عيال زوجي !!

غيودة قطر 21-09-2008 10 رد 3,738 مشاهدة
غ
السلام عليكم خواتي

شحالكم .. عساكم بخير ...

حبيباتي انا عندي استفسار بسيط ...

ابيكم تنصحوني شلون اكسب محبة وقرب عيال زوجي لي ... هم صغار مب كبار بنت عمرها 6 سنوات وولد عمره 3سنوات ... شاللي اقدر اسويه لهم ... انا وربي شاهد عليّ احب كل اليهال مب بس عياله ... انا حاليا مملوج علي للحين مادخل علي يعني وماصرت فبيته بس ابي اكسبهم من الحين واشوقهم لي ولجيتي لبيتهم ... وشي اكيد لو كسبتهم بكبر في عينه اكثر لانه هو من البدايه وضح لي هالنقطه انه ماتزوج بس عشان راحته وسعادته وعشان يعوض الشي اللي ماتوفق فيه قبل (يقصد تجربته السابقه) بس هم يبي انسانه تقدر عياله مثل ماتقدره هو وتحبهم مثل مابتحبه وهالانسانه بتكون على راسه من فوق ... هو يحبني وانا متأكده بس ابي مايحس لحظه اني مب قد هالمسؤوليه ... اتمنى القى عندكم نصايح او تجارب حلوه تساعدوني فيها

انتظر ردودكم يالغاليات على احر من الجمر
*
شوفي حبيبتي دام انهم صغار ممكن تشترين لهم العااب ،،، وتخصصين لهم يوم في الاسبوع

تطلعين معاهم وتودينهم الالعاب وتعشينهم احس بهالطريقه ممكن تكسبينهم

وكل مرة فاجئيهم بلعبه جديده او ملابس جديده

وعلميهم ينادونج من البدايه بخالتي

والله يسهل لج امورج ويسعدج في حياتج
م
شوفي حبيبتي اي شي تسوينه هسه زايد خير يعني المحبه حاليا راح يحسها هو بس راح يفكر ويكول الله يديمها بعد الزواج ولما تصيرين ابيته يعني بعد الزواج يله تكدرين تبينين هاي المحبه ويحس بيها كلها لان حاليا يحس انه من الطبيعي انك تلعبي معهم او تخرجي معهم على اساس بتكسبين وده ولكن بعد الزواج غييييييييييير
كوني لهم مثل الام تعاقبين وتحنين بنفس الوقت يعني اعتني بيهم وبنضافتهم وبلعبهم واشتريلهم وطلعيهم وكانك امهم وبنفس الوقت عاقبيهم طبعا بيسر بالبدايه الى ان يتعود ويتعودون عليج اذا سوو اي شقاوه يعني ببساطه عامليهم كام تحب اولادها وهو بعد هذا الشي راح يعرف قيمتج يعني حاليا صيري طبيعيه وياهم الى ان تزوجون والله يوفقج ان شاء الله
ع
من راي ،، دام انتي قلبج يحب اليهال لا تحاتين وخلي قلبج اهو يتعامل معاهم ،،،،وهم بعدهم صغار يعني بحبك اكيد راح تكسبينهم ،، لعبي معاهم الأشياء إلي يحبونها سولفي معاهم سوالف يحبونها ،، وعامليهم مثل ما تكونيه خالتهم او امهم يعني حتى لو سووا شي غلط وبخيهم مب لانج تبينهم بقربج تخلينهم على كيفهم

والله يوفقج حبيبتي

تحياتي
s
حبيبتي اول شي مبروك وعقبال العرس
شوفي حبيهم وتقربي منهم والعبي معاهم وشاركيهم ترا كل شي اذا كان من قلب يوصل للقلب ويكون مفعوله اسرع
اما البنت فتقربي منها وتكلمي معاها اساليها عن صديقاتها وهواياتها واكثري من المدح لها
وربي يعطيج على قد نيتج ان شاء الله
ب
اختي جيبي لهم العاب و طلعيهم الملاهي و وديهم ياكلون بالمطعم اللي يحبون


ترى الاطفال بالعمر هذا يحبون اللي يلعب معاهم و بنفس الوقت يحسون منع انه يحبهم


ترى والله الاطفال يحسون.. يعني حني عليهم و بوسيهم و بيأثر فيهم الشي هذا



تقبلي مروري
أ
الله يتمم لك على خير ويسعدك ويوفقك

أختي بداية أقول لك احتسبي أجر التقرب من أولاد زوجك، واجمعي أكبر قدر من النيات الصالحة، فيكون تقرباً لزوجك، وعطفاً على طفل جعله الله تعالى تحت رعايتك، وانوي أن تتقي الله فيهم ما استطعتِ وأن تحرصي على تعليمهم كل ما هو نافع لهم في الدنيا والآخرة بإذن الله

إن تيسرت لك النوايا الصالحة، يسر الله تعالى عليك العمل بإذن الله

أنت قلت أنك تحبين الأطفال، وهذه نقطة عظيمة، لا تقلقي أختي وتعاملي معهم بطبيعتك، والأطفال ما شاء الله أذكياء، يعرفون من يحبهم ممن يدعي حبهم، فعامليهم بشكل طبيعي، ولا تتحرجي من أن تغمريهم بالحنان سواء عن طريق الأحضان أو القبلات أو اللعب معهم وحتى مناقشتهم في موضوعاتهم الساذجة

أما بالنسبة للهدايا و الفسح فأرى أنها يجب أن تكون في حدود المعقول حتى لا يترسخ لدى الطفل أن من اشترى لي هدايا أحببته ومن لم يشتر لي هدايا لم أحبه

أسأل الله تعالى أن يحببك إلى أطفال زوجك وأن يحببهم لك وأن يديم بينكم المودة والرفق
ا
الاخوات ماقصروا وكوني الام الحنونة اللي يتمناها زوجك والله يوفقكم دنيا واخرة ويعينك على تربيتهم
م
اختي اول شي بسالك انتي راح تسكنين ببيت بروحك ؟؟

يعني بيت تتصرفين فيه بمزاجك !!

والا مع هله !

لان اذا ببيت بروحك

اقترح عليك تصصمين لهم غرفه ترفيه

بحيث تكون حلوة بالوانها وتقدرين تستعنين بمحلات الرخام وهالشغلات يحطون لك سيراميك مخصص لغرف الالعاب يكون ملون وبستائر اطفال ملونه وحركات جذيه يعني

وتحطين فيها كل شي لهم تفاجأينهم كل مره بشي بهالغرفه

مثلا حطي بلاي ستيشن + نطاطيات صغيره + سيارات للولد + دي في دي واشتري لهم افلام دي في دي كارتون مثل (( بارني + تيلتابيز + توم اند جيري + نودي )) هذا اكثر شي يحبونه الاطفال وبكل فتره جددي فيها

علشان يحطون ببالهم هالمكان مراح ينسونه وين ماراحو راح يذكرون هالغرفه وبالمفاجات اللي فيها راح يحبون الجيه عندك بأن تعودوا يحصلون شي جديد حتى بتكون لهم مثل الهدف


اختي هالشي مطبق عندنا وعن تجربه وبنفس وضعك و حالتك
ا
الله يوفقش وتقدري تكسبي تقتهم ومحبتهم
ر
الله يسعدك مع ابوهم ويدللك والله يسعد ك دنيا واخره ويرزقك بالدريه الصالحه الي تبرك وتهنيكي

وكله بسبب اهتمامك بالصغار لانك بتعوضيهم حنان الام


الله يوفقك
X