سفره بنات مصر الرمضانيه 1-2-3-4-5-6-7-8 (صوت العيون - بنبونه حماده - أسيرة حنانه)

الطبق الثانى ::

دجاج بالخضار:

الدجاجه (1500 جرام)


ربع كيلو بازلاء (طبعا معاه جزر متقطع مكعبات )
2 بطاطس حجم متوسط مقطعه الي مكعبات
بصله كبيره الي حد ما



بهارات (ملح –فلفل اسود – كمون – كزبره- زنجبيل - جوزه الطيب – قرفه مطحونه – حبهان مطحون )
ليمونه واحده



وكيس شواء او كيس حراري اسمه بيختلف يعني من مكان لمكان (بالنسبه لبنوتات مصر الكيس ده تلاقيه في السوبر ماركتس الكبيره او حد بيكون بيجيب حاجات من بره مصر بس سهل يعني تلاقوه في اي سوبر ماركت )

الطريقه :
نقوم بتقطيع البصل رفيع ونضيف اليه الخضروات (طبعا ممكن يتحط فاصوليا خضرا او كوسه مقطعه مكعبات مع الخضار ده بس انا مش بحبه فا كل واحد ورغبته) وتلات ارباع البهارات ونخلطها جميعا





نضع الفرخه والخضار داخل الكيس بحيث يكون الخضار خارج الفرخه ومن حوله ونعصر عليهم الليمون
نغلق الكيس بواسطه الرابطه الخاصه به (دي طبعا بتيجي معاه لما بنشتريه )
وندخله الفرن علي حراره تميل الي الارتفاع لمده ساعه



بعد ما نتاكد من نضج الفراخ نخرجها من الفرن هي المفروض ان الفرخه لونها بيبقي محمر كده بس بصراحه الفرن عندي مش مظبوط
معلش اعذروني بس بجد طلع طعمها تحفه
وده الشكل النهائي

الطبق الثالث:

مكرونه باللحم المفروم

اولا المكونات :

مكرونه مسلوقه - بصله مفرومه - لحمه مفرومه - قرن فلفل احمر مقطع (اختيارى) - طماطم مبشوره انا عملت 4 طامطمايات - طبعا بهارات ملح وفلفل وبهارات و كمان مكعب ماجى






الاول هنحط البصله على النار


نسيبها لغايه لما يبدأ لونه يصفر وننزل عليها الفلفل الاحمر


ننزل عليها الطماطم
نقلب ونسيبها تتسبك


عقبال ما تتسبك نكون عصجنا اللحمه المفرومه
طريقتها:: هناخد بصله ونسيبها تتحمر شويه

ننزل عليها اللحمه المفرومه ونقلب واحنا بنقلبها نحاول نفتت حتت اللحمه الكبيره




نزود عليها المايه ونسيبها تتعصج


وننزل عليها مكعب ماجى

لما تتعصج نحطها على المكرونه ونحط ربع كوبايه مايه ونسيبها تتسبك معاها

معلش الخطوه دى مش مصوره
ننزل عليهم المكرونه

ونقدمها بالعافيه عليكم




ارجو عدم الرد حتى اكتمال الموضوع

الحلويات:

اولا: كيكه البابارواز (أسيرة حنانه)

اولا القادير: 4 بيضات- كيس بيكنج بودر- كيس فانيليا - نص كوبايه زيت او اقل شويه كمان - علبه زبادى - كوبايتين دقيق - نص كوبايه سكر بودره



الطريقه: نضع السوائل فى الخلاط ( الزيت والبيض والسكر عشان بس يدوب والزبادى) ونضرب



نحط الدقيق والبيكنج بودر فى طبق والفانيليا ونقلب
ننزل عليهم السوائل ونقلب بمعلقه خشبيه




نجيب صينيه مناسبه وندهنا زيت وانا هنا معنديش قالب متفرغ من الوسط فا جيبت كوبايه بايركسودهنتها زيت وحطيتها فى وسط الصينيه عشان تؤدى نفس الغرض




نحط الخليط وندخلها الفرن لمده 30 دقيقه على الارف الاوسط منفتحش عليها الفرن خاااااااالص



هنعمل شيره او عسل او شربات ( بكل اللغات) وتكون خفيفه
نخرج الكيكه من الفرن ونسيبها تبرد
وجيب خله بتاعه الاسنان عارفينها؟؟



ونبدا نخرم الكيكه وبعدين نجيب الشيره السخنه جدااااااااااااااااا ونبدأ نسقيها بيها



وقطعها ونقدمها بألف هنا وشفا






ارجو عدم الرد حتى اكتمال الموضوع

دي بقي القطايف بطريقتي البسيطه جدا
هي طبعا عباره عن قطايف
انا اشتريت القطايف جاهزه المره دي مع اني بعملها في البيت بس ده نظرا لضيق الوقت اشترتها جاهزه
وبطعا كلكوا عارفين شكل القطايف فا انا من لخمتي برضه نسيت اصورها هههههههههه
وتشكيله مكسرات (فول سوداني وجوز هند وزبيب ولوز وعليهم معلقتين سكر زي ما هما كده وبكسرهم صغير في المطحنه بس مش يتفرموا ناعم لا يبقوا خشنين بس متكسرين زي كده

وبعدين نحشي القطايف كلها بالمكسرات
وده شكلها بعد ما اتحشت واتقفلت

وبعدين نجهز الشيره او الشربات زي ما بنقول عليها
ودي بتبقي عباره عن كوبين سكر وكوبين ماء
يتحطوا علي النار لحد ما يغلوا وبعدين يتعصر عليهم نص ليمونه
ونسيبهم يغلوا شويه لحد ما قوامه ما يبقي تقيل وننزله من علي النار ونستخدمه
زي كده

وطبعا بعد كده نحمرها في الزيت
ولما تاخد لون ذهبي نحطها في الشيره دقيقه واحده وبعدين نطلعاها منها وتبقي جاهزه
وده شكلها النهائي

هو مش مرتب صحيح بس السرعه النهارده كانت عامله عاميلها معايا
طبعا ممكن يستخم ليها حشوات كتير زي العجوه او القشطه او غيره بس انا بحب استخدم المكسرات جدا
وبالهنا والشفا

الطبق الأخير:

الكنافه بالمكسرات

المقادير

سكر ناعم
لوز
جوز هند
سكر بودره
سمنه











طريقه الشربات

عصير ليمون وماء وسكر للشربات
كوب سكر
كوب ونص ماء
نص عصير ليمونه

نضع السكر والماء على النار يغلو يتقلوا ونعصر نص ليمون ونطفى






نقص الكنافه ونضع عليها معلقه سمنه ومعلقتين سكر بودرة


ونفرد طبقه من الكنافه فى صينيه مدهونه سمنه خفيف
ونحط الحشو


الحشو

نقطع اللوز شرايح ونحط عليه جوز هند وسكر عادى واى مكسرات عندنا

ونحط الحشوه على الكنافه وبعدين نحط فوقها طبقه تنيه من الكنافه

ونحط فى كل حته
حته زبده صغيره عشان الوش يحمر




وتدخل الفرن






ودا كان اخر طبق انهارده واستنونا ان شاء الله فى المائده القادمه


كنتم مع ... مائده بنات مصر

سلام

لا اله الا الله سيدنا محمد رسول الله

اولا يا بنات انا حبيت اقلكم بجد ميرسى على تعبكم معايا وكمان ميرسى لصوت العيون عشان ساعدتنى فى تنسيق الصور ووضع اسامينا عليها بشكل جميل

وعايزه اقلكم اطباقكم كلها تجنن
بس حاسه ان فى طبق صوت كميه البصل عاليه اوى ومش عارفه حساها هتبقى حاميه على المعده

كان ممكن تحشيها رزو وكبد ومكسرات
بس طبعا هايله وتسلم ايدك وبجد نفسى فى البط جدااااااااااااا
ههههههههههههه

ثانيا تسلم ايديكى يا نودا على الاطباق الجميله
وشغلك شغل ستات بيوت يا بت طلعتى جامده

بس انا مش بحب البسله ييييييك

بالنسبه لأطباقى :: احب اقولكم ان اطباقى طبعا تجنن هههههههههههههههه ومفيش كلام عليها ههههههههههههههههه

لا لا بجد جربوا المكرونه بجد طعمه ولذيذه جداااااااااااااااااااا

واللى عنده اى ملاحظات نحن هنا فى اى وقت


كل سنه وانتوا طيبين واستنونا بكره بأذن الرحمن

بنات دا رابط طريقه عمل القطايف فى البيت اتفضلوا

http://www.3roos.com/forums/t279380.html

عدنا من جديد بيوم من شهر رمضان الكريم

انهارده سفرتنا فيها اطباق متنوعه اكثر

ودا رابط سفره امبارح عشان اللى مشفهاش يشوفها واللى معرفش يعرف وتبقى فضيحه :o هههههههههههههههههههههههه

http://www.3roos.com/forums/t376881.html

انهارده معانا
الاطباق الرئيسيه:: دجاج على طريقه صوت العيون - ارز بالكاجو على طريقه أسيرة حنانه - دجاج بطريقه جديده من اعداد أسيرة حنانه - كبده اسكندرانى على طريقه أسيرة حنانه

المقبلات: السمبوسه وطريقه لفها على طريقه أسيرة حنانه

الحلو :: الارز باللبن مع الخلطه السريه بطريقه أسيرة حنانه

السلطات : السلطه الخضرا على طريقه أسيرة حنانه

العصاير:: عصير التمر والقرفه (صوت العيون )- الخشاف المصرى بطريقه بنبونه حماده وبس


الطبق الاول ::

الدجاج على طريقه صوت العيون:






















ارجو عدم الرد حتى اكتمال الموضوع

الطبق الثانى:
الارز بالكاجو :
المقادير : كاجو - فسدق- زبيب - قرفه - حبهان - قرنفل- كارى - بصله مبشوره - كبد (اختيارى) - كوبايتين ارز

الطريقه :

1- نضع الكاجو مع الزيت على النار لمده دقيقه وننزل عليه الفسدق والمسمار والقرفه واالحبهان ونقلب



2- نضع البصل لحد مايدبل وبعدين نحط عليه الزبيب و بودره الكارى


3- نقلب شويه وبعدين ننزل الكبد ونقلب لمده دقيقتين تلاته


4- ننزل الارز


5- ننزل مايه وملح ونسيبها تستوى زى اى رز عادى


6- يقدم وبسسسسس





ارجو عدم الرد حتى اكتمال الموضوع

الطبق الثالث::

طبق سهل ولذيذ جدااااااااا

الدجاج على طريقتى ::

اولا الدجاج هنا دجاجه كانت مسلوقه وحمرناها على النار بس دى كانت امبارح وعشان ناكلها انهارده فا عملتلها الخلطه دى وحولتها من دجاج محمر لدجاج مشوى :)

بكل بساطه صدر فرخه وجيبت كمعلقتين زبادى مع شويه كارى وشويه توابل وعصير نص ليمونه ونقعتها فيها بتاع ساعتين
واخدتها بعد كدا على الشوزايه يا دوب الخلطه نشفت من عليها وسخنت وبقيت فراخ مشويه ايه رأيكم بقى

اختراع مذهل مش كدا هههههههههههههههه

الصور اهى








وبردو ارجو عدم الرد حتى اكتمال المووضوع





الطبق الرابع :
كبده اسكندرانى على طريقه طمطم بصراحه وانا عملتها وطلعت جنااااان ( هو انا اه مكلتش منها ومش بحبها بس دا بشهاده اخويا الزويق بتاع البيت)

المقادير : كبده وبصله وطماطم وقرنين فلفل ونص ليمونه وربع كوبايه مايه

الطريقه:

1- الكبده نقطعها ونحطها على النار مع بصله مبشوره


2 نقلبها زى ماهى لغايه لما لونها يتغير

3 نحطلها مايه لغايه لما تستوى

4 نضرب فى الخلاط البصل والطماطم والفلفل والليمونه بقشرها ( خلى بالكم ريحتها قويه جداااا وبتدوخ )


5 نضيفها على الكبده ونسيبها تشرب مايتها

6 ونقدمها وبسسسسس





ارجو بردو عدم الرد حتى اكتمال الموضوع

السمبوسك:

هاتى شويه لحمه مفرومه وعصجيها وحطيها فىالسمبوسك ولفيها وبس
ودى طريقه لفها كمان بالصور










ارجو بردو عدم الرد لغايه لما اخلص عشان حيلى اتهد واللى هيرد هتبقى ليلته شبه الكبده كدا :cry:

الحلو بقى:: الارز باللبن

المقادير: كيلو لبن حليب - ربع كوبايه رز - كيس ايس كريم فانيلا (سر الخلطه) 4 معالق سكر - ربع كوبايه مايه - 3 معالق نشا - فانيلا

الطريقه::

نحط الرز على النار مع كوبايتين تلاته مايه ونسيبهم يغلو لغايه لما الرز يستوى


نستنى لغايه لما المايه تنشف

ندوب الايس كريم بودر فى الحليب ومعاه السكر والفانيلا


وننزله واحده واحده على الارز

نقلب كويس وبعد 7 دقايق نحط المايهالمدوب فيها النشا ونسيبها 5 دقايق بردو لغايه لما قوامها يتماسك شويه وبعدين اغرفها فى اطباق صغننه وبسسسس



طعمه بجد يجنن والله وريحه الايس كريم تجنننننن

ارجو عدم الرد حتى اكتمال بقيه السفره

المشروبات الحلوووووه::

البلح بالقرفه:: صوت العيون:

اسم المشروب الخشاف
علي فكره مش ناس كتير بتعمله بنفس الطريقه ويارب يعجبكم
بنجيب البلح الناشف



التين المجفف


المشمش المجفف وده نسيت اصوره والزبيب


وبيتقطع كله الي قطع متوسطه الحجم




وبعدين نحط الفواكه المجفهه دي ونحطهم في طبق كبير او دورق ليه غطا ونحط عليهم مايه بكميه العصير اللي احنا عايزين نعمله ونزود عليهم سكر للتحليه بس مش كتير لان الفواكه لما بتقعد بتنزل سكر ونسيبه علي جنب


وبعدين بنجيب قمر الدين ونقطعه قطع صغيره ونزود عليه شويه ماء ونسيبه يغلي علي النار لحد ما يدوب


وبعدين لما يبقي سايل خالص ويبرد شويه نحطه علي الفواكه المجففه ركناها قبل كده مع المايه ونقلبهم كلهم كويس ونحطهم في التلاجه لحد ما ييسقع



وبالهنا والشفا
ملحوظه ممكن استخدام عصير المشمش الطازج بدل قمر الدين وبيدي نفس النتيجه بس طبعا مش بتغليه علي النار



وبكدا نكون خلصنا انهارده

استنونا بكره

سي يو :D

مية مية يا بنات مصر
تسلم ايدكم

نور التقوى;7121462:
ماشاء الله

تسلم ايدكم

ايوه كده مشرفينا دايماااااااااا

:clap::clap::clap:

تسلمي يا حبيبتي ونورتي المائده

شهيدة;7121576:
تسلم ايديكم عالاكلات الحلوة

تسلمي يا جميل علي ردك

يامصعب رضاهم;7122003:
والله الستع يابنات مصرررررررر



خلالالاص بزوج ولدي لمايكبرمصريه



تدرون مرت عم لنامصريه وعن جد طباخه



من قدكم يابنات مصررررر



يصلمووووووووووو

الحمدلله يا جميل ان المائده عجبتك وياستي اي حاجه عايزه تعرفيها من الاكلات المصريه نحن في الخدمه يا جميل
وربنا يخليلك ابنك يارب

praivet;7122728:
تسلم ايديكم يابنات عجبتني يابسبس طريقة الرز بلبن وهجربها باذن الله
ولوطلعت حلوة هدعيلك وهخلي النونو يدعيلك

تسلمي يا قمرايا وان شاء الله تعجبك طريقه بسبس
بسبس طباخه ماهره ربنا يكرمها

ناني فيبس;7122807:
السفرة النهاردة تهبل ومتنوعه اوي ماشاء الله عليكوا وتسلم الايادي

صووووووووووت

عصير البلح يجنن بما اني من عاشقي البلح بأي طريقو وشكل

بس اخر خطوة مافهمتهاش اللى هي نحطة على النار

طيب بعد كدة نشربه على طول يعني المشروب دة سخن ولا بارد ؟؟؟؟؟؟؟؟؟؟؟؟؟؟

نورتي الموضوع يا قمر
وان شاء الله مورو تدخل ترد عليكي بالنسبه لموضوع المشروب بتاعها ده لاني بصراحه عكسك مش بحبه فا مش هعرف افيدك
وكل سنه وانتي طيبه

poosy cat;7124099:
تسلم ايديكم اكل يجنن

تسلمي يا حبيبتي

kitty_kity;7124133:
تسلم ايديكم يابنات
انا عملت امبارح سفرة حلوة اوي بس الصور مش باينه معرفش انزلها ولا ايه
المكونات كانت مكرونة نجرسكو على طريقتي :)
وفراخ مشوية
وسمبوسة بالجبنة والزعتر
وشوربة خضار
وسلطة فتوش
والحلو كان قمر الدين والخشاف اساسي يعني وكيكة بالتمر واللبن طلعت روعه
انزلها فين

بالهنا والشفا يا قمر علي المائده بتاعتك
واترايكي شطوره اهو وعامله حاجات جامده
ولو حابه تنزليها معانا ابعتيلي او لبسبس علي الخاص واحنا يا قمر ان شاء الله ننزلهالك في المائده باسمك طبعا بس عشان التنظيم
لو تلاحظي واحده بس هي اللي بتنزل الموضوع كل يوم عشان تنظمه
ونحن في الانتظار

طمطم;7124235:
مية مية يا بنات مصر
تسلم ايدكم

تسلمي يا حبيبتي
وكل سنه وانتي طيبه

ما شاء الله إيه الحركات الحلوه دي...

يسلموووووووووووو يا مبدعات...

أول طبق ان شاء الله

محشى بزنجان وفلفل : لصوت العيون



















يتبع ان شاء الله

الطبق الثانى ان شاء الله


فته بالخل والتوم : لأسيره حنانه






















يتبع ان شاء الله