بعد انتظار ثمان سنواتـــ

بسم الله الرحمن الرحيم

اول شي اقول اللهم صلى على نبينا محمد علية افضل الصلاة واتم التسليم

اخواتي .. يمكن البعض يعرفني والبعض الاخر يجهلني

[MARK="99FF66"] لكن بقول لكم قصتي كلها كاملة . [/MARK]
انا قماشة زري سجلت بالمنتدى منذ سنين وشوفو عضويتي كم لها .

متزوجة لي ثمان سنوات .. كتبت كثير في هذا المنتدى ولا ادخل الا قسم المتاخرات بالحمل حيث لم يكتب لي الله الحمل طول الفترة .
عالجت .. رحت عند مشاائخ اقراا .. رحت عند حريم واخذت اعشاب
سافرت الى اخصائيين ..
رحت ايام البرد .. وايام الصيف ..
تعبت نفسيتي .. كثير ..
صرت اقلل دخولي النت عشان ما يضيق صدري ..
وفعلن تركت عالم النت وانقطعت ..
بس ما انقطعت عن العلاجات والمستشفيات .
طبعا السبب كان زوجي عندة ضعف شديد بالحيوانات المنوية .
سويت بمركز دلة عند الدكتورة لمياء تلقيح صناعي وفشل .
وسويت تلقيح صناعي عن مستشفى الدكتور سليمان الحبيب الطبي الدكتورة زينب ابو طالب وفشل .

قبل اربع سنوات سويت اطفال انابيب بمركز جنين في منطقة الرياض بالسعودية
ولم يكتب لها ربي النجاح .
بعدها بست شهور .. سويت بنفس المركز وبرضو لم يكتب الله لها النجاح .
سويتها ثالث مرة بمركز العقم بمنطقة القصيم بريدة ولم يكتب ربي النجاح .

بعدها قررت ارتاح من العلاجات واشوف حالي وجسمي الي انتفخ من الابر التنشيط والكلوميد.
فقررت انسى موضوع الحمل واتوكل على الله سبحانة وتعالى وجلست من العام الماضي
اسوي رجيم لجسمي واهتم ببشرتي وشعري .
يوم جا رمضان السنة هذي رحت انا وزوجي للمستشفى سوينا تحاليل قالو ان زوجي عندة ضعف شديد ولازم ياخذ علاج لمدة ست شهور.
وبعدها بعد عيد الفطر راح يسون لي اطفال انابيب المرة الرابعة .
انا بالفترة هذي قلت 6 شهور كثيرة ابهتم بجسمي واسوي رجيم حلوو .
وفي رمضان كنت استغفر الله عز وجل كثير .. واتصدق وادور الناس المحتاجين للصدقة
وبنفس الوقت اهتم بجسمي عشان العيد يكون الفستان علي حلو .
جتني الدورة برمضان .. بعدها اخذنا عمرة بالعشر الاوخر من رمضان
كنت اطوف بالكعبة ادعي ربي اني ما اسوي انابيب لانها متعبة وادعي اني احمل حمل طبيعي حالي حال البنات .
بعد العيد صمت القضاء الي علي . قلت لا امي اني ماراح اصوم الست عشان الدورة راح تخرب علي اذا جتني وخلصت اصوم .
مر يوم يومين ما جت الدورة .
وصار معي الالام ومغص ببطني . وبعد 10 ايام من تاخر الدورة .. صار صدري يعورني .
انا طبعا متعودة ان الدورة تتاخر علي كثير .. مو اول مرة تتاخر ولو تشوفون لي مواضيع كثيرة هنا عن تاخر الدورة لي .
وقبل ثلاث ايام .. كنت ناوية انظف بيتي .. قلت لزوجي /
معي الالام ببطني :ss: خل نروح المستشفى عشان تعطيني الدكتورة حبوب تنزل الدورة
رحت للدكتورة وقالت لي لازم تحليل دم للحمل :(. قلا لا وشلون انا اصلن زوجي عندة ضعف واعرف المستشفى الكبير قال لي ما اقدر احمل الا بانابيب قالت ما اقدر اعطيك حبوب اجل الا بعد التحليل قلت يالله امري لله .(a)
سويت التحليل وجت النتيجة .. وكان الخبر عند الدكتورة تقول مبروك حامل :15:
تصدقون يابنات اني من شد الفرحة بكيت كثير .. لدرجة سجدت قدام الدكتورة والممرضات شكر لله سبحانة وتعالي .
يعني شي بسيط ربي رزقنا فية . وانا الي كنت انتظرها وكنت ودي اصوم الست واحس بتعب طلعت حامل ما دريت .
والله يابنات .. اني طول الفترة الي راحت مداومة ع الاستغفار والصدقة والتوكل على الله عز وجل ..
هذي قصتي كلهاا يابنات .. حبيبت تشاركوني فرحتي .. :)
وفعلن الثقة بالله عز وجل .. لان لي ثمان سنوات .. ما تخيلت اليوم الي بيجي وتقول لي الدكتورة مبروك انتي حامل (^) .. كنت افكر فيها بالاحلام .. ربي وفقني وصارت حقيقة .
عقبال البنات المحرومات وادعو ربي يثبت لي حملي يااحي ياقيووم .
اختكم / قماشة زري

ملاحظة / الرجيم اسمة رجيم بيفرلي هيلز وممتاز كثير .. لان كثير زينو الرجيم وحملو بعدة .

كتب يوم الجمعة بتاريخ 24 / 10 / 1429هـ
24 / 10 / 2008 م