نصيحة قبل التجهيز

السلام عليكم ورحمة الله

اخواتي من كثر ما شفت مواضيع موجودة هني ومن كثر شغفنا بالمولود اللي نبغي نشتري له كل شيء

حبيت الفت انتباهكم لشغلة مهمة

لاحظت ان اغلب المواضيع اللي حق التجهيز ماشاء الله على الامهات الغاليات مشترين ثياب شكثر على مواليدهم من 0-3 او من 3-6 وانا بعد مثلكم اشتريت واشتريت لين ماقلت بس ولو على خاطري شريت كل اللي بمحلات الاطفال حق مولودي الجاي

هالنقطة كان المفروض انتبه لها من البداية قبل لا اشتري الثياب لانها اكثر شيء راح تستخدمينه لفترة محدودة والجاهل كل اسبوع اسبوعين الا واهو كبر وتغير حجمه فحرام تضيع الثياب على لبسة او لبستين

اخذت هالتجربة من زوجة اخوي اللي توها والد من 3 اشهر وماشاء الله نص الثياب اللي اخذتها للبنوتة مالبستهم اياها وفيه بدلات لبستهم على مرة او مرتين

وكل فترة واهي ناطة السوق و المجمعات تشتري ثياب جديدة تناسب حجم البنوتة

والله كل يوم انشر ثياب مولودي الجاي ( ادعولي بالتسهيل ) واتأسف اني اخذتهم كلهم مقاس 0-3 او 3-6 ويمكن البسه اياهم ويمكن لا

فحبيت افيدكم قبل لا تسحركم اشكال والوان الثياب بالمجمعات وخذوا لمواليدكم الجدد مقاسات كبيرة عشان ماتطيح بجبدكم

وربنا يسهل علي وعليكم

ادعوا لي ان ربي يرزقني جنين معافى ويسهل لي بولادتي قريب