ليش انا غير عن البنات؟؟؟؟؟؟؟؟

السلام عليكم ورحمة الله وبركاته

اختي الفاضله الله يعينك بس المعروف ان البنت لما ترفض الخطاب او تحس بضيقه من بعد حدوث

الخطبه يقولون فيها نفس يعني لازم تقرين على نفسك او شيخ يقرا عليك

وانصحك بالاكثار من ذكر الله فلا مفرج للهم سواه

وعسى الله ان يوفقك

والله واجد بنات مثلك واولهم اختي

ماتحب طاري الزواج كلش

بس لاتوهمين حالج كذا ترى العمر يمر

بعدين انت ما ودج بطفل يناديج ماما

ماودج تودينه المدرسه ... ماودج امك تناديج

شوفي عيالج والله شعور حلو

ولا ودج عيالج ينادون امك

جدتي ... حرام تحرمين امك فرحتتهااا


فكري عدل يا اختي وان شاءالله نشوفك عروس

[CENTER]
~*¤ô§ô¤*~Miss Wanted ~*¤ô§ô¤*~

اسمج حلووووو الصراحه ..

حبيبتي لا تزعلين ولا تتضايقين في وايد بنات نفسج ... انطوائيات ولا يحبون الزواج ..

وبعضهم يتزوجون ويكون زواج فاشل بسبب الانطوائيه والعزله ..

انتي قعدي مع امج قولي لها ليش انتي رافضه وقولي كل الي في قلبج ..

والله صدقيني محد بيساعدج كثر امج .. يعني بتقولين حق مين .. وان شاء الله تلقين الحل عندها ..

لان هي نفسها ومنى عينها تشوفج عروس وتشوفج ام وتكون جده اميييييييييين ..

انتي فيج شي زين لانج تعرفين مشكلتج وهذي بدايه الحل وتبين الحل ..

وان شاء الله الله معاج وبيساعدج وبيوفقج يا رب وكثري من الدعاء ..

اتمنى اكون قدرت اساعدج وطمنينا عليج ..


ترى نبي نشوفج عروس لانج في منتدى عرووووس

[CENTER]السلام عليكم ورحمة الله وبركاته

أهلا أختي miss wanted

لاتتضايقين أختي،بإذن الله لمشكلتج حل، وأهم شي إنج تحسين بحجم المشكلة..

ممكن أعرف كم عمرج،وهل بالفعل إنتي إنطوائية وايد وماعندج صديقات،يعني على الأقل

صديقة وحدة،ماعندج؟

نحن نسمع إنه فيه بنات يخافون من مسألة الزواج،لكن كره،يعتبر أمر غريب،على العموم أكثري من

الأذكار وحصني نفسج بأذكار الصباح والمساء،لأن بالفعل العين والحسد تخلي الواحد يكره شي معين..

أما التخوف من الزواج فهو أمر طبيعي،نحن نشعر به،لأنها تجربة وحياة أخرى،تعتبر حياة مستقلة مع شخص

لم تألف العيش معه من قبل..يعني الكل يشعر بهالشي لكن رب العالمين بيسّر الموضوع..

الله يوفقج يارب ويسعدج،آمين

في أمان الله

حبيبتي لازم اتعرفين ان الزين لازم ماتردينه اذا كان خلوق وبيسعدج
"ناس يتمنون وناس فاريين النعمة"
لاتفكرين فالوقت الحاضر فكري فباجر امنو بيعينج وبيساعدج ,ارباعتج وخواتج كلهم بيعرسون وانت بتمين وحيده مثلي واتمنى لو احصل زوج صالح يسعدني وينفذ كل طلباتي. والله الريال اذا يخاف الله بيخافه فيج وبيسعدج ومابيقصر عليج لانج فذمته بيتحاسب اذا قصرعليج.
طمنيني عليج
والله حلو يكون عندج ريل مخلص يسعدج وعندج بيبي . فكري عدل ولااتفرين النعمة دامها عندج بالعكس حافظي عليها.

اذا العريس كويس من ناحية الدين والاخلاق حراااااااااااااام تفوتينه غيرك يتمناه

بعدين المفروض ياعزيزتي تسوين المستحيل عشان تسعدين امك...

