أكره العيد.. والأسباب..

مرحبا بنات اول حاجة احب اقول للكل بدون استثناء كل عام وانتوا بخير، ثاني حاجة ابدأ كلامي دا بالتأكيد انه سالفة كرهي للعيد مالها اي دخل بالعيد نفسه اللي بالتاكيد واجب علينا كمسلمين انه نحبه ونفرح فيه وانما طقوس الناس او اهتماماتهم بالعيد هي الي تنرفزني!!

انا جايه من عيلة حالتنا المادية مش ولابد وانا هنا ماني جالسة اشتكي او استجدي احد بس انبهكم لأساس المشكلة فعليا
كل سنة بأضطر اسافر مع اهلي للمدينة المنورة في كل عيد سواءً الاضحى او الفطر حتى تقضيته مع صحباتي لايمكن!! نطير من جدة للمدينة علشان نحتفل بالعيد عند اقاربنا بنات خالتي واقاربهم من ناحية ابوهم وزوجات اخوانهم وهم كثار ماشاء الله وحالتهم المادية ممتازة جدا ويقيسوا اللي قدامهن بملابسها او شعرها غير كده لا

في فترة العيد اللي بقضيها تقريبا ثلاث ايام بحس بالنكد والهم لانهم ناس يهتموا بالمظاهر بشكل مش طبيعي واضطر احيانا كثيرة اني احاول اشتري بالفلوس اللي يعطيني هيه ابويه واللي يادوب تجي بالعافية ملابس عشان يوقفوا كلام عني ( العام الماضي مثلا ما اشتريت حاجة) لكن بعدها اندم لاني ما ابغا اصرف الفلوس اللي جاتني من والدي كهديّة نجاح ليّا بملابس بدون ما اشتري الحاجة اللي انا فعلا نفسي فيها لكن للاسف انا مضطرة لانه مجتمعي بيقيس على اساسها اذا كنت انسانة رائعة او لا غير اني انا كمان لما اجلس معاهم بحس بالخجل اذا ماكنت لابسه حاجة عدله


انا اكره العيد لانه كمان بيكون وقت اختلط فيه مع الناس وغالبا يكون حديثهم ممل ومابيعجبني يعني غيبة ونميمة او حديث تافه عن المسلسلات مافيه اشياء تبسطني ولا اجواء تروح بجد عن نفسيتي التعبانه كل اللي بألاقيه اما صرف فلوس او مجاملات ومضيعة وقت انتي بكم اشتريتي هادا ومن فين؟ لبسك حلو وإلخ؟؟ ايش هوه العيد بالزبط انا مش عارفة؟ وما اتصور ان العيد مجرد ملابس جديدة في مجالس غيبة؟؟ ليه انا مضطرة اجامل واطلع واسلّم عليهم؟ ما اعرف يقولوا لي حرام لازم تسلمي وتسالي احس بالقرف والله العظيم..

متأكدة انه كثيرة منكم لما يقرأوا دي المشكلة ممكن يمروا عليها مرور الكرام وكثير ماحيقروها كاملة المهم انا حابه اعرف ايش ممكن اعمل علشان اتفادى الوضع هذا؟ افكّر اذا رحت هناك ما اطلع من الغرفة المجاورة للمجلس ببيت خالتي زي العام الماضي او اطلع لهم بيوم واحد بس بصراحة مش عارفة ياليت تساعدوني او على الاقل خففوا شوي عني معنويا وشكرًا