ابني معور لي قلبي .. شوروا علي ؟؟

/// ورد الياسمين /// 20-08-2008 11 رد 1,786 مشاهدة
/
السلام عليكم ورحمة الله وبركاته

اخواتي العزيزات

اكتب ذا الموضوع وانا خلاص واصله حدي من ولدي :confused:

خل اقولكم بالبدايه عنه

اسمه عبدالعزيز عمره 7 سنوات ...يتميز عبدالعزيز بالاتي :

- حركي بدرجه كبيره
- لا يسمع الكلام ابدا ابدا لا انا ولا ابوه ولا حد ابد ولا حتى المدرسه
- عنيد
- ما يحب كلش المدرسه ولا المذاكره اذا قلتي له ذاكر كأنج ذابحته
في الصف بس يقعد يتمشى في الفصل ولا يهتم بالمدرسه وطبعا المدرسه من كثر ما تنبه وصلت لمرحلة انها ما تهتم فيه ولا تعبره يعني كأنه مش موجود ...

اثر في مستواه الدراسي الحين هو بروح صف ثاني ابتدائي بس انا في البيت اقعد ادرسه بالغصب وطبعا طول السنه نجره وهواش .. وربي ما صدقت خلصت السنه الماصيه

وخايفه يتكرر هالشيء السنه هذي

- كل ما ابي اسأله عن شيء جوابه الوحيد ما اعرف وما ابي اعرف

مرات يجيني شعور انه مو واثق من نفسه وقدراته بس لما اسمع المدرسات والاهل يقولون لي بالعكس عبدالعزيز اكثر واحد فيه ثقه بنفسه ...

طبعا انا قصدت من ناحيه قدرته بالتعلم بس شكلهم يقصدون بالنواحي الثانيه

عبدالعزيز مشترك بنادي بالسباحه وما شاء الله عليه يمدحونه بس في الدراسه لا

المهم

الحين وصل لمرحلة انه يسب ويستخدم الفاظ ما ادري من وين جابها بس انا ما اعبر بس هو يصر عليها .....

يحب يتحكم ويمشيء الامور على مزاجه يعني متى ما يبي ياكل ياكل متى ما يبي يلعب يلعب ... الخ

احاول اعلمه الانضباط ولا معبر

استخدمت معاه اسلوب الجزاء والعقاب بس بعد ما نفع

حرمته من اشياء يحبها

حبسته في غرفته بعد نفس الشيء ما فيه فايده

الطامة الكبرى الحين اخوه اللي اصغر عنه بدأ يقلد :confused:


::

::

::

اللي عنده حل لمشاكلي اشلون
- اعلمه الانضباط
- اشلون احببه بالمدرسه ويحس بالمسؤليه بالواجب
- احترام الكبير وانه هناك اب وام مسؤلين عنه لابد من الرجوع اليهم
- عدم التحكم بالاخرين وخصوصا اخوه الاصغر
- كيفية زرع شعور الندم عند قيامه بعمل خطأ



على فكره عشان ما اظلمه

تروه حساس وطيب ويحبنا كثير الاحظ هالاشياء من خلال رسوماته

دايما يرسمني وانا وابوه واخوانه ويكتب احبكم ومن هالكلام



وسلامتكم
ا
الله يعينج ويهديه ياختي عليج بالدعاء و الله يهديه ويجعله قرة عينج
B
حبيبتي الموضوع سهل والظاهر عبدالعزيز ملاحظ قوه تاثير تصرفاته عليج فا انتي ابتدي بالعكس

انتي قلتي ان عبدالعزيز يقول ما اعرف ولا ابغي اعرف ومعنى هالكلام ان هو يعرف ان انتي بعد هالكلمه يمكن تجادلينه وفي النهايه راح هو يسوي اللي يبيه

انا افضل اسلوب التطنيش في هالحاله يعني لين قالج ما اعرف ولا ابغي اعرف حاولي تسكتين عنه وما تردين عليه لين يفهم ان انتي مطنشته

وبعدها حاولي تفهمينه ان انتي وهو اصدقاء وان الصديق ما يكلم صديقه بهالاسلوب وانج ما راح تردين عليه لين يعتذر لج على تصرفه


شلون تحسسينه باهميه المدرسه وشلون تخلينه يحل واجباته هذي اسهل

خليه يتحمل شوي مسؤليه يعني مثلا سوي كروت واطبعي عليها حروف وعطيه مثلا كذا حرف وقولي له انه يدورهم ويجيبهم وبعدين لين سوا هالحركه روحي قدام ابوه وقولي له عبدالعزيز سوى كذا وكذا وابتدي معاه بالاشياء الصغيره لين توصلين لين المدرسه

وعلى فكره وين ابوه من هالتصرفات لان الاب له دور كبير يعني خلي الاب يحاول يكلمه ويفهمه ان هالتصرفات ما راح تخليه يكبر والناس تحبه ويكون رجال صح لان الرجال له تصرفات معينه وخليه يرسم صوره الرجال الصحيحه في راسه

مساله انه يفهم موضوع من مسؤول عنه هذي لازم مايفهمها هذي لازم يحس فيها وطبعا عن طريق ابوه مب انتي ولازم ابوه يقوله وبتهديد ان انتي زوجته قبل لا تكونين امه وان زوجج ما يرضى حد يكلمج بهالاسلوب

عدم التحكم بالاخرين انا افضل انج تفصلين اغراض الاخوان عن بعض وتفهمينهم ان محد له خص في اغراض الثاني الا بعد ما يستاذن واذا حد تطاول على غرض مب له تاخذين غرض من الطرف الثاني وتحاولين تخشينه لمده اسبوع وبعدها ترجعينه وطبعا تفهمينهم بالحركه انها عقاب


الندم لازم يحس انه سوا غلط يعني اذا صرخ ولا ما حل الواجب ما تروحين وتكلمينه وكل ما حاول يجي يكلمج تقولين له بطريقه من غير صراخ انج ما راح تردين على اسئلته لانه غلط من شوي في ________ علشان يفهم ان الغلطه ما تنسى ولازم الواحد يعتذر


والله يخليج لهم ويخليهم لج ويصلحهم انشاء وحبيبتي انا افضل وجود الاب في هالامور وابتعدي عن العصبيه والضرب لانه راح يقلدكم
ز
شوفي لو بنحط احتمالات لحالة ولدج ممكن تكون:
1- اكتسب هاذي الصفات وراثيا يمكن ابوه او انتي او اي حد من العايلة
2- حركته الزايده يمكن بسبب تغذيته بالذات السكريات لانها تعطيه طاقه فحاولي تجنبين السكريات والحلويات
3-ممكن ولدج يعاني من حاله نفسية من كثر ماتعطينه اوامر فمل من هالموضوع وصار يتمرد فبالتالي يحتاج الى طريقة اخرى للتوجية
4- طريقة الثواب والعقاب يبيلها استمرار ومداومه مو مره ومرتين واثبتت الدراسات العلمية ان طريقة الثواب هي اثبت واحسن من العقاب في تغيير سلوك الطفل.
5-يمكن طفلج يحتاج لتعامل بطريقة اكبر من سنه بشوي يعني لا تكلمينه على اساس انه طفل يعني حسسيه انه كبير كانج تكلمين ابوه حتى بنبرة الصوت والطريقة
6- اخيرا انصحج اذا تحسين الحاله متأزمه انج تستشيرين اخصائية اطفال متخصصه في هذا المجال وتعرضين طفلج عليها لانها هي اللي بتقدر اتساعدج في هذا الموضوع
م
أختي العزيزة
الله يكون معاش
الأطفال يبغي ليهم طولة بال
أعتقد ان انت لازم تعرضين المشكلة على إخصائي أطفال وهو أكيد بيساعدش
وأكيد المشكلة يبغي ليها طولة بال وان أنتين تضغطين على عاطفة الأمومة حتى تتغلبين على هذه المشكلة.
B
ممكن يكون عنده فرط حركة (زيادة النشاط)تشتت الانتباه

اعرضيه على اخصائي سلوك وهو يقرر لكم الافضل
/
ام عزوز الحلو;6990823:
الله يعينج ويهديه ياختي عليج بالدعاء و الله يهديه ويجعله قرة عينج


اللهم امين

تسلمين اختي اثلج صدري دعاءك
م
الله يهديه الاخوات ماقصروا انشاء الله تستفيدي من افكارهم
ز
السلام عليكم
اختي موجة البحر في البداية بقول لج الله يعينج ويهدي لج وليدج
في شئ انا حااابه ابينه لج بالبدايه ان الاولاد بشكل عام تربيتهم صعبه فالضغط النفسي اللي انت فيه هو اللي مأثر عليج في تعاملج مع ولدج انصحج بالبدايه انج اتكوونين بااارده في التعامل معه من ناحية الصوت او حتى التعامل وكثر ما تكونين انتي حاره راح هو يتعامل معاج بنفس طريقتج وكثر ما يهدا صوتج وانفعالاتج راح يتعلم هالشئ منج انا ما الومج من ناحية الدراسه لكن طولي باالج شوي عليه انا بقول لج كذا شغله حاولي تفستفيدين منها
1- بعض الحلويات والعصائر تخي الطفل ( هايبر اكتيف) يعني كثير الحركه حاولي ادورين بالنت عن الاصناف اللي فيها المواد اللي اتخلي الطفل هايبر اكتيف
2- حسسيه بلهميه الدراسه بطريقه غير مباشره مثلا لو كنتي اتشوفيني فيلم اجنبي بيني قدراتج في معرفه اللغه الانجليزيه اقري كتاب بصوت عالي كانج اتحرينه اني اعرف اقرى وانت ما تعرف اذا شفتيه معاه لعبه قول ليه اقرى التعليمات اللي عليها علشان يقول ما اعرف وانتي اتبيني له ان اللي يدرس يعرف وانج ما كنتي تعرفين وبعد الدراسه عرفتي اذا يبي ياكل شئ قوليه شوف تاريخ الانتهاء ومن هالاشياء مره من المرات كلمي ابوه بالانجليزي قول ليه حنا شقلنا راح يحس بالضعف وراح يعرف قيمة الدراسه
3- استخدمه لوحه الثواب والعقاب وهي عباره عن لوحة ورق حطي عليها صور بات مان وسوبر مان وسبيايدر مان والشخصيات اللي يحبها واقسميها نصين نص له ونص لاخوه وحطي صورة كل واحد في جانب وكل تصرف يسويه غلط ما يعجبج حطي خطا وكل تصرف يرضيج حطي صح وقولي حق كل واحد يجمع كم صح عنده واللي يجمع قدر معين له شئ يحبه وهكذا
4- في وقت الدراسه استخدمي معاه الدراسه باللعب مو بالاجبار لا تفتحين الشنطه وتعال اكتب وصراخ وكلام علميه بطريقه ثانيه بما انه يحب يرسم ويمسك الالوان جيبي له لوحه ( وايت بورد) وعلقيها على باب غرفته وامليه الكلمات اللي لازم يحفظها حطي السوره القرآنيه في مسجل وردديها واسمعيها هو طبيعي راح يحفظها لانه دايم يسمعها ونفس الشئ اذا كان هناك في قصيده ولا انشوده لا اتحاولين تمسكينه وتقعدينه خليه حر الحركه
5- حاولي اتفرغين الطاقه اللي فيه يعني اي شئ انتي تبينه منه لا اتسوينه بالطريقه المعروفه يذاكر هو قاعد ياكل وهو قاعد لا خلي اكل بحركه ومسابقه ومذاكرته بنفس الشئ
6- كوني صداقه معاه اعرفي شنو بخاطره وشنو يضايقه اللي يخليه عنيد معاج واتبعي اسلوب القصص قبل النوم لاي امر انتي تبين اتوصلينه له ( كان في ولد ما يسمع كلام امه......................الخ)
(كان في ولد مسافر مع امه وابوه وضاع منهم وما قدر يرجع للبيت لانه ما يعرف يقرى العنوان ولا يعرف الارقام علشان يتصل عليهم .........الخ) ومن هالنوعيه من القصص
الموضوع متعب شوي بس يبيله مداومه وحرص منج ولاتنسين الدعاء له بهالهدايه والله يخليه لج ويهديه
/
Bint -qatar 2008


صدقيني اختي انا من النوع الهادي جدا ومو من السهل اتنرفز او اعصب وخاصة حزت تعاملي مع عيالي

وبعد نفس الشيء ابوه ..يعني كلنا هادييين

وهالمشكله مع عبدالعزيز من يوم هو صغير وانا احاول اعدل سلوكه استشرت اخصائات وطبقت نصايحهم

بس اكثر شيء يلتزم يوم واحد وبعدها خلاص يزهق ويرد لطبعه


ابوه يساعدني خاصة اذا قلت له عن افعال عبدالعزيز ويكلمه ويحاول معاه بس بعد ما فيه فايده

استخدم كثير من انواع الثواب لاني قلت مع شخصيته العناديه ما ينفع اسلوب العقاب بس بعد

اعتقد انه لاني استخدمت اسلوب الثواب واايد وياه اصار بهالطريقه

وما صار فعال وياه

بس تدرين ردج حوا كثير من الافكار اللي استخدمها وياه

بسويها وان شاء اللله تنفع وياه


وجزاج الله الف خير


كل الود
/
والله يخليج لهم ويخليهم لج ويصلحهم انشاء


اللهم امين يا رب

تسلمين حبيبتي احتاج هالدعوه جزاج الله الف خير
/
زهرة اللافندر

منوره الموضوع اختي بالنسبه للاحتمالات

اكتسب هاذي الصفات وراثيا يمكن ابوه او انتي او اي حد من العايلة


تقصدين الحركه الزايده

ايه كنا نحب نلعب وااايد ونتحرك كثير بس مو في كل الاوقات كنت انا منظمه وفي صفي هاديه ومجتهده بس هو فديته العكس تماما

حركته الزايده يمكن بسبب تغذيته بالذات السكريات لانها تعطيه طاقه فحاولي تجنبين السكريات والحلويات


صحيح هالاحتمال وبطلته

ممكن ولدج يعاني من حاله نفسية من كثر ماتعطينه اوامر فمل من هالموضوع وصار يتمرد فبالتالي يحتاج الى طريقة اخرى للتوجية


صدقيني هو كذا باوامر او بدونها من صغره يحب يسوي اللي يبيه

جيته باللين ما نفع شفته يستغل هالشيء في انه يزيد

وتريني مو من النوع العصبي او اني اعطي اوامر ابدا بهدوء بس هالفتره صرت افقد اعصابي بسوله واضربه مرات

كثير ضاغط على اعصابي هالولد من يوم وهو صغير بس يختبر قوة اعصابي لين فقدتها

طريقة الثواب والعقاب يبيلها استمرار ومداومه مو مره ومرتين واثبتت الدراسات العلمية ان طريقة الثواب هي اثبت واحسن من العقاب في تغيير سلوك الطفل


استخدمتها ولسنين من عمره سنتين وانا استخدمها ..اعتقد هي اللي خربته لانه الحين ما صار يأثر فيه اي هديه او اي كلمه حلوه ...متشبع الولد

يمكن طفلج يحتاج لتعامل بطريقة اكبر من سنه بشوي يعني لا تكلمينه على اساس انه طفل يعني حسسيه انه كبير كانج تكلمين ابوه حتى بنبرة الصوت والطريقة


عاملته كذا واخليه يدير باله على اخوه وما شاء الله عليه وربي انه قد المسئوليه هو مستعد يتحمل اي مسئليه الا مسئولية نفسه والواجبات اللي عليه

اخيرا انصحج اذا تحسين الحاله متأزمه انج تستشيرين اخصائية اطفال متخصصه في هذا المجال وتعرضين طفلج عليها لانها هي اللي بتقدر اتساعدج في هذا الموضوع


سألت اخصائيات كثير في السنوات الماضيه وعطوني نصايح

بس هالسنه صار اوفر وبسوي بنصيحج بس قلت قبل بشوف اراء الخوات هنيه لعل وعسى الاقي الفايده



كل الشكر عزيزتي

وجزاج الله الف خير
X