ولدي والروضه

و الله ما عندي فكرة ان شاء الله اللي يعرف ما يقصر

يالله بنات بلييييز ساعدوني محتاجه الرد ظروري

دخليه السنة الجاي عشان يصير سنتين روضة بسس
حرام صغير على الشقاا وقعدة الصبح

يعني الحين اذا سجلته يصير 3 سنوات رووضه ؟؟ لان هو يكسب سنه يدخل مع 2005

إيوة ثلاث سنين عزيزتي

ولدي كمل ال3 سنوات ونص الحين وبيدش الروضة بداية شهر 9!!

انا ما فهمت قصدج زين؟
يعني ولدج بيكمل 3 سنوات وتبين تدخلينه روضة والا كيف؟

انا بعد ولدي مواليد 18 -1-2004 ويدخل ويا سنه 2003 وعادي خليه يدرس 3سنوات شيصير عادي انا ولدي دخلته الروضه وعمره 2و9شهور وكان اصغر من اليهال كلهم ...

مرحبا خيتي
انا من رايي تخلينه هالسنة على اساس تصير سنوات دراسته بالروضة سنتين ,وعلى قولة اختي جيمي توه صغير على الشقا ولاااااااااحق ..اذا تشوفينه عنده استعداد وعقله شوي تحسينه كبر اللي بيدخلون هالسنة دخليييه انا ولدي انشالله اذا الله بلغني وكبر راح ادخله الروضة مبكر لانها من جد تدرب عقليه الطفل وتنشطها مبكر وانا شفت هالشي مع اختي الصغيرة...
تحياتي لك
bnt fahed

صراحة انا ما اشجع يدخل الولد صغير يعني مناسب جدا انه يدخل 4 KG1 في امريكا يدخلون الولد 4 سنين كي جي 1 (روضة اولى) بيكون الولد متهيئ وعمرة مناسب للاستيعاب وكمان ايديه مناسبين لمسك القلم وعضامه قوية لتحمل تعب الروضة ..انا بالنسبة الي عندي ولدين الاول عمره 4 سنين وبدخله روضة اولى في شهر 9 احسه مناسب جدا وهو متقبل الفكرة وجاهز للمشوار ... والثاني في 18/1 بيكمل ال3 سنين وراح اخليه للسنة الجاي ان شاء الله لأن احسه بعده صغير وما يتحمل الطلعة من البيت في هذا العمر... حاولي خليه هاي السنة وانتي جيبيلو ادوات تعليمية , قصص , اقلام ودفاتر وعلميه عالخفيف بالبيت وبيروح عالسنه الجاي جاهز نفسيا وجسديا ان شاء الله :)

السلام عليكم و رحمة الله تعالى و بركاته،

أني رأيي إنها عادي بشرط إن تختارين له حضانة عدلة مو أي كلام .. عمر ولدك نفس عمر ولدي .. أنا ولدي ولدته في 18-1-2006 و سجلته في حضانة حق الكورس الجاي يعني إن شاء الله الشهر القادم و الله يسهل و يهديه و يا رب يرضى يروح و ما يغربلني .. و هو إن شاء الله بيكون في مرحلة قبل الحضانة يعني Pre Nursery و عقبها بيكون بإذن الله في Nursery و بعدها KG1 و بعدين KG2 يعني بيقضي 4 سنوات في الحضانة و الروضة

بس بقول لج من خبرتي مع ولدي الكبير أحس الحضانة أفضل من قعدة البيت .. ولدي الكبير كان طول اليوم مع إني أوديه عند أمي بس معاه الشغالة عشان تساعد أمي في العناية به .. كان طول الوقت يلاحق الشغالات و في إيده قطعة قماش للتنظيف و يقعد يمثل إنه ينظف معاهم و قام يتكلم فلبيني .. حسيت إن إهتماماته صارت سخيفه و إنه يحتاج لأطفال يلعب معاهم و لهذا السبب دخلته الحضانة ...

عموماً في أول سنة في الحضانة ما يعلمونهم أشياء كثيرة بس يركزون على اللعب و يتكلمون معاهم أثناء اللعب عن الأسرة و عن العادات و السلوك الصحيح و مواضيع أخرى و بشكل مبسط جداً .. و خلال النهار ياخذونهم للعب في ساحة الحضانة و هي مساحة صغيرة مغطاة بالرمال و بها بعض الألعاب و مظلله عن الشمس.. ثم يأخذونهم إلى داخل الصف و يعلمونهم غسل أيديهم و يحين بعدها وقت وجبة الطعام ... فيتعلم الطفل الإعتماد على نفسه قليلاً في الأكل .. و هناك وقت مخصص لقراءة قصة .. أحياناً يعلمونهم بعض الأنشطة الفنية البسيطة من رسم و أعمال يدوية .. و مع نهاية اليوم و أثناء الإنتظار لأهاليهم يتركونهم يلعبون بما يشاؤن من ألعاب أو يسمحون لهم بمشاهدة برامج للأطفال على التلفزيون ... و أيضاً اليوم مقسم بين مدرستين إحداهم للغة العربية و الأخرى للغة الإنكليزية ..

يعني أحس إن ولدي إستفاد من كل النواحي و تعلم المشاركة و إستمتع من خلال اللعب مع أصدقائه .. بس أهم شي تختارين حضانه جيدة تتأكدين من ذلك عن طريق زيارتها .. شوف الصف و تأكدي من نظافته (أهم شي النظافة) و تهوية المكان و الإضاءة و ألوان المكان و ديكوراته و ترتيب الصفوف و لاحظي الألعاب الموجودة فيه هل تحسين عددها كافي و هل هي متنوعة و من نوعية جيدة (عشان ما تسبب الأذى للطفل) تأكدي من عدد المدرسات في كل صف و عدد الطلاب لازم ما يكون عدد الطلاب كبير على المدرسة .. إسأليهم عن منهجهم و برنامج الأطفال اليومي (لازم يكونون محضرين لبرنامج مدروس و على أساس منهج جيد) تأكدي من مستويات المدرسات و المساعدات و حتى أعمارهم و سنين خبرتهم ... و تأكدي من وجود تجهيزات لإستقبال الأطفال صغار السن .. يعني وجود من يبدل لهم الحفاظات و يساعدهم على دخول الحمام و إذا تعب الطفل و أراد النوم لازم يكون موجود مكان ممكن ينام فيه .. تأكدي من تجهيزاتهم و إجراءاتهم في حالات الطوارئ لو لا قدر الله مرض الطفل أو تعرض لجرح أو سقط على الأرض أو أي حادث .. تأكدي من نظامهم مع الأكل هل هم يوفرون الأكل و من وين يجيبونه و هل يعطونهم فواكه و هل يأكلون الطفل إذا ما أكل بنفسه .. و إذا الطفل لازم يجيب الأكل معاه ما هوا الأكل المسموح .. تأكدي بعد من نظام الإدارة و هل المديرة تكون متواجدة طول الوقت و تشرف على رعاية الطلاب .. كل هذه الأسئلة تعطيش إنطباع حول مكان تواجد طفلك و نوعية الأشخاص إللي راح يعتنون فيه و الرعاية إللي راح يحصلها منهم .. و تذكري إن هذه المرحلة يا راح تحببه في الدراسة أو تكرهه فيها فإختاريها له بعناية .. و إذا حسيتين إن بيئة الحضانة أقل من مستوى الرعاية إللي يحصلها فب البيت و حسيتين إنه راح يتضرر و يخسر من روحته للحضانه فأكيد ما ليها داعي و خليه قاعد في البيت أفضل .. بس إذا إمكانياتش تسمح بأخذه لمكان عدل فلا تترددين

مشكورين وما قصرتوا كلكم خلاص بخليه السنه وبوديه سنتين بس كفايه بعده صغير تالي يكره الدراسه بعد واتغربل وبالنسبه لكلامج اختي ام سلمان يمكن لانج تاركه ولدج مع الخدامه فتعود عليها واخذ منها بس انا ما عندي خدامه ولا احبهم ولما اروح الجامعه تاخذه عمته وبعد ما عندها خدامه وانا مرتاحه عليه عندها مثل مره حماي بنتها كل مع الخدامه تلبسها وتبدلها وحتى تقعد معاها في غرفتها فصارت تتكلم مثلها انا اهل زوجي عندهم خدامه لاكن ما تلمس ولدي بتاتا ولا لها علاقه فيه واخت زوجي موافقه تمسكه السنه بعد فليش اغربله مسكين خله يرتاح لاحق على الشقى