زيارتي للهند-بومباي
التاريخ: 16-27 يوليو 2008
المكان: مدينة موباي (بومباي)
الهدف: علاج و سياحة
الصور
طيران الامارات (قولي و الله :p)
مدينة بومباي من السما
الفندق تاج محل
الفندق من أقدم الفنادق في بومباي و الهند بشكل عام.
عاصر الفندق الحروب العالمية و فترة الاحتلال البريطاني للهند و في فترة من الفترات كان في اقتراح بهدم الفندق و اعادة بناء فندق جديد. في هالفتره ضرب بومباي زلزال كبير دمر كل شي و لكن فندق التاج ما تاثر و هذا اثبت للكل ان بنيانه قوي.
و بعدها تم بناء البرج.
موقعه: في منطقة كولابا وهي منطقة العرب في بومباي.
الجبان الى مب راضي ينزل و واقف على السلم ولد أخوي و خواته الثنتين ما شاء الله عليهن يسبحون
يوم ممطر في بومباي..و طبعا شهر سبعه هو شهر الامطار عندهم
بوابة الهند
بناء تاريخي تم بناءه عام 1911 لاستقبال الملك جورج و الملكة ماري
برج الساعة
التسوق في بومباي
أكثر السياح العرب يركزون في التسوق في الهند على محلات الجلابيات و العطور العربية و العود و كل هالاشياء موجودة في منطقة كولابا
أجمل عنده أكثر من فرع في كولابا (قريب من الفندق).. انا اشتريت العود الكمبودي و دهن العود السيوفي و المسك الابيض من أجمل
و في محل ثاني في شارع اسمه محمد علي (من اسمه واضح انها منطقة مسلمين) اسمه زري والا.
خذت من عنده دهن العود القديم و مسك ابيض و عود.
الاثنين بضاعتهم ممتازه و اسعارهم متشابهه بس انا عيبني زري والا اكثر
أجمل احس انه بطر من كثر ما يسيرون له العرب فما ينزل السعر. زري والا وايد عرب يسيرون له بس تعامله ممتاز.
سالنا وين ساكنين و طرشنا لنا اليوم الثاني سلة فواكه كبيره!
و خذ منا العنوان في الامارات (كاتب في دفتر عناوين كل زباينه) و خبرونا الى تعاملوا معاه قبل انه ياخذ العنوان علشان يطرش بطاقات تهنئة في الاعياد!
هي أشياء بسيطه وايد بس لفته حلوه و طريقه يكسب فيها زباينه.
و اكثر شي عيبني اني اقدر اطلب من الامارات و يطرش لي الاغراض بالDHL و احول له المبلغ عن طريق محلات الصرافة :w8: (الى يبى عنوانه بطرشه له ان شاء الله)
بالنسبة للجلابيات
هاريس (وايد وايد بطران و اسعار نفس البضاعه في الامارات ارخص) - راميش اسعاره معقوله اكثر
وفي محلات في كولابا عندهم اشياء بعد.
وفي محلات في كولابا عندهم اشياء بعد.
بالنسبة للمراكز عندهم بعض المراكز الجديده مثل اتريا و اينوكس (الاثنين اكثر محلاتهم موجوده عندنا) و مركز الشيراتون (فندق اوبراي) - مركز سيتي سنتر
(انا ما عيبتني مراكزهم.. اكثرها تعبانه و المراكز الحلوه نفس محلاتنا)
و بالنسبة للماركات موجودة في فندق تاج محل مثل لويس فيتون و ديور و فندي و بلجاري الخ
الاكل
المطاعم في منطقة كولابا متعوده على العرب فعلى طول يسالون الاكل حار و الا لا؟
و أكلهم حلو بس ما دخلت هالمطاعم لان كنا نطلب و ناكل في الفندق
العلاج
المستشفى الى يسيرون له العرب هو مستشفى جاسلوك
و عن حالتي أخيرا عرفت سبب تكرر حصوات الكلى عندي و هي زيادة مادة uric acid و هي موجوده في اللحم (مع اني ما آكل لحم خير شر) بس السبب في حالتي قلة شرب الماي!
فنصيحة للجميع خففوا من اللحوم و كثروا من الماي.
هل تستاهل الزيارة؟
الهند أكيد لان فيها مناطق سياحية روعه لكن بومباي نفسها ما فيها شي تقريبا غير السوق
و اكثرها اشياء موجوده عندنا مع فرق الاسعار (العود عندنا اغلى ب300 درهم تقريبا)
و سلامتكم
