بتذبحني ...استغفر الله

س

سحر المعاني

عروس جديدة

13-08-2008 | 02:45 AM

السلام عليكم

كيفكم يابنات

انا عندي مشكلة ومو عارفة اتصرف فيها .. وقلت اكيد بلقى الحل عندكم بعد الله سبحانه وتعالى

المهم ماابي اطول عليكم

المشكلة هي زوجة اخوي العلة .. قالبه حياتنا جحيم وتسبب لنا مشاكل كل يوم

بعطيكم كم مثال وانتو احكمو

انا وخواتي ماودنا نظلم احد لأن عارفين ان الظلم ظلمات يوم القيامة

يعني هي ساكنة معانا في بيت بس عندها جناح خاص فيها وحتى مانمر عند جناحها بس تجنب للمشاكل

والمشكلة الاكبر ان الوالده في صفها وهي تدري انها غلط بس تقول ان البنت في بيتنا ولازم نحترمها ومانتسبب معاها في مشاكل

يعني هي ماتنزل تحت الا اذا تبي تاكل والمصيبه ان امي هي اللي تجهز لها الاكل وامي اللي تنظف وراها

حتى كاس الماي امي تجيبه لها

اذا كلمنا امي توقف في صفها ..

وغير كذا من تشوف الخدامه تنظف شئ في اغراضنا تسحبها معاها وماتخليها تنزل الا اذا خلصنا شغلنا بنفسنا

وكل الصحون وادوات المطبخ تاخذهم عندها وماترجعهم

حتى قبل كم ليلة كان نفسنا في توست محمر بس الاخت شالتها معاها

وكذااااااااااااااااااااااااااااااااابه بشكل غير طبيعي تتكلم عنا عند الناس انا حنا بخيلين ونعذبها ونخليها تطبخ وتكرف في البيت

اقسم بالله العزيز سمعتها تتكلم مع صاحبتها بأذني .. كنت مارة في الصالة وهي تتكلم وانا من الكلام اللي سمعته انصدمت يعني لهدرجه الوقاحه اللي فيها ..

وغير كذا من تصير عندنا مناسبة في البيت على طول في اليوم الثاني تجيب صاحباتها في البيت ويعني تعرف ان البيت بيت عيلة

وكل يوم والثاني تعزم لها ناس بدون ماتعطينا خبر .. يعني تسببت بمشاكل مع خطيبي وخطيب اختي .. قولو كبف؟

لأن المجلس متعوده اجلس فيه انا وخطيبي .. فهي تعزم اهلها في المجلس فأضطر اقول لخطيبي اليوم لاتجي .. وتصير مشكلة لأن هو يوم الخميس يجي لي

وماتحلى عزايمها الا في المجلس ايام جيت خطيبي او خطيب اختي

وطبعا الاخ العزيز معاها في كل شئ .. لدرجة مرة كانت اختي محتاجة تروح بيت خالتي والسواق كان مع الوالده في مشوار فكلمت الوالد يوديها بس اعتذر لأن توه واصل من لندن فقال لأخي العزيز المحترم جدا وصل اختك معاك وهو كان طالع ومعاه زوجته وصديقتها قال للوالد بكل وقاحه خلي خطيبها يوصلها ..

والله والله حياتنا جحيم لدرجه انها تنكد علينا فرحتنا .. في حفلة خطوبة اختي كانت الحفلة عائلية وقامت المحترمه خذت المعازيم لجناحها جرجرتهم وراها وصار المكان فاضي .. تخيلو الوضع؟؟

تتوقعون يعني كيف كان شكلنا وشكل اختي؟؟

ومانقدر نكلمها لأن الكل واقف في صفها ..

وفي مره اخوي ضرب اختي لين ماصار وجهها ازرق من الضرب لأن قالت للخدامة تشيل اغراضه والحين هو وزوجته كل دقيقة والثانية ياخذون الخدامة

والصراحة هي انسانة وقحه .. كانت لابسة ملابس اعوذ بالله قصير لين الركبة وتتمشى قدام اخوي اللي عمرة 16 سنه بدون غطا ولاشي حتى مفاتنها طالعه والولد قال لنا قولو لها تتغطى عني تراني استحي اشوف كذا .. والادهى والامر تتمشى قدام الوالد بلبس اعوذ بالله

وكلمناها بس تقول مالكم دخل وانا ماكلمتكم

وامي تقول مالكم دخل في البنت انتو بناتي ولي كلمة عليكم بس هي مالي كلمة عليها

ياريت تنصحونا .. انا وخواتي مانحب نظلم احد .. او نفتري او نغتاب بس نفسيتنا زفت حتى مع ازواجنا وصرنا نخاف تصير مشاكل في المستقبل مع حمولتنا

ومع كل صلاة ندعي الله يهديها .. ونرتاح من المشاكل لو يوم واحد

جزاكن الله خير ساعدونا ... وريحو بالنا

يعطيكن العافية

ب

بحرينية أصل

عروس ماسية

13-08-2008 | 03:01 AM

هلا اختي

انا في المشاكل هذي احط اللوم على الزوج

لانه يشوف الغلط يطلع من زوجته وهو ساكت عنها وعاطنها الحرية في كل شي بدون مايكلمها

من جذي هي ماخذه راحتها

لو كان اخوج حازم معاها ماكان هالشي صار

وانتو ماعليكم منها خلكم في حالكم وعيشو حياتكم بدون ماتضايقون نفسكم بالاشياء اللي اتسويها

موفقة

e

elle8

عروس نشيطة

13-08-2008 | 03:04 AM

الله يهديهااااااا

د

دلوعةحناني

مشرفة سابقة

13-08-2008 | 03:12 AM

هذه نقمه والعياذ بالله
حبيبتي انا مش قلقه لا عليك ولا على اختك لان مسيركم بتستقرون في بيوتكم وترتاحون من هالنسره
بس المصيبه امك المسكينه ؟؟
كيف بتكمل معها بدونكم؟
واخاف هالدلع الزايد يخليها تتمرد اكثر واكثر وتضايقها وهي المسكينه تسكت بسبب حبها لاخوك.
شوفي الغاليه الخلل الرئيسي بأخوك هو بالاساس ما يحترمكم كأخواتك وجالس يأخذ من فمكم ويعطيها
وهذا اكبر غلط وبنفس الوقت مش جديد او غريب.
بس المختلف هو موقف امك وابوك السلبي معها ومحدن وقفها لا هي ولا اخوك عند حدهم.
فأنصحك مدام الحال راضي امك وابوك وهم الاساس انتي لا تتدخلي فيها بنفس الوقت سوي الي تبيه
ولا تخافي منها مثلا يوم الخميس خلي خطيبك يجي بدري عن موعده ويجلس بالمجلس واسبقيها
او قولي لها قبل ب3 ايام هالاسبوع خطيبي ماراح يجي علشان ما تتعب نفسها وتعزم الناس وتحاول تغثك
وخليه يجي واستانسي يا قلبي انتي واختك نفس الشي.
بالنسبه للخدامه اذا اخوك اعترض قولي له جيب لك خدامه يا اخوي لان هاذي خدامتنا وحنا محتاجينها.
يعني لا تسكتين على كل شي قاوميها علشان لا يكبر رأسها اكبر وينفجر عليكم بالاخير ويسبب مصيبه.
بالنسبه للبسها ربي هو الي بيحرقها يوم القيامه وانتي سويتي الي عليك ونصحتيها وبالنسبه لاخوك انصحيه ان يغض البصر ولا يناظرها ويتجنبها افضل وابوك تراه بحسبة ابوها وهي حره معه مدامه ما اعترض ولا قال شي..
اصبري يا حبيبتي لان كل شي وله نهايه ولا تتضايقي وتنكدي على نفسك وخطيبك هي فتره وتعدي وتروحي تعيشي ببيتك معززه مكرمه......
تحياتي

ز

زينة أبيها

عروس جديدة

13-08-2008 | 03:19 AM

اعوذ بالله من شرها

بس اذا شفتوها سوو حالكم ماشفتوها يعني كأنها مو موجوده معاكم في البيت .. يعني من تشوفوها اضحكو وبينو انكم مرتاحين ومو هامتنكم اصلا ,, اذا قال يبي الخدامة قولو ان شاء الله على امرك بس علشان لاتبينون انكم مضايقين علشان تستسلم وتفقد الامل
الله يفرج كربتكم

m

moneta

عروس رائعة

13-08-2008 | 03:29 AM

حبيبتي انا شايفه انه اخوكي الله يهديه لازم يوقفها انتوا اتكلموا معاه بهدوء مو بعصبيه وفهموا مثلا انه مايصير تلبس ها الملابس قدام اخوك لانه مو صغير وتجزى اثم ومن ها الكلام يعني اقناع مو خناق
وامك واضح انها طيبه ربي يسعدها وهي ماودها تزعل ولدها وانا كمان ما انصح امك تعاملها بسوء لانه راح تكون بوجهها بالاخر لانها تعتبر ببيتها
انتم عاد ولا يهمكم فيها لو خطيبك جاي الخميس خليه يجي هي تاخد ضيوفها بجناحها لكن لاتسوون مشاكل بسببها ولا تهتمون فيها لو محترين منها اكبتوا ولا تبينوا قدامها عشان لا تستانس فيكم

ومانقول غير ربي يهديها ويهدي اخوكي معاها

&

ღღ دريـــم ويــب ღღ

عروس ركن النساء والحمل والولادة

13-08-2008 | 08:30 AM

اخوج وينه ؟؟ ما يردعها وويوقفها عند حدها ؟؟ لهل الدرجة باعكم علشانها ...

لازم تقعدون مع اخوج يوم وتفهمونه على اللي قاعد يصير ؟؟

والله يكون بعونكم ياارب

م

منبع الروح

عروس مشاركة

13-08-2008 | 08:34 AM

لاحول ولاقوة الا بالله

اللوم الاكبر على اخوج

الله يهديها ان شاءالله

ا

الحيرانه_88

عروس مشاركة

13-08-2008 | 09:55 AM

يا مكثر مشاكل حريم الاخوان.. والمصيبه انه ساس البلا يكون هو اخوج اللي من لحمج ودمج.. هيه مهما يكون تضل غريبه عليكم.. والمثل يقول يا غريب كن اديب..

سبحان الله ما عرف ليش الناس جذيه.. الله يهديها.. هذي فيها نقص صدقيني ومريضه نفسيا.. لا تحرقون اعصابكم معها وداروا على امكم المسكينه..

تراه بالاخير بالاخير هذا بيتكم انتو مب هيه.. تصرفوا معاها بطريقه تعرف قيمتها عدل.. وتعرف انه انتوا احسن عنها ومترفعين عن هالامور التافهه..

شوفي انتو لو هاوشتوها بتهاوشكم وبتصير مشاكل مالها اول ولا تالي.. احقروها ولا تخبرونها بكل شي..

مثلا اذا يا خطيبج لا تخبرونها عشان ما تخرب الدنيا.. وحسسوها انه مالها اي قيمه في البيت.. انتو صيروا يد وحده وتعاونوا عليها..

بتموت من الحره..

ودام اخوكم باعكم عشان مرته.. بيعوه

والله يهديهم كلهم

u

umjana79

عروس ركن قضايا و حلول

13-08-2008 | 10:22 AM

الغاليه راح اكون حياديه معاج جداً..

1- كلام امك صحيح انتو مالكم دخل فيها .. وخلوها على راحتها ... والغرض الي ناقصكم ومحتاجينه خلو ازواجكم يجيبونه لكم .

2- تكلمين أخوج بخصوص لبس زوجته جدام .. أخوج الي عمره 16 سنه .. وأبوك .. وكلميه بطريقه وديه ونصيحه .. ( سمع كان بها ما سمع هو براحته ) وأثم زوجته هو يشيله ..

3- انتو ان شاء الله بتتزوجون .. وبتروحون .. كل الي عليج تسوينه ..ان تهتمين بوالدتج .. اختي وتتحملون فيها .. وان شاء الله اخوج راح يطلع .. ببيت بروحه..

4- مثل ما دعيتي لها بالهدايه حاولي ان تكسبيها واذا فشلتي خلاص تجنبيها كثر ما تقدرين..

5- اقترحي على اخوج احضار خادمه لزوجته او احضار خادمه ثانيه للبيت ... اذا كان البيت عود..

والله يساعدكم .. اختي

ام جنى

د

دلوعه بحرينيه

عروس مشاركة

13-08-2008 | 12:38 PM

بيييي..الله يساعدكم عليها....
بس يقولون الحقران يقطع المصرانفأنتو حقروها ولا تعطونها اي اهميه.....حاولو تتفادونها

وإذا جا خطيبج بيتكم ... قعدي معاه في اي محل....مو شرط المجلس....تجنبا للزعل والمشاكل بينج وبينه بسبب المحترمه مرة اخوج

آ

آخر العنقوود

عروس ماسية

13-08-2008 | 12:46 PM

لاحول ولاقوة الا بالله العلي العظيم

اخوج الله يهديه كيف راضي بهالوضع ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ه

هبات البخور

عروس متألقة

13-08-2008 | 01:05 PM

شكلها وحده محترة واايد منكم ههههههههههه مسكينة الله يشفيها
اقولج خلي خطيبج انتي واختج يجون باوقات مختلفة كل اسبوع يعني مثلا الثلاثاء المغرب الجمعة الصبح ويصلي بالمسجد اللي قريب من بيتكم يعني لا تثبتون المواعيد ماادري ليش احس انها بتقفل المجلس والا بتسوي صياانه هههههههههههههه واهم شئ خطيبج وحطيب اختج يجون ورا بعض في نفس اليوم على اساس يطلع واحد ويدخل وراه الثاني يعني لا تعطونها فرصة وممكن اذا المجلس مشغووول دخلي خطيبج الصالة واهي بالطقاق مشكلتها تنحشر في المجلس ويا ضيوفهاههههههههههاااي اهم شئ انتي واختج تستانسون في هالفترة الحلوة فترة الخطوبة ولا تخلون وحده ما تسوى تخرب عليكم فرحتكم

سبحانك اللهم وبحمدك اشهد ان لا اله الا انت استغفرك واتوب اليك

i

israe

عروس ماسية

13-08-2008 | 01:18 PM

حبيبتي هونيها تهون انا من رايي دام امك مو معصبة منها انت في يد حل وهو انك تحاولي تكسبيها وتتعمالي معها على انها اخت لك يمكن هي تضن انك ما تحبيها علشان شدي تتعامل معكم شدي
انت حاولي تتقربي منها وبعد كسب مودتها انصحيها باللين

س

سحر المعاني

عروس جديدة

13-08-2008 | 05:30 PM

يعطيكن العافية خواتي

بس في نقطة ماقلتها لكم .. انها تسوي روحها قدام اخوي الزوجة الصالحة يعني تقول له انها اللي تطبخ وان هي اللي تخدم امي وطبعا الاخ المحترم حتى يتمادى على الوالده حسبي الله على كل ظالم

ومطلعتنا قدامه وحووووش حتى هو مايسلم علينا ومايطيق يطالع في وجههنا ويعامل الخدامة احسن منا والله الشاهد على كلامي ..

انا وخواتي مانكلمها ابدا بس من داخل مقهورين ..

بنجرب نصايحكن وبخبركم بالنتايج ..

Q

Qtr Girl

عروس ماسية

13-08-2008 | 06:49 PM

الخيل من خيالها

ر

رحيل الأحزان

عروس مبدعة

13-08-2008 | 07:31 PM

شوفي حبيبتي افضل شي تتركونها وتهملونها نهائيا انت واختك ولا كأنها موجودة .........
والعيب مو في بنت الناس العيب في اخوك اللي ماشي وراها ويصدقها في كل صغيرة وكبيرة ....
وانتي ان شاء الله ربي بيوفقك انت واختك في زواجكم وبترحوا وتتركوا لها البيت مع انها ما تستاهل .... وانتبهوا لأخوك الصغير المشكلة انه مراهق والله يستر عليه بس .....
والله يعينه ويعين الوالدة المسكينه .... الله يفرج لها يارب ...

ا

احسا س انثي

عروس ذهبية

13-08-2008 | 07:58 PM

لاحول ولاقوة الا بالله
اللوم علي اخوك ليش ما يهاوشها
اللي قاعده تسويه غلط وما يرضي رب العالمين
والله يهديها ويصبركم عليها

ت

تسنيم444

عروس مبدعة

13-08-2008 | 08:17 PM

لا حول ولا قوة الا بالله الله يفرج كربكم ويصلح حالكم ويهديهم عليكم ان شاء الله

ا

ام ايّومي

عروس مشاركة

13-08-2008 | 09:03 PM

Qtr Girl;6922765:
الخيل من خيالها

(y)(y)(y)