اتكلي على الله وخوضي التجربه وربنا معاك

كثيييييييييييييير بنات زيك واكثر.. وتزوجوا وانبسطوا

وصدقيني بتنبسطيييييييين وماراح تندمين

يكفيك فرحة امك اللي تتمنى هذا اليوم


وشكلك متعقده من الزواج؟؟؟
يمكن تسمعين قصص عن المشاكل الزوجيه وووو
وتكرهين الزواج اكثر

بس بقولك ياعسل ان الرجال مو زي بعض

وان شالله ربي بيرزقك برجل طيب وحنون وحبوب ويخاف ربي فيك

المهم لايفوتك القطار وتندمين

وتحياتي لك

آسفه على الاطاله

انا نفسج تماما ..

الله كريم

:sad:

انا كنت مثلج ما احب الزواج و لا ابى اتزوج.. بس غيرت رايي لما حسيت بالحب و انخطبت.. تكرهين الزواج لانه حطيتي في بالج انه كل الرياييل نفس الشي.. بس ادعي انه الله يرزقج بالزوج الصالح..
و لازم ترمسين مع اي حد صديقتج-المهم تكون صالحة- او امج او اي حد ترتاحيله.. المهم خذي راي حد.. لا تضايجين و حطي في بالج شي واح:

قل لن يصيبنا الا ما كتب الله لنا


الدنيا ما تسوى تزعلين عشانها.. اذكري ربج وايد.. و كل شي الله كاتبنه.. اذا ياج خطيب ليش ترفضين.. شوفيه و اذا ارتحتيله تراه نصيبج..

الحياة تراها مش وردية مثل المسلسلات و مش كل الرياييل زينين يعني لا ترسمين صورة الريال الي ما عنده عيوب.. كل ابن آدم خطاء

و غيري من نفسج شوي.. فرفرشي.. اضحكي.. و نصيحتي.. شوفي مثلي شوية رسوم متحركة.. بتنسين همج..

انتي حاولي تتئقلمي مع الوضع وبتحصلي نفسك ما تقدري تبتعدي وشوي شوي بتخف الحالة بس لا تفكري وايد

اول شي

انا من النوع الانطوائي بشكل فضييييييع ولا احب اي احد يشاركني في شي .. احب الخصوصية لدرجة فضيعة .. و حساسة وايد .. ابدا مش اجتماعية ... تعبت وايد ..

انا مو مثلك انا عكسك بالتمام !!

لكن

في كل حرف ذكرتيه فوق انا مثلك ..
حبيبتي انا من كان عمري 20 سنه ورب البيت ماتمر سنه الا و3 خطابين على الاقل شرفوا على بيتنا ..
عزيزتي ماتتخيلين لاي درجه كنت " انصرع " يوم يتقدم لي حد .. يصير في البيت عزاء مو خطبه ... فوت كثيرررررررر ناس يستاهلون ورفضتهم .. زعلت والديني مني .. زعلت خةاتي واخواني الكبار .. الكلام بدا يطلع علي وبدوا حتى اقرب القرب يتكلمون فيني ان ليش ماتبي تتزوج !!

تخيلي لاي درجه مابي اتزوج ...... لدرجه اني رفضت ورفضت لين صار عمر اختي اللي اصغر مني قد الزواج .. فقال لي اخوي اذا تقدم احد هالمره بنزوج اختك اللي اصغر منك وانتي اقعدي قلت موافقه .. وبالفعل زوجوها .. والكل يطالعني بنظره ان " مسكينه " مايدرون اني مرتاحه .. وفي كل مكان ادخله الكل لازم يسئل هاه انخطبتي شي تزوجتي ماصار شي .......

تعرفين طفشت من كثر ماكانوا يضايقوني ويشوفون الزواج الدنيا كلها وانا الزواج عندي اتفه شي بهالكون ...

خلال هالوقت صار لي شي كبير ابرسله لك رساله خاصه عشان تكونين في الصوره صح .. والسبب اني بالعفل ضيعت نفسي ....

بعدها لما كبرت شوي وصار عمري 26 صرت يووم اشوف عيال خواتي يعورني قلبي ... سبحان الله الامومه غريزه .. وانا هالامومه فيني والحنان اللي فيني صرت ابي اعطيه البيبي حقي .. ابي اعطيه لولدي او بنتي .. لكن شلون وانا رافضه الزواج ..

بعد فتره صارت الاشياء كلها تتجمع على راسي لدرجه ان خلاص ماعدت اقدر ارفض .. خاصة لان صرت اشوف قدام عيني دمعه امي وقهر ابوي .. ابوي كبير ومنى عينه يشوفني مرتاحه مثل خواتي .. وامي ياعمر عمري وش احلى على قلبها من لما تشوفني مرتاحه في بيت زوجي .. لان الزواج دنيا ولازم اعيشها ..

تقدم لي في الفتره الاخيره كثير ورفضتهم ....... بس بعد فتره صار لي حادث كانت روحي بتروح فيه .. وانا كنت امر بوضع نفسي جدا سيء .. وسبحان الله كأن ربي يبي يوريني اي قد انا ضيعت حياتي .. بعد الحادث بيومين تقدم لي شخص اممممممم قريبي ومنا وفينا لكن عمري مانتبهت له وعمره ماذكرني .. وعمر واحنا جنب بعض لكن ربي ماكتب لنا وصل الا بهالايام ..

تقدم لي وكل الضغوط هذي لعبت دورها فيني ان بالفعل .. متى راح استقر .. حتى لو كنت رافضه ادري هو طيب وبيساعدي اتقبل .. غير كذا متى راح اسعد ابوي .. لما بعد عمر طويل يروح لربه !! ابوي مريض حيل حييييييييييل وابي اسعده .. وامي تعب قلبها مع ابوي وحسيت ان العايله بالفعل تحتاج تغيير يسعدها ..

شقولك اختي ..
انا ضحيت بأفكاري وكل شي لسعاده امي وابوي ..... وربي رزقني زين الشباب اطيبهم وارحمهم وابرهم بوالديه واكرمهم ..

بالفعل انا للحين ماجلست معه .. اكن تخيلي احترامه ومعزته عندي كبرت قبل اواجهه .. بالفعل احتـــــــــــــــــرمه .. ومن غير حيا .. ابيه يكون زوجي .. هو اللي ابيه يكون زوجي من بين كل هالناس انا اطمع فيه هو .. لان هو اللي بيصوني ..


فياحبيتي ..
الدنيا ماهي مزاج وفكر !!
الدنيا اخذ وعطا ..
والديك عطوك عطوك الين تعبت قلوبهم .. وجا دورك انك تعطينهم ..
فعطيهم اختي .. عطيهم واحسني النيه عشان ربي يبارك لك بزوجك وبيتك وحياتك ..

عطيهم وابشري بسعدك بأذن الله .. وانتي بينك وبين نفسك ساعدي نفسك عشان تتعودين وتحبين الامر .. لاتحطمين نفسك مثل ما انا سويت في بدايه خطوبتي .. كنت صياح وعذاب لدرجه ان اخوي قبالي ميت يتقطع يشوفني ومو عارف شيسوي من حالتي ...... وكل هذا لان مابي اتزوج .. لكن الحين تعالي شوفيني :) مرتاااااااااااااااااااااحه الحمد لله .. وكل مناي عسا ربي يريحك ...


وبعدين تأكدي انك مثل كل البنات " دام انا نطقت وانا ابو الهول عند اهلي " انتي بتنطقين هههههههههههههه

وعلى فكره ،، الشخص اللي انخطبتي له وفسخوتو الخطبه فهذا مو نصيبك .. ونصيببك مابعد جا يالغاليه .. انتظري وبيجيك زوجك اللي ينسيك كل هالمخاوف ..

وعلى فكره نصيحه خذيها من اخت تعزك ،، انا مدري كم عمرك .. لكن نصيحه لاتضيعين احلى سنينك بالرفض .. سنينك هذي شاركيها مع شخص يحبك ويذوب بطرف طرفك ..
انا ماعجزت ^_^ عمري 29 سنه لكن بالفعل ندمانه ان ليش ماعشت احلى سنيني مع زوجي ليش خربت حياتي .. لكن ارجع واقول الحمد لله يمكن لو اني موافقه من اول مايكون خطيبي الحين هو زوجي ..... وانا .. ابيه هو :)

موفقه عيوني واسفه طولت وشرحت لك حياتي هههههههه بس ابيك تحسين ان في احد مثلك :)

على فكره

عشان تتأكدين ان سعادة اهلك من سعادتك ..

ابوي كان مريض بمرض خطير حييييييييييييييييييييييييييل

وكانت حالته مايعبلم بها الا رب العالمين ..

وجيته ليله ابي ااكله قام يصد عني
قلت له يبا ليش ماتاكل كل من عندي قام يصد
قالت لي امي زعلان منك .. يبي يفرح فيك ..
انا ماتحملت بكيت ورحت غرفتي ..... ضليت فتره طويله وطلعت بعدين رحت ابوي واخذت له فنجان قهوه واعطيته ومايطالعني حتى .. قلت له ابوي انا راضيه حبيبي طالعني بنظره رضا عمري مانساها واخذ مني الفنجان ومن فرحته يوم عن يوم تحسنت حالته والحين اللهم لك الحمد ابوي احسن بكثيررررررررررر عن اول .. فرحان وهو كل يوم يتخيل يوم يجي يزورني في بيتي او لما يصير عندي صغيرونين هههههههههه دوم يقولي جيبهم دبييين ^_^

افرح بأبوي وافرح باللي سويته لابوي .. الله لايخليني منهم ..

السلام عليكم ورحمة الله وبركاته
مشكورين خواتي ..والله ما اعرف شو اقولكم ..فرحني تعاونكم ..حسستوني اني ابد مش وحيدة...
اشكر الكللللللل بدون استثناء!!!!!!!!!!!!!!!!!!



اختي ام خزامى :

خطوبتي كانت فاشله و إلي خاطبني كرهني في حياتي و كرهني في كل شي .. :( ضيقتي بعد الخطوبة مو بدون سبب .. عذاب دام سنتين...


أميرة البجع:

عزيزتي اميرة البجع ...عن عمري .. بدخل 24 الشهر الياي انشالله(اعتبر نفسي عجوز =_=)....وعن الصديقات..امبلا عندي صديقتين..هم إلي ارتاح لهم اكثر شي :(.. لاني صعبة شوي .. وانجرح بسرعة -__- مشكلتي في الحياة إني حساسة ..الله يعين...


business_girl

فديتج حبيبتي :confused: الله يعينا يا رب ..


بنت ادم:

"ناس يتمنون وناس فاريين النعمة"

لا لا يا اختي بنت ادم :s لا تزعليني منج !... والله ربي الوحييييد العالم بحالتي .. جدا صعبة .. يمكن من كلامي إلي قلته ما تحسون بالوضع .. بس مثل ما قالت اختي fay fay لما يتقدم لي احد كأنه عزى مو خطبة... و من عنوان الموضوع :(( انا متضايقة اني مو مثلكم .. كل البنات تتمننننننننى الخطيب .....انا اكبر بنت في العائلتي ..يمكن شخصيتي غير عن شخصيتج و يمكن عايشة ظروف غير عنج ..خلتني ما استحمل اني ارتبط مع انسان اخر .. ما ادري كيف اشرح بس والله والله يا حبيبتي ..غصبا عني .... شي خارج عن ارادتي ..:( اختي انا ما اتبطر استغفرالله.. و بعدين محد لغاية الحين جاني و كان مناسب ....سبحان الله ..
بس انشالله ما اتحطين في بالج اني من النوع المتكبر .. تحياتي لج ^_^

fay fay

والديك عطوك عطوك الين تعبت قلوبهم .. وجا دورك انك تعطينهم

هالجملة اثرت فيني وايد لدرجة اني بكيت...

اختي .. قصتج اثرت فيني كثير ...و على فكرة ..الشي الوحيد إلي يخليني ادور حل للمشكلة هو والديني ..كله ولا اهلي .. :( ما اريدهم يتعذبون اكثر معاي ..خصوصا بعد الخطوبة السابقة ...والله قلبي يتقطططططططع عليهم ..:confused:

هلا اختي..

بالنسبة لحالتك.. هالشيء عادي لبعض البناات ولايشكل عائق للزواج.. ويمكن بعد فتره الله يكتب لج لما فيه الخير..

ولكن انتي محتاجه لبعض الووقت ليس الا..


والسمووحه..

[CENTER]حبيبتي miss wanted
لاتشيلين هم ان شاء الله انت على الطريق الصحيح للتخلص من مشكلتج وبداية الحل انج عرفتي المشكلة وانتقدتي نفسج مثل ماقالت اختي مهرة ومستعدة للتغيير والتغيير انت اللي تبدينه من نفسج قال الله تعالى (إن الله لايغير مابقوم حتى يغيروا ما بأنفسهم)وحاولي بكل الطرق ..بالرقية بالاستشارة بالتعود والتطبع المهم انج ماتيأسين ياقلبي.

وثانيا يمكن تكونين ماخذة فكرة خاظئة عن الزواج ...الزواج نعمة وسكنى وطمأنينة ياأختي ومرحلة جديدة كل وحده تتمنى تعيشها فلا تحرمين نفسج .

واخيرا بالنسبة للخجل حاولي تكسرينه وتخالطين بنات وتكونين صداقات مقربة تشكينلهم ويشكونلج وتشجعون بعض وتفرحون لبعض ...الحياة نعمة يالغالية شوفيها بنظرة ايجابية .

والحمدلله والصلاة والسلام على رسول الله وعلى آله واصحابه أجمعين

اختج
دوحة الجميع

السلام عليكم ورحمة الله وبركاته

كيف حالك أختي ؟

ما شاء الله البنات ما قصروا

و أحب أضيف...إنه وقت ما ييجي نصيبك ما في شيء راح يمنعه...

خلّي دايما دعواتك الله يرزقك بالزوج الصالح إن شاء الله...

و طمنينا عليكي أختي

شوفي حبيبتي انتي لازم تروحي عند شيخ يقرا عليكي
انا اعرف وحده كانت زيك تتضايق لما يجيبوا سيرة الزواج قدامها اتاريها مسكينه كان معمولها عمل يكرهها في الزواج
انا مابغى اخوفك بس لازم اقلك كذا عشان تنتبهي لنفسك
واذا طلعتي كويسه ومافيه شي عندك احمدي ربي تعالى وهذي الاشياء اللي تحسي فيها طبيعيه حتى انا زيك
ونا كتبت موضوع قبل يومين يشبه موضوعك يعني الحال من بعضو

لا تعليق غاليتي غير الله يوفقك ويعينك

هلا اختي
أحب أقولكِ في البدايه إن هالشيء اللي تسوينه بنفسك

غلط ايه نعم غلط تضيعين احلى سنين عمركِ " أيام الشباب "

بسبب شخص يمكن بنى له حياة ثانية وعاش وجاب عيال وان كان
ماحصل له وتزوج قريب بيتزوج وينسى

اللي ابي اقوله لك انك تكثرين من قراءة القرآن الكريم والإستغفار
والدعاء وربي ما يرد عبد من عبيده .

وبعدين يا الغاليه انتي حساسة على حسب كلامكِ .؟؟

تدرين الزوج هو اكثر شخص يحس بالزوجة مهما كان نوعية حالتها
حسّاسة عصبيّه هاديه اي حالة ما يفهمها ولا يراعيها ولا يهديها
إلا الزوج وإذا كنتِ انجرحتِ من خطيبكِ السابق جربي غيره وبالعكس
حسسيه انكِ عشتي حياتكِ وادعي ربي

يارب يا غفور يا رحيم توفق كل خواتي المؤمنات بـ إزواج صالحين وذرية صالحه

اللهم آمين
والله عندي كلام كثير هذا اللي يحضرني حالياً


أختكِ موضوعيه

الناس ماهم سوا وإدعي ربك يرزقك المتقي الصالح .........وأول مايجيك عريس وحسيتي إنك مرتاحه له أعطينا خبر نسوي

أحلى فرح في المنتدى وكلنا بندعى لك بالتوفيق