم ادا كانت هدي رسومهم بس الجاية انشالله باودي ولدي الصغير ليهم لأن الكبير بيكون في المدرسة ! خخخخخخخ هاه نمتين لو للحين هادي قصة ما قبل النوم هههههه . . .

ياسمينة الفريج;13121598:

العفو حاضرين خيتو .. وصح اني ما عجبتني اسعارهم بس سمعتهم جذبتني .. سعرهم 33 دينار من غير المواصلااات يعني اذا واحد عنده 2 يدفع 66 من غير مواصلااات ومواصلااتهم ب8 دينار :(

اللي :(:confused::| هو انه ما عندهم مساحه واسعه للعب .. عندهم العاب من الزلاحة والمريحانه بس المشكلة على سطح اسمنت يعني لو ياهل يدز الثاني يتعور .... الله يستر:hysterical: على اليهال ...

المهنا كم سعرها يعني ؟؟؟؟؟؟

روضة الامام الرضا يمدحونها بس في بوري يعيدة يعني .. وفيه بوابة المعالي او شيء من هالقبيل بس يقولون كانت زينة والحين مو شيء ...

حبيبتي ياسمينة ادا قمنا ندقق على كل شي معناته ما بنودي أولادنا الروضة ولو كانت الر
وضة مجهزة على أحدث طراز وآمنة من كل النواحي ( يعني الحديقة والألعاب والأرضيات وصالة الألعاب الرياضية ) بتطلع أغلى من بيع السوق خخخخخ وبعد الياهل معرض للسقوط وين ما كان والله الحافظ صح ؟ ؟
روضة أطفال المهنا كانت رسومهم 30 مع المواصلات بس ألحين غلوها شوي سووها 32 مع المواصلات يعني كلش عاد من زود الشهرة والسمعة الزينة خخخ تصدقين هالروضة من بد الوضات ما أدري ليش كل انفكرها تسكرت من زود ان مانسمع عنها أي شي واذا سمعنا يكون الشي سلبي تصدقين مديرتها كانت تدرس ويايي لما كنت أدرس رياض أطفال في الأكاديمية وكنا نقعد يم بعض ونركب الباص مع بعض وكل شي مع بعض بس طلعت حدها باااردة وعلااقاتها مع الناس جافة توقعت لما سجلت ولدي عندهم بترجع علاقتنا شوي مثل أيام الدراسة بس كانت كلش جافة ودائما ردودها مختصرة وما تاخد وتعطي ويا الواحد أبدا وحتى الابتسامة عندها بالحسرة هي ما تغيرت واجد عن أيام الدراسة لأن طبعها جدي بس عنجد انصدمت ولا كأن كانت ليي علاقة فيها من قبل ! ! يعني مثلي مثل أي ولية أمر ثانية ! وحتى خالتي عندها نفس الفكرة عنها جافة حدها وما تحاول تكسب أولياء الأمور على الأقل لمصلحة الروضة مولأي شي ثاني ! وهذا الشي ماخذينه أثناء الدراسة ! ! بعكس مديرة مملكة النحل لو الود ودها تحط ولي الأمر في عيونها بس مملكة النحل ألحين نقلوا مبناهم يم روضة السندباد في بوري ، وبوابة المعالي صدق مبناها كبير ويجذب بس بالنسبة للتعليم مايمدحونهم بس أول ما فتحوا كانت ليهم سمعة زينة ألحين سمعتهم تراجعت شوي ، وروضة الرضا لأسباب معينة ما أحب أني أعلنها على المنتدى ما أفكر فيها غير انها بعيدة شوي . طولت عليش بس عشان ادا في أحد ثاني حاب ياخد فكرة هذا اللي أعرف بالتفصيل الممل . :D ، انتي وين سجلتين عيالش ؟ ؟

سجلو ولدي في مدرسة ايهما الافضل
لؤلؤة الخليج الشرق الاوسط الروابي

وكم الرسوم
بكون للروضة مستوى ثالث

احنا ماشاء الله عندنا في سترة عندنا روضات الدنيا والدين

جربت وحدة منهم ومع اني سمعت عليها انتقادات والحين عندي طفلين فيها السنة اللي طفات والسنة هذي ان شاء الله

بس خفت انقلهم واحصل انتقادات اكثر من الروضة الجديدة

على مايقولون ( جود مجنونك لا يجيك اللي اجن منه ) ههههه

بغيت اسألكم عن روضة مملكة النحل

ويش رايكم فيها ؟؟؟

هديل الليل84;13122541:
سجلو ولدي في مدرسة ايهما الافضل
لؤلؤة الخليج الشرق الاوسط الروابي

وكم الرسوم
بكون للروضة مستوى ثالث

الأفضل لؤلؤة الخليج بس مستحيل تحصلين مجال لأن الأولوية للطلبة الي في المدرسة نفسها الا اذا عندش واسطة

مملكة النحل كان ولدي فيها العام وللأمانة الروضة زيينة وناس واجد يمدحونها ومديرتها حدها حبابة ولطيفة ويا الأهالي بس حسيت أن ولدي ماقبض شي عندهم في الانجليزي ونقلته في نص السنة وفعلا وديته عند وحدة اتدرس في بيتهم وهي على فكرة كانت مدرسة عندهم وواجد استفاد عندها وطلع بأشياء مو بشي هي واجد شاطرة في الانجليزي . ايه بعد الحلو ان مملكة النحل دائما يتعاملون ويا الأهالي بالمسجات على أبسط شي يصير في الروضة يطرشون مسج وهدا غير دفتر المراسلات .

بوح الكلمات;13123443:
مملكة النحل كان ولدي فيها العام وللأمانة الروضة زيينة وناس واجد يمدحونها ومديرتها حدها حبابة ولطيفة ويا الأهالي بس حسيت أن ولدي ماقبض شي عندهم في الانجليزي ونقلته في نص السنة وفعلا وديته عند وحدة اتدرس في بيتهم وهي على فكرة كانت مدرسة عندهم وواجد استفاد عندها وطلع بأشياء مو بشي هي واجد شاطرة في الانجليزي . ايه بعد الحلو ان مملكة النحل دائما يتعاملون ويا الأهالي بالمسجات على أبسط شي يصير في الروضة يطرشون مسج وهدا غير دفتر المراسلات .

مشكورة أختي بوح انزين في وين هذي المدرسة يمكن نقلد ونودي بتنا هههههه

شررووق;13125286:
مشكورة أختي بوح انزين في وين هذي المدرسة يمكن نقلد ونودي بتنا هههههه

هي متأجرة مكان ومسويتنه حقها روضة مسمتنها روضة الحوراء قريب المآتم العبابسة وحجي حسن وهالسوالف في داخل عالي ادا صدق اتفكرين تروحين حقها كلميني على الخاص .

اقول سمعتون عن روضةالمبدع الصغير ؟؟!
في مدينه عيسى او الكورة يعني داك الصوب ...زينه هي مستواها ويش ..لانه مفكرة اودي بنتي هناك اذا اتحولت ..بعد اسبوعين بس

مشكورين مقدما

مالك القلب ما سمعت عنها انا بنتي الحين
وديتها الخطوة الاولى في مدينة عيسى
عندج الغدير و a b c

كلمة الحياة مشكورة ...بس تقدرين تقولين لي جم رسوم التسجيل ..اذا ما عليش امر

منوى;13134572:

ضروري امهات اريد معلومات عن مدرسة لؤلؤة الخليج من جميع النواحي

الدراسة الرسوم
متى يبدا التسجيل
التدريس عربي +انجيزي
المدرسات

المعاملة

في البلاد

رسومها الدراسية تبدأ من 700 بدون رسوم التسجيل للنيرسري وترتفع تبعا للمرحلة الدراسية وتدريسهم جدا قوي للعربي والأنجليزي وعندهم اهتمام كبير بالطلبة

وتسيجيلهم يبدأ شهر 3 اعتقد بس ضغط وزحمة يعني بالواسطة لأن ناس واجد على الويتينغ من سنوات

ممكن إذا احد يعرف رسوم مدرسة الــ AMA ووين موقعها بالضبط ؟؟؟

دلوعة بنكية;13135707:
ممكن إذا احد يعرف رسوم مدرسة الــ AMA ووين موقعها بالضبط ؟؟؟

على شارع البديع بس ما ادري وين بالضبط ورسومهم تبدأ من الف وشي لمرحلة الروضة

بسمة أطفالي;13006157:
عنوني روضة البتول درسوا فيها بنات اختي واخوي وماشاء الله الكل يمدحها

مدرسة النور بنت اختي السنة ثانية فيها وماشاء الله عليها بلبل خخخخ لان مناهجهم معروفة قوية وشديدين مو بس في الدراسة حتى في القوانين وااااجد صارمين على الطفل واي خطا يعاقب عليه الطفل

وتروح وترد في الباص بش اشوف كلش عادي الوضع

بس تعرفين المدارس الخاصة فيها الشي الزين وفيها الشين

مشكوره اختي

طمنتيني

وعلى النور التسجيل شهر 3 وبشوف فكري وش يقول مني لشهر 3

والله يقضي حاجتش مثل ما طمنتيني

زهور يانعة;13003665:
البتول ماعنديفكرة عنها بس اسمع يقول زينة

اما مدرسة النور اذا النظام البريطاني اوكي وقوي وصعب يعني يعتمد واجد على الطالب ومدى اهتمام الأهل اكثر زميلتي عيالها هناك وحاطة لهم مدرس خصوصي من كثر ان ماتلحق في دراستهم اما النظام العربي ما يسوى وناس واجد تذمه

مشكور خيو على الإفاده

بس إذا بخليها نظام بريطاني بتغربل

معني في الإنجليزي زينه وابوها بعد

بس هي بتصير روضه يعني فهل نفس الحال

لاني مدرسه بنقلها حكومي لانه عندي افضل في التدريس وقريب لبيتنا

وبعد بسجلها في معهد للE