عادي عندك تطلعين طفلك / طفلتك للزوار وقت النفاس؟ والا لا؟

انا بولد بالبكر هاليومين



و شيء اكيد بطلعه لهم




بتوكل على الله



و هاذي عاداتنا


و الله الحافظ

هلا وريف

انا عن نفسي بستقبل الزوار في المستشفى و بس.. مابا حد ايني البيت..

و حتى لو حد يزورني... بسلم عليهم في الميلس و براويهم البيبي شوي و بترخص و بطلع

بس دايما احصن نفسي عن العين... و احس مب حلوه اني اخش البيبي عن الزوار لانهم ياين يسلمون علي و يجوفون البيبي :)

وطبعا كل وحده و ظروفها :) في ناس ينخاف منهم و خوفا على البيبي نخشه عنهم

بالنسبة لي عارفة إن اللي راح يزوروني كلهم من الأهل سواء من أهلي أو من أهل زوجي وصديقاتي وشي أكيد راح أطلع لهم البيبي بعد هذيلين أهل ومقربين لازم يشوفونه :)

بس دائماً راح أقرا عليه المعوذات وأحصنه والله الحافظ .

مشكورة وريف على الموضوع

انا بعد محد بزورني غير الاهل و صديقاتي وطبعا اهم يقعدون في المجلس واقعد ويااهم شوي وقبل لا يروحون لازم نراويهم البيبي
بس اكيد لازم اقرا عليه المعوذتين
اما عن التعليقات انا ما احب احد يعلق بس ولا يهمني اسوي روحي ما اسمعهم

شوفي حبيبتي

على ولادتي الاولى تميت فالمستشفى تقريباً اسبوع

وكل الي زارني شاف بنتي

ولمن رديت البيت بصراحه كنت تعبانه وايد من العملية وكنت اصلا ممنوعه من الحركه الزايده فكانو ايون يسلمون علي ويشوفون البيبي وهم طالعين

ولمن الجرح بدا يخف كنت ادخل الميلس اسلم عليهم ووديلهم بنتي واطلع على طول

وبالنسبه للعين كنت احصنها دايما واقرا عليها المعوذات ,,, والحافظ الله

وبعدين احنا عندنا عاده اندخن الياهل والبيت عموما بالشبه المغرب ,,, يقولون انها تطرد الحسد والعين

مب بحلوه تخشينه
هما الاهل الي بيجونك وبيتحمدولك ع السلامه
وسلامه البيبي
ولا خشيتيه شنو بيقولون
خايفه عليه منا
والله مب زينه
لكن انا اشوف انتج تحصنينه وتحصنين روحتج وتلبسين دراعه واسعه وتلفين راستج بطرحه
والطفل هم تلفينه عدل
وتشممينه" مر"عسب الروايح ما تأذيه

انا للحين ماحملت( الله يرزقني)

بس الي اشوفه ان خواتي مايطلعون النونو الى اذا احد اطلبه ليش

لان بعض الحريم مايسلمون على النونو اذا كان موجود ولا يسألون عنة (مادري الناس اشفيهم ) فا من عقبها خواتي مايطلعونهم

عاداتنا و تقاليدنا تلزمنا نكرم الضيوف و هم عازينا و مكرمينا و يايين يتحمدون لنا بالسلامه فما يصير لا نطلع لهم البيبي عن نفسي طلعته لهم و سمعت تعليقات و انتقادات و نصايح بس عادي اهم شي عقب ما يطعون الزوار عمتي كانت تييب شبة و تشببني انا وولدي عن العين و بسسسسسسسسسسس...

هذي عادات اصلا اذا وحده خشت البيبي و عقب كم شهر كبر و في ناس ما شافوه يتشهقون فيه بل صار كبير بل شكله غير و من هالحجي و هني يكون الحسد اقوى @@




تحياتي
ام محمود

انا بصراح تعقدت لان مرة اختي طلعت ولدها وكانوا اهل زوجها وظل يبكي ثلاث ايام متواصلة بدون اي سبب ودوخنا مرة


عاد انا قلت لي حملت بروح اسلم عليهم بالمجلس وبحاول ما اعطي احد فرصة يشوف البيبي

نحن عاداتنا وقت ماتولد وحده عندنا

عادي الضيوف يدخلوا غرفة المربية ويسلموا عليها وعلى البيبي ويتحمدوا لهم بالسلامة

طبعا لأزم نسمي عليه من العين والحمدالله

عادي طلعت بنتي وكشختها بعد بأحلى باند وكيس تقديم والله الحافظ
بالنسبة للتعليقات أحاول ما أكون حساسة على أي شي أسمعه أتضايق
وهذي سوالف الحريم من بداية الساعة حتى نهايتها
لازم نتكلم عن الشبه(مثل أعمامه لا خواله) والرضاعة ليش مو طبيعية ليش ماتحطين لها برضعتها مدري شنو علشان تمتن........ألخ
وأنا شخصيا أقول هالناس تعنوا وزاروني يتحمدون لي يالسلامة ليش أوسوس بسالفة عين

من عوايدنا نكرم الضيف و اللي يزورنا يعني يكرمنا و يعزنا و لازم نجلس مع الضيوف سواء كانوا من الاهل أو الاصدقاء و نطلع البيبي يشوفونه و نخليهم يحملونه .. اعتقد عيب ان الضيوف يجون يشكرونج سلامة الولادة بالسلامة و ما يشوفون البيبي

شي طبيعي بطلع اسلم عليهم وبراويهم البيبي

دلين ضيوفي دام انهم اكرموني وزاروني لازم بطلع ليهم ..والشبة لابد منها في كل الاحوال

بصراحه لو علي ما بطلعه جدام حد...اخاف من التعليقات و العين ...فيه ناس ايتمون يسألون كم وزنه و كم طوله ...وفيه ناس ايشلونه و يبوووسونه على ويهه ويمكن فيه منهم اللي مريض و اللي زجمان وممكن يعادي البيبي...في المستشفى ما اخليه في الغرفه اللي يبي يجوفه يسير الحضانه يشوفه من الشباك...بس في البيت خلاص ماادر اسوي شي...فشله اييون الناس و متعنين يبون يشوفون البيبي فلازم اطلعه لهم...ايلس شويه ويا الناس عقب اشله واوديه الحجره

بس الصراحه استغربت من تصرف بعض الناس

ولا كان البيبي موجود!!!!! ليش؟؟؟؟

لن يصيبنا الا ما كتب الله لنا


عسب جي

شي اكيد بظهر انا والياهل ان شاء الله يكفيني حظورهم عسب يباركون فلازم افرحهم وياي :)

اي عآدي .. بس في بعض الناس الصراحه ما ودج يشوفون البيبي اتخافين منهم خخخخ

اهم شي تعوذينه و بس

احنا عاداتناا الوالدة تكون قاعدة بغرفة وية البيبي والي يجي يقعد وياهاا واذا صارو الضيوف في المجلس لازم يمرون يسلمون على الوالدة ويشوفون البيبي عندها ما عندنا هالعادة يخشون البيبي
والله الحافظ

مااعتقد اني راح امنع خاصة اقاربي او صديقاتي او زميلاتي من شوفة ولدي او بنتي الله اعلم واكيد اني بحصنه بإذن الله بالقراءة والحافظ رب العالمين ...
أما عن الزيارات في بيتي ماعندي احد امي متوفية الله يرحمها وخواتي كبار وكل واحدة في بلد مو فاضيات لي يعني ماعندي إلا رب العالمين سبحانه والله يعيني وعادة اللي يزوروني شويين مو كثار فاكيد في المجلس باستقبلهم ولحالي تخيلوا ؟؟؟؟؟؟؟؟؟؟؟ الله يعين بس.

انا عاداتنا عادي يشوفون البيبي ونتوكل على الله وربي الحافظ