أسعد الله مساكم عرايسنا الحلوين بالخير و السرور...
البسكويت اللي سويته هو بسكويت رقيق كثير و هش و خفيف مثل ما قلت في العنوان :)
و الحلو في هذا البسكويت، إنه بمجرد ما نطلعه من الفرن نقدر نشكله و خلال ثواني يبرد و ياخذ الشكل المطلوب... و الشكل المتعارف عليه هو شكل حجارة القرميد، اللي تجي مقوسة و لونها أحمر و عشان كذا أخذت اسمها Tuiles، يعني قرميد بالفرنسي...
لكن أنا سويت منه أصابع مثل الفلوت، و شي خليته أقراص مثل ما هو...
و الحين تعالوا نشوف المقادير مع الطريقة...
بسم الله نبدأ...
أول شي نحمي الفرن بحرارة 300 فهرنهايت أو 150 مئوية...
نجهز صواني البسكويت، أنا استخدمت التيفال عشان أضمن إنه ما يلصق فيها...
و نجهز ملاعق خشبية، راح نستخدمها في لف البسكويت...
و ملعقة بلاستيك أو سيليكون مسطحة عشان نشيل فيها البسكويت من الصينية، انا جربت وحدة ستينستيل و لصق البسكويت فيها...
و نجهز بعد نشابة العجين عشان نشكل عليها البسكويت، أنا اسخدمت وحدة صغيرة و وحدة كبيرة...
المقادير:
أنا هنا سويت مقدارين لأن المقدار الواحد يسوي كمية قليلة، فاللي تبي تجرب بالبداية، ممكن تسوي نصف المقدار فقط...
بياض بيضتين
نص كوب سكر
رشة فانيلا
4 ملاعق كبيرة طحين منخول
60 غ = 6 ملاعق كبيرة زبدة، تذوب و تترك لتبرد في حرارة الغرفة
و للزينة بنحتاج:
ربع كوب كاكاو Semi-sweet، أنا استخدمت هيرشيز الدمعات... نسيح الكاكاو في المايكروييف أو حمام مائي،
بعدين نحطه في قمع ورقي، أو كيس الكريمة و نستخدم أصغر فتحة دائرية...
جوز هند شرايح رفيعة
شرايح لوز
نجي للطريقة:
في و عاء عميق، نخلط بياض البيض لحد ما ينفش و يصير متماسك...
نضيف السكر بالتدريج، مع الخلط بعد كل إضافة عشان نتأكد إن السكر ذاب مع البياض... نواصل الخفق لحد ما يصير البياض متماسك مثل الكريمة...
بعدين نضيف الطحين و الفانيلا و الزبدة، و نحرك بملعقة مسطحة أو خشبية... و يكون التحريك من فوق لتحت عشان ما يهبط البيض...
الحين ناخذ مقدار ملعقة صغيرة من الخليط و نحطها بالصينية، و نبدأ نسطحها بظهر الملعقة بشكل دائري لحد ما يصير عندنا قرص بحجم راحة اليد... و نحط الأقراص بعيد عن بعض شوي... أنا تقريباً حطيت كل 3 أقراص في صينية، و كان عندي 3 صواني، جهزتهم و أدخلهم وحدة ورا الثانية...
و طبعاً كل ما سطحتوها أكثر، كل ما صارت مقرمشة أكثر...
شوفوا الصورة، القطعة اللي ورا هذي قبل ما أسطحها، و الثانية بعد ما سطحتها...
الحين يجي دور الزينة بالكاكاو... هنا سويت دوامات :)
و هنا خطوط عشوائية...
و هنا زينتها بشرايح اللوز...
و هنا بجوز الهند...
و في شي خليته بدون زينة، لأني بسويه ملفوف مثل الأصابع، و إذا كان عليه كاكاو أو مكسرات ما أقدر ألفه و بيخترب الشكل...
الحين ندخل الصينية الفرن في الرف الأوسط، و لمدة ما بين 5 إلى 9 دقايق حسب الفرن... كل وحدة تراقب الصينية، أول ما تحمر الأقراص نطلعها على طول...
و هنا أول ما طلعتهم من الفرن...
الحين نجي للحظة الحاسمة، أول ما نطلع الصينية من الفرن نشتغل على طول، لأن البسكويت يبرد خلال ثواني و بعدين ما نقدر نشكله...
نرفع الأقراص بالملعقة المسطحة و نحطها على النشابة عشان ناخذ شكل القرميد المقوس... و نضغط على الأطراف لثواني بسيطة عشان تاخذ الشكل، بعدين نشيلها...
و عشان نسوي الأصابع الملفوفة، نستخدم عود الملعقة الخشبية و نلف عليه الأقراص بسرعة و نفس الشي نضغط عليها بخفة لحد ما تاخذ الشكل، بعدين نسحبها بحذر عشان ما تتكسر...
طبعاً البسكويت بيكون حار و بيلسعكم شوي، لكن الله يعينكم تتحملون عشان يضبط معاكم... و هذا الشكل النهائي...
و هذي علبة عبيتها و أخذتها معاي بيت عمي :)
ملاحظة:
بإمكانكم تشكيل البسكويت مثل الأقماع، و تحشونها آيسكريم أو كريمة مع فواكه... لكن هنا لازم تسوون الأقراص بحجم أكبر شوي...
و عشان يحتفظ البسكويت بقرمشته، يفضل الإحتفاظ فيه في علبة محكمة الإغلاق عشان ما يدخله الهوا...
و عليكم بألف عافية مقدماً (f)
