ولدت لكن ولدي اللي تمنيته وحبيته راح عني وخلاني وحيده(اللهم اجرني في مصيبتي)

بنات نفسيتي كلش تعبانه وودي اقولكم اللي في قلبي وافضفض لكم شوي حتى ارتاح واني ما ودي اخوفكم بس مثل ما قلت لكم ان اني تعبانه وودي اقول لاحد عن اللي في قلبي 00

:confused::confused::confused:اول ما تزوجت مهلت 8شهور تقريبا على طريقة المنع لان زوجي ما يبي من البدايه لان ظروفنا الماديه صعبه وما يظل الينا الا ربع الراتب من كثر الاقساط اللي علينا وبعدها تركنا المانع و حملت على طول وفرحت اني بصير ام وبجي من يفرحني ويسليني في وحدتي ويكون لي هو الاخ والاخت والولد وكل شيئ في دنيتي لاني وحيده في هالدنيا وما عندي خوات وصادتني هموم كثيييره في هالدنيا الله يعني ويساعدني ياااارب 00
المهم فرحتي ما تمت بس شهر ونص وبعدها طرحت وبعدها حزنت وحزنت وقلت ان شاء الله رب العالمين بعوضني بس لازم اكمل ثلاثة شهور والا ستة شهور عشان الرحم يرجع لوضعه الطبيعي والحمدلله رب العالمين عطاني الصبر وتحملت 6 شهور رغم ان الدكتوره قالت ليي عادي احمل قبل بس قلت احارس حتى الحمل الجاي يثبت 000

وبعد 6 شهور من الاسقاط حملت فرحت وقلت ان شا الله هالمره يثبت ومرت الايام كل يوم يمر عن سنه 00كنت اتابع في المستشفى على طول اول باول ولااا تركت ولا موعد ليي وفي كل مره اروح المستشفى يطمنوني عليه وان صحته زينه وسويت سونار مرتين حتى اتطمن عليه اكثر وكل شيئ فيه سليم حجمه ووزنه ومقاساته والمشيمه والحبل السري والماي وكل شيئ سليم وحركاته ما شاء الله واضحه تطمني عليه وتفرحني00 واحمد ربي ان قرب ولدي يصير في حظني وكنت كل يوم اقرا عليه ادعيه وقران واصلي صلاة شكر لله 00

وكان كل شيئ بخير وفي الشهر الثامن رحت ازور وحده والده وكانت عندها وحده من اول ما دخلت وهي تطالعني من راسي لتحت رجولي ولما سالت عنها قالو لي هذي حسوده وتسوي طبوب 00خفت من كلامهم عنها وقلت الله يستر وبعدها قلت حركته قلت الى زوجي وامي ان حبيب قلبي قلت حركته قالو ليي عادي لان كبر والمكان صغر عليه وبعدها حسيت ان اختفت حركته قلت اكيد ولدي فيه شيئ والا راح عني وقلت الى زوجي ورحنا المستشفى يبون يسمعون دقات قلبه مافي ورت حاولت بس ما في فايده ما سمعت دقات قلبه وبعدها سوو ليي سونار وقالو البيبي توه متوفي مو من زمان :confused:قلت اليها 00دكتوره البيبي فيه شيئ ؟والا معاق ؟ قالت لا كل شيئ زين فيه ان هذا قضاء وقدر توفى وفاة عاديه بدون سبب يا سبحان الله 00
:(:(توفى وهو في الاسبوع 34 وكم يوم يعني نهاية الثامن وولدته في الاسبوع 36

ولدت بالسلامه تاريخ 16/6/2008 رغم ان اني كنت خايفه انه ما يساعدني وقلت شكلي بموت لاني كله اصييييح وعلى طول دموعي على خدي حتى عيوني متنفخه من كثر الصياح وصرت ما اقدر اتنفس عدل لان تعب قلبي من الصياح وصرت ما اطيق اكل كل شيئ مو حلو واذا غصبو عليي واكلت رجعته صار ما عندي قوه للولاده لكن الحمدلله رب العالمين ستر وعطاني القوه وولدت والحين صار ليي من ولدت ثلاثة شهور وجم يوم وبعدي بموووت من كثر الحزن حتى زوجي واهلي اهملتهم صرت ما اطيق احد ما احب اقعد وايا احد ودي اروح وايا ولدي 000خاطري في بيبي ادعو لي في هالشهر الفضيل ان الله يرزقني ويعوضني ولا يحرمني من هالنعمه ويرزق كل محروم ومحرومه بالذريه الصالحه