بنات شوفو وش صار لي

السلام عليكم ورحمة الله وبركاته

كيفكم بنات وكيف الحمل معاكم ..

ابدخل على طول في الموضوع ومعليش استحملوني لو طولت عليكم . انا في بداية الشهر الثامن

نزل مني مويه صفراء من اسبوعين هالكلام صار يوم السبت يوم جيت اروح دورة المياه اعزكم الله

لمن شفتها بصراحه خفت لانه اول مره يصير معي . دقيت على امي وعلمتها قالت ارفعي رجولك

وارتاحي لاتتحركين كثير المهم سمعت كلامها وارتحت. جا يوم الاحد والحمدلله عدا على خير

ماحسيت بشي .يوم الاثنين رحت السوق ومشيت كثير يوم وصلت البيت ونزلت من السياره

نزلت مني برضو مويه بس بيضاء يعني مثل المويه على طول رحت ارتاح ع السرير قلت ماراح

اروح المستشفى الا لمن يجي موعدي . جا الثلاثاء ورحت للدكتورتي وبصراحه ماعلمتها لاني

خفت تكشف علي من تحت بس قلت لها ان حركة البيبي مره قليله وضعيفه . قالت اجل لازم

نسوي لك تخطيط لنبض الجنين . رحت سويت التخطيط ولقو نبضاته مره ضعيفه وقالو على طول

غرفة الولاده بنحطك تحت الملