باركوا لي ولدت.. وهذي قصة ولادتي بسيدون القمر

السلام عليكم جميعا خواتي... وااايد فجيتوا علي

ولدت بتاريخ مميز 8/8/2008م يوم الجمعة مع أذان الظهر...


هذي ولادتي الاولى، ماعندي اي فكرة عن الولادة وعوارها.. فاختي وصتني بالليل اكل اناناسه

طبيعية واشرب ماء ورد مع زعفران وبعد نصحتني انام مع زوجي (اللي خبركم) المهم طبقت اللي

قالته اختي بحذافيره بعدين دخلت بسبح اللي نزل علي دم مع الم بطن وعاد الم البطن يروح ويجي.

قعدت زوجي من النوم وخبرته ابي اروح المستشفى واتفقنا نصلي الصبح ونتوكل ونروح..

رحت جيكوا لي طلع 2_ 3 سم حتى شافتني الدكتورة وجيكت من جديد بحدود الساعة 7 الصبح

ووصل 4 سم، خلصت لي اجراءات الولادة وخلوني قبل بغرفة بالطوارئ ركبوا لي سيلان ولبسوني

ثياب من عندهم وتخطيط للجاهل..

معاي زوجي العزيز واخواتي ثنتينهم وام زوجي وكنت اتألم بس ما ابين الى احد المي وكان يجي

الالم كل 6 دقايق تقريبا وعاد هالالم يالله يطلع الروح،، الساعة 9 نقلوني لغرفة العمليات وقبل لا

ادخل ماانسى نظرة زوجي ودموعه محبوسه بعيونه كان يحاول يخفيهم عني منشان يخفف علي.

دخلت غرفة العمليلت وبصراحة كنت خايفة واصيح هناك ابي لو احد يوقف جنبي مافي الا القابلة

وشايفه شغلها وبحدود 9 ونص وصلت 5 سم واني مو بدنيا ،، ضربوني ابر ثنتين اذكر..

ومن 9 ونص الى 11 ماذكر شيء مو بوعي اصحى بس من الالم ارجع وانام.

11 بدأ الشيء العدل جاني الم فضيع وورى بعض واصرخ من قلب سستر ابي اروح الحمام واهي

تقول لا مابوديش بجيب لش قيصريه واني اصرخ لا ابي الحمام واهي تسأل خروج او بول الله يعزكم

واني اصيح واقول مادري بس وديني الحمام واهي موراضيه والله صوتي راح وانا اصرخ عليها واهي

تصرخ علي هذي ولادة مو حمام،، وخواتي موصيني ما اصارخ اتنفس المفروض وذيك الحزة اي

تنفس ماقدر، كنت اصارخ وبقوة حتى زوجي برى استغرب كل هذا صراخي.

الممرضات يصرخون عصري عصري واني مو عارفة الصراحة اعرف بس اصارخ وجنبي دكتورة قريب

بيطلع الرأس فقدت قوتي كنت شوي وانام قالوا لازم تعصرين لان تعب الجاهل فالدكتورة ماقصرت

ساعدتني وايد فطلبت يخلون بالسيلان شيء الظاهر طلق صناعي فجتني قوة الحمدلله تيسير

من الله سبحانه فطلع الرأس شوي طلع كامل بس ماصاح اخذوه بس وظلوا يضربون ع رجوله ضرب

حتى صاح مسكين جاني شعور غريب وحلو اني مرتاحة والدنيا موشايلتني من الوناسه شوي

وجابوه ع صدري اشوفه يجنن عمري الولد،، اخذوه من الغرفة وخلصت القابلة شغلها..

جاني زوجي ومومصدق الوضع كلش، مصدوم موعارف شيسوي حضني وباسني ونسى يسأل عن

الجاهل حتى،، صوت ماعندي من زود ماصارخت باح كلش صوتي:D

جبت سيد سلمان وعقبال لباقي الله يسهل عليهم ويوصلهم ليومهم، والفال للي ماعنده الله يرزقه بالدرية الصالحة الهم آمين..


معذرة ع الاطاله حبيباتي