اااه يا قلبي انحرمة من كلمة ماما

ياعمري انتي كلنا حاسين فيج .. وكلنا بنموت على كلمة ماما
كلنا نتمنى نحضن عيالنا!
لكن لله الحكمة، مابيدنا شي، كل الي نقدر نسويه الدعاء والتضرع لله بأن يرزقنا الذرية الصالحة ولا يجعلنا من المحرومين.

انا ياختي مسكت الجنة بين ايدي وفقدتها، حملت بعد صبر سنين ودموع وحزن وأول مرة احس برفسات البيبي في بطني .. وأول مرة يقرب موعد اللقاء بطفلي، حلمت بكل اللحضات، تخيلته في حضني، تخيلتني طالعة فيه للناس وفرحانه أول مرة وانا ادري انهم مايقولون مسكينه ماعندها عيال. طلعت اشوف ملابسه وسريره.
خططت شلون بصبغ غرفته وشنو بفرشها ... رسمت كل شي في بالي ولما دخلت الشهر السادس فقدتها وفقدتها وفقدت قلبي وعقلي وروحي معاها. ولدتها وتحركت في ايدي وماتت!
ماتت بنتي وماتت فرحتي واحلامي معاها .. ولي الحين شهر من فقدتها، امثل اني نسيت واحاول اطلع نفسي من الحزن الي انا فيه، ساعة اسكت وساعة اصيح ..بس ابد ما انسى!

بس مالي الا " اللهم اجرني في مصيبتي واخلفني خير منها"

مالنا ياختي الا الإستغفار وقراءة سورة البقرة والدعاء. الله كريم ويحبنا ومابيتركنا في الحزن.
بيجي اليوم الي كلنا إن شاء الله نفرح ونشوف اولادنا مالين علينا قلوبنا قبل بيوتنا.

انا ادعي لكم بنات كلكم، ادعوا لي انتوا بعد