السلام عليكم أخواتي العرايس...
جبت لكم طريقة للمولتن كيك... بصراحة دخت كثير لما لقيت هذي الوصفة... ولقيتها على موقع أجنبي و جربتها وطلعت خطيييرة و طعمها يجنن...
و الأحلى من كذا أن الطريقة جداً سهلة ولا تحتاج مواعين كثيرة ولا مقادير كثيرة ولا خلاط... و غير كذا تقدرون تسونها في نص ساعة بس، يعني تصلح للطواريء...
و طبعاً ما يحتاج أقولكم حلو تاكلونها مع القهوة لأنها حالية كثير :D
نبدأ بسم الله...
هنا أنا سويت نصف المقدار... و اللي تبي تسويه بكمية أكبر تدبل المقادير...
أول شي نجيب قوالب الكيك الصغيرة البايركس، وندهنها بالزبدة ونحطها في صينية فرن...المقدار اللي سويته يكفي 4 قوالب... و نحمي الفرن على حرارة 425...
في وعاء لخلط الكيك نحط:
نصف أصبع زبدة
نصف كوب كاكاو خام
نذوب الزبدة و الكاكاو إما في المايكروييف أو في حمام مائي ونتركهم يبردون شوي...
نضيف عليهم نصف كوب سكر بودرة...
طبعاً بعد ما نخلطهم بتصير عندنا عجينة قاسية شوي...
نضيف عالمقدار بيضة وحدة زائد صفار بيضة، يعني بيضة و نص :)
نخلطهم مع بعض و بيصير عندنا خليط سائل...
نضيف عليهم 3 ملاعق كبيرة طحين، وأنا نخلته عشان يكون الكيك خفيف...
وهذا بعد ما خلطناه...
نصب الخليط في القوالب اللي جهزناها، تقريباً نعبي ثلاثة أرباع القالب... طبعاً المفروض تكون أربعة بس الظاهر القوالب اللي عندي كبيرة، فكفت 3 بس!
ندخل الصينية الفرن على الرف الأوسط و لمدة ربع ساعة بالضبط...
وهذا بعد ما طلعتها...
نمرر طرف سكين على حواف القالب عشان نقدر نقلب الكيك، و نمسك القالب بفوطة المطبخ عشان ما يحرقكم... و نقلبها في صحن التقديم على طول...
نرش الوجه بالسكر البودرة أو إذا تحبون قدموها مع الكريما...و نقدمها وهي حارة عشان يبين الكاكاو اللي داخل وهو سايح... يمممممم
إن شاء الله تكون عجبتكم وعليكم بالعافية F: