أسباب خلتني أحمل

السلام عليكم جميعا
أنا كنت أفكر أكتب هذا الموضوع من زمان بس كنت متردده

أنا كنت من المتأخرات في الحمل بس الحين الحمدلله حملت 3 مرات و عندي طفلين(ثاني حمله إسقاط)
المهم بخبركم سالفتي

أنا يوم كملت تقريبا خمس شهور من الزواج, دقت حقي ربيعتي اللي كانت قاطعتني من يوم ما خلصنا الدراسه في المدرسه, وتمت اتسولف وياي و كانت كله اتردد احنا اتأخرنا عن الحمل, و كنت أقول الها تونا بعدنا معرسين,(هي كانت مكمله سنه و شويه), و كانت كل ما إتكلمني اتعيد نفس الكلام, لحد ما نفسيتي تعبت, وقلت بتعالج لأنه الدوره مش منتظمه,و رحت عند الدكتوره و نظمتلي الدوره, و كانت كل مره تظربني إبر و تعطيني كلوميد, بصراحه انتفخت, و كل مره اتقولي بتحملين هذا الشهر أكيد, بس بعدين ودرتها لأنها كانت وايد تاخذ فلوس يعني اتخيلو كل مره 1000 درهم من غير الدوا, و يوم كملت 10 شهور سرت عند دكتوره ثانيه و نفس الشيء عطتني كلوميد و دوا ثاني, بس بصراحه وايد تعبت تميت أرجع و يتني الدوره هلكت منها, و الشهر الثاني عطتني نفس الدوا , وكل ما أسير إلها اتقولي كل شيء تمام المبيض زين و البويضات حجمهن زين, بس أنا كنت وايد اتعب واتألم, و مره كنت سايره أبوظبي و مرة أخوي مخبرتني عن دكتوره هناك وايد يمتحونه, و سرت إلها عشان أشيك, و قالت حقي الكلوميد سوالي أكياس على الرحم و هذا سبب الألم, وعطتني دوا و الحمدلله فادني
و تميت أتعالج عندها, وكله اتقولي ما فيج شي, و سويت أشعه ملونه في الرحم و كان وايد أيعور, و قالت القنوات كلها ممتازه, و سوتلي تلقيح صناعي بس ما نجح
اّخر شي قالت خلاص ارتاحي شهرين من الأدويه لأنها وايد نفختني استويت دبه,
الحين أني للأسباب
و أنا في العياده قالت لي وحده لا اتفكرين بالحمل انسيه و لا اتييبين طاريه أبدا, طبعا سمعت كلامها حسيت أني أرتحت و بعد قلت لريلي ما أيفكر بالحمل لأنه بصراحه كان شايل هم الحمل أكثر مني
و بعدين سرنا العمره و كنت وايد أدعي ربي و خاصه في الروضه, المهم و كنت أستغفر بهدف الحمل كل الوقت, و أختم صلاتي بدعاء "اللهم أرزقني الذريه الصالحه"
و أخيرا بعد سنه و نص, وايدين قالولي أتمسحي(تخبين) و أنا كنت رافضه و أقول مستحيل شو الخرافه, مع أنه ريلي مصر علي أروح أتمسح وبعد كان يبغي ايوديني الهند للعلاج بس أنا كنت رافضه,بس وحده من صديقاتي تمت تقنعني لأنها هي سارت عند الحرمه و اتمسحت و حملت, المهم سرت عند الحرمه و اتمسحت, وقالت حقي الرحم عندي مائل جهت اليسار و عدلته, وقالت حقي ما أشل شيء ثقيل و لا أجهد عمري بالشغل و بعد شهر اتأخرت الدوره أسبوع, أنا كنت مزهبه جهاز التحليل المنزلي بس ريلي ما خلاني أحلل عشان ما أنصدم و أزعل, ويوم مر الأسبوع الثاني من الصبح أنا وريلي وعينا و سرت سويت التحليل, و قتله خلانا أنصلي لين ما تتطلع النتيجه(مع أنه دقايق و بتطلع النتيجه) المهم صلينا و ركض بأثنينتنا للحمام و ريلي ايشوف الجهاز بس مب فاهم شيء و يوم قريت النتيجه موجب تميت أنطنط من الفرحه و ريلي يحظني و انصيح و نحمد الله على أجمل نعمه, سيده على العياده, و فشله العياده امبنده بس اريينا لين ما يت الدكتوره و سوت لي صورة تلفزيون و الحمدلله أكدت حقي الحمل

بنات الله يرزقن مثل ما رزقني و أي وحده تبغي رقم الحرمه أتخبرني ترا أيوها من كل الإمارت