جبت لكم اليوم نوعين من المجدلة، و كل نوع حشوته غير... العجينة اللي استخدمتها هي عجينة العشر دقايق... بصراحة أول مرة استخدمها و انبسطت عليها كثير... هشة و خفيفة... و رااائعة...
المهم، بابدأ معاكم بسم الله...
عجينة العشر دقايق (العجينة سريعة و ما تحتاج وقت للتخمير)
المقادير:
- المجموعة الأولى :
فنجان قهوة سكر
2 ملعقة كبيرة خميرة فورية
2 كاس ماء دافي
ذرة ملح
2 كاس دقيق
- المجموعة الثانية :
نصف كاس زيت
3 كاسات دقيق
الطريقة:
- تخلط مقادير المجموعة الأولى مع بعض و تترك لمدة 10 دقائق .
- بعد العشر دقائق يضاف لها مقادير المجموعة الثانية و تعجن جيدا و تستخدم على طول .
- مثل ما شفنا العجينه تنقسم لقسمين و تتخمر عشر دقايق في القسم الاول و تضاف عليها باقي المكونات , يعني مجموع الطحين في العجينة هو خمس كاسات .
- الكمية ممكن تكون كبيرة , لكن ممكن تشكلين فيها و تنوعين... يعني تقسمين العجينة للفطاير أو البيتزا أو خليه النحل .
أول شي نبدا بمجدلة الهوت دوغ، هذي شوي شكلها غريب، بس أتوقع بيحبونها الصغار عشان شكلها...
نجيب مقدار من العجينة و نفرده بشكل بيضاوي، و نحط في الوسط قطعة الهوت دوغ...
نطوي العجينة على الهوت دوغ، و نسكر الأطراف عدل عشان تاخذ العجينة شكل الهوت دوغ... أنا فردت عجينتي أكبر من المطلوب، فقصيت منها شوي...
الحين يبدأ الشغل، نحط العجينة في صينية فرن، و نخلي الجزء اللي قفلناه تحت... بعدين نجيب سكين مشرشرة، ونبدأ نقطع العجينة شرايح بس بدون ما نفصلها... يعني نقطع و إذا وصلنا للقاعدة نوقف...
بعدين الله يسلمكم، نمسك الشرايح وحدة وحدة... نودي شريحة يمين، و نودي شريحة ثانية يسار، عشان يعطينا شكل كأن العجينة مجدلة...
بس انتبهوا، تعاملوا مع العجينة برفق عشان ما تتقطع :)
و هذي صورة عن قرب...
في الأخير أدهنوا الوجه بحليب أو بيض، و دخلوها الفرن... أنا خليتها 10 دقايق من تحت، بعدين ولعت عليها من فوق عشان تتحمر...
الشكل النهائي بوريكم إياه في الأخير... صبروا شوي...
الحين النوع الثاني... أتوقع هالنوع معروف و الأغلب يسويه... عادةً أحب أحشيه بحشوة لحم مفروم، لكن هالمرة غيرت و خليتها دجاج و طلعت تجنن...
نجهز الحشوة:
بصلة صغيرة مفرومة
فص ثوم مهروس
2 صدر دجاج مفروم، أو مقطع مكعبات صغيرة
جزرة صغيرة مبشورة
جبن تشيدر مبشور، العلبة الصغيرة
بقدونس مفروم
بهار مشكل - ملح - فلفل أسود
نحمس البصل و الثوم، بعدين نضيف لهم الدجاج المفروم و البهارات... و نحرك لحد ما يصير لون الدجاج أبيض... بعدين نضيف له الجزر و نحرك بعد لمدة دقيقتين... بعدين نطفي النار و نخلي الحشوة تبرد شوي... في الأخير نضيف لها الجبن و البقدونس...
و إذا تبونها باللحم المفروم، سووها بنفس الطريقة...
الحين نجيب العجينة و نفردها بشكل مستطيل أو بيضاوي كبير... و نحط الحشوة في النص...
و باستخدام القطاعة الرول أو السكين نقص العجينة بشكل شرايط مثل ماهو مبين في الصورة...
شفتوا شلون أنا طويت الأطراف... عشان نستعد نجدل عجينتنا... نبدأ نسحب الشرايط و نحطهم فوق الحشوة... مرة نسحب وحدة من اليمين و فوقها وحدة من اليسار بالتناوب... لو طلعت الشرايط قصير شوي، ما يخالف... اسحبوها بشويش بدون ما تقطعونها...
طبعاً حاولوا انكم تشتغلون في الصينية نفسها، عشان صعب بعدين تنقلون العجينة من على الكاونتر للصينية...
أنا نسيت و توهقت و أنا أشيلها لصقت و كانت بتخترب، بس الحمد لله جات سليمة...
و مثل ما سوينا مع العجينة الأولى ندهن الوجه و نحمرها بالفرن...
و هذا شكلهم النهائي...
للي يحب الكاتشاب و المايونيز مع الهوت دوغ، تقدرون تسوون منهم خطوط فوق العجينة عند التقديم، بيعطيها شكل حلو...
إن شاء الله عجبتكم المجدلة و بالعافية عليكم (f)