يشك فيني بدون سبب!!

السلام عليكم

انه صار لي 9 شهور مخطوبه من شخص من الاهل بس يصير لي من بعيد واهوه مو من ديرتي اهوه سعودي المهم اول الايام ما ملجنه كان يسولف و يعطي معاي فاتح لي صدره وكل شي بس لاحظت اغلب سوالفه كله عن الخيانه واحد خان زوجته الا واحد معانه في الشغل تعرف على وحده متزوجه تخون ريلها ويابت ولد من رفيجها بالحرام و الا اعرف واحد متعرف على كذا وحده متزوجه احسه عور راسي من هالسوالف قلت يالله باسمع اشوراي

المهم ياريت ان اهوه يسمع القصص و يسولف لي عنها بس تم يطبقها علي جني وحده خاينته كله وين بتروحين ومع من و متى تطلعين بالضبط ومتى بترجعين و يتصل لي بالدقيقه يسمع مع من قاعده ولو يسمح لي اطلع بس مع امي و اختي مع احد لا ربعي والله ما جفتهم فوق ال4 شهور مازور احد انطرهم يزوروني واهوه اييني كل 6 ايام يزورني بحكم شغله تخيلو طول هال6 ايام ما اجوف الشمس لين اقول له باروح الصالون يقول لي لين ييت باوديج و اذا عندي عرس او شي يخليني اروح الصالون مع امي و ازيدكم من الشعر بيت مره كنت رايحه عرس كل ساعه يتصل يسمعني رايحه صج عرس او لا و يقول لي لين دشو العروس والمعرس اتصلي لي عشان اسمع الدزه عشان اتأكذ ذي عرس او لا تخيلو بس و انه اتصل له اسمعه اقول له ليش اتشك اني في ديسكو يقول لي يمكن !!!!

وبعد كل مره يطلب مني ادش النت اكلمه عالمسنجر اقوم اشغل المايك اكلمه يقول لي اسمع صوت تايبنق اقول له لا ما اكتب يقول لي امبله تكتبين حق من احلف له محد يقول امبله بس باشتري لج كام عشان اجوفج اذا تكتبين حق احد او لا قلت له انه اوك و قبل لا يشتريها لي شريت لي لاب توب فيه كام عشان اخليه يطالعني اني ما اكتب حق احد و لين انزل راسي يقول اكيد تكتبين اقول له لا تصدقون خلاني اضطر لين اكلمه ارفع يدي او احطها عن خدي عشان يجوف يدي !!

تدرون حتى لين اطلع معاه في السياره اسولف معاه لين الف عليه وانه اسالف يقول لي تطالعين من هناك تعرفينهومن ذي اقول له ما اطالع احد اطالعك انت عشان اكلمك يقول لا طالعي كله سيده و تكلمي اقول له ليش تسوي فيني هلون جايف علي شي يقول لا كلش ماجفت وانتي حليوه كله في البيت مع اهلج و يمدح و هلون اقول له عيل ليش تسوي فيني جذي يقول لي لازم اخذ الاحتياط الشيطان شاطر ما نبي نخرب حياتنه بالخيانات و تعرفين ناس السوء وايد

انه اعرف انه الحمد لله اهوه ماعنده سوالف اغلب وقته في البيت و ماعنده خرابيط حتى ما يدخن سوالف بنات ماعنده حتى اول ايامنه كان ما يعرف يكلمني عدل كله يقول لي يا اخي و ياخوي هههه والحمد لله محافظ على صلاته لو اهوه عنده خرابيط جان باقول لان اهوه يسوي ما يبيني اسوي مثل ما يقولون ما يضن بالشين الا فعاله بس القهر ميود علي احتياط و احتياط وسوالف وايد باتعب من الكتابه لين باكتبها لكم

اكثر اوقاتنه نتهاوش على هالشي يقول لي ما تبيني اسوي هلون تبين اخليج و تلعبين بعدين لعبتج و بصراحه هالايام احس اني طفشت منه و ساعات اتحسف اني خذته بس اتعوذ من بليس حتى اوهوه يقول تغيرتي علي احسج ما تشتهيني اقول له لانك جذي و جذي يقول لي تحملي كل ذي خايف عليج ومابي اخسرج شاسوي معاه مابي يتم على هالتصرفات يحسسني اني لعابه صج شاسوي معاه

ومسامحه لاني طولت عليكم بس ابي حل