بنات البحرين..شو هي السفرة الي تتكلمون عنها

ع

عيون بوظبي

مشرفة سابقة

25-09-2008 | 05:05 PM

السلام عليكم خواتي

حبيت استفسر عن السفرة الي تحطونها بنات البحرين والكويت في الخطوبة ..

بصراحة مافهمت معناها واكيد الكثير مثلي بالذات انه هالشي مب موجود في الامارات ..

يعني ابا اعرف الهدف منها ؟؟

وليش تحطون معاها بيض يعني هو رمز لشي والا تستخدمونه وواللا شو ؟؟

ولاحظت انه الكل يحط حوض سمج.. قرآن.. بيض .. ليش ؟

وفواكه مزينه ليش ؟ ياكلونها الناس يعني هذي رغم انها مزينة واللا بس جي زينه.؟؟

ياريت تفهمونا شو سالفتها (f) تحياتي لكم

ي

ياسمينة البحرين

عروس مشرقة

25-09-2008 | 05:35 PM

اهلا اختي ... ان شاء الله اقدر افيدج ...

السفرة هي اساسا فكرة للفارسين و تداولوها البعض ...

وتتكون السفرة من حلويات وتوزيعات وبيض وغيرها ..... واكيد كل وحدة تضيف اللي تريده ......

لذلك تتغير السفرة من وحدة لوحدة ....

وهذي التوزيعات اللي بالسفرة يوزعونهم على المعازيم بالنهايه كـــ تذكار ....

مثل حلاوة المولود .....

وهني بعض السفر :

http://go.3roos.com/p0gvtv7LETV

ان شاء الله عرفتين على توضيحي :)

ه

هذيان عاشـقة

عروس رائعة

25-09-2008 | 09:29 PM

معروف طبعا أن لكل شعب مراسيم تخصه في الاعراس والمناسبات وأن العجم والفارسيين خاصة يستخدمون هذه السفرة للاحتفال بالعروس..عشان المعازيم جميعا يشاركون العروسين فرحتهم والأكل بياكلون منه..

ومكونات السفرة:

فواكه .. كل فاكهة في الموسم .. ويحطون فيها خيار بعد..
مكسرات وحلويات .. مشكل ومصبوغ بالذهبي والفضي .. الجوز وبيدان
العسل للحياة السعيدة وعشان تصير حياة العروسين عسل × عسل
بيض مسلوق وملون
قران تقوم العروس بقرآته وقت اتمام العقد عليها الى أن ينتهي مراسيم العقد .. وخصوصا سورة الفتح..
مراية "منظرة" يتفائل بها العجم وتعكس شكل السفرة والعروس وهي للحظ
و العجم يخصصون لكل عروس مراية تحتفظ فيها مثل نحتفظ بثوب الزفاف للذكرى واذا أنكسرت يكون فال سئ على العروس
شموع عشان تعطي جو جميل ورومانسي
وفيه طبعا سكر اللي يسمونه القند بحجم كبير .. يحكونه البنات اللي ماتزوجوا اثناء مراسيم العقد على راس العروس عشان يلحقونها وينخطبون..:D

علاقتنا بسفرة العجم
الجالية العجمية والفارسية بمختلف عروقها لها عوائل في البحرين و الكويت و الامارات تعيش بيننا وطبيعي أن يصير تزاوج بين العجم والبحرينين او الكويتين او الاماراتيين ولان الناس تحب التقليد و لان هذه السفرة شئ مميز صاروا العرايس يسوونها حتى لو كانت العروس
والعريس لا يمتون للعجم بصلة ومع الوقت أصبحت السفرة هذ الايام منتشرة في حفلة العقد وصاروا العرايس يصرون عليها لان لها طابع مميز..

وصاروا الحين يتفنون فيها ويضيفون لها شغلات كثيييرة ..مثل التوزيعات المبتكرة من شوكلاته وملبس وعطور وعسل وغيرها .. و الفواكه صاورا يحطونها بطريقة مميزة مثلا الفواكه المحفورة او المنحوته .. و لا يحطونها في سلة وتتزين بالورد الطبيعي.. ويدخلون ليتات صغيرة ملونة بين اغراض السفرة عشان تعكس اضاءة حلوة .. و يسوون السفرة على الأرض أو تكون مرتفعة على طاولة .. او مجموعة طاولات .. وبعد قاموا يتفنون بأغطية السفرة .. ناس تحط توول وحرير ستان .. وطبعا بعد ماكانت السفرة تجي بس باللون الاخضر ولا الذهبي .. صاروا يطقمونها مع فستان العروس ..

والاخت طبعا ماقصرت حطت لج رابط تقدرين تدخلين وتشوفين صور اشكال والوان عن سفرة العجم .. او العيم على قولتكم يا اهل الامارات:wink:

ع

عذبه الأطباع

عروس نشيطة

26-09-2008 | 04:10 AM

تصدقون مي تو ما كنت عارفه شنو يعني سفره << معني كويتيه ..

سألت امي ما عرفت .. بديت أسأل رفيجاتي كويتيات و بحرينيات و ما عرفوا ..

بس يزاكم الله كل خير ع التوضيح الحلو ..

انزين ممكن سؤال .. :)

متى يكون موعد حفله السفره .. ؟؟

أيام الخطوبه .. ؟ أيام الملجه .. ؟ و لا بعد العرس .. ؟

و شنو علاقه البيض اللي قلتوا عنه بالحفله ... ..؟؟

ديكور بس .. و لاااا له مراسيم .. ؟؟

و بث ..

يسلمو عيون بوظبي ع السؤال .. و يسلمو ياسمينه و هذيان ع التوضيح ..

:)

ق

قلبك الأخر

عروس فضية

26-09-2008 | 08:04 AM

عذبه الأطباع;7284101:
تصدقون مي تو ما كنت عارفه شنو يعني سفره << معني كويتيه ..

سألت امي ما عرفت .. بديت أسأل رفيجاتي كويتيات و بحرينيات و ما عرفوا ..

بس يزاكم الله كل خير ع التوضيح الحلو ..

انزين ممكن سؤال .. :)

متى يكون موعد حفله السفره .. ؟؟

موعد السفره يكون المغرب على الساعه 8

أيام الخطوبه .. ؟ أيام الملجه .. ؟ و لا بعد العرس .. ؟

وقت لي يملج الشيخ على البنت يعني وقت الملجه
بس احين صاير في نوعين عندنا ناس بس يخلونها بيوم الملجه والملاج يملج عليها الصبح عشان تقدر تروح تتعدل وتروح الصالون وهيك سوالف

و شنو علاقه البيض اللي قلتوا عنه بالحفله ... ..؟؟

ماله علاقه مجرد زينه خليط من الفواكه والبيض والمكسرات بالاضافه الا توزيعات اللي تتوزع على المعازيم في يوم المجله نفسها اي وقت ماتكون السفره موجوده

ديكور بس .. و لاااا له مراسيم .. ؟؟

في ناس تاخدها ديكور وفي ناس تاخدها مراسيم يعني السفره مو شي أساسي بس كزينه وكفرح للعروس اكثر العرايس يطلبونه:rolleyes:

و بث ..

يسلمو عيون بوظبي ع السؤال .. و يسلمو ياسمينه و هذيان ع التوضيح ..

:)

يسلم غاليكم ومغليكم وحاضرين

ع

عيون بوظبي

مشرفة سابقة

26-09-2008 | 03:41 PM

تسلمون بارك الله فيكم على التوضيح ..

كنت صدق استغرب من وجود البيض والقرآن .. بس الحين فهمت

ماشالله عليكم ما قصرتوا كلكم

وتحياتي لكم ولشعب البحرين بعد

ق

قلبك الأخر

عروس فضية

26-09-2008 | 04:24 PM

عيون بوظبي;7286745:
تسلمون بارك الله فيكم على التوضيح ..

كنت صدق استغرب من وجود البيض والقرآن .. بس الحين فهمت

ماشالله عليكم ما قصرتوا كلكم

وتحياتي لكم ولشعب البحرين بعد

الله يسلمج حبابه(a)
ماسوينا شي
والحمدلله وضحت الصورة
والف سلام لج(a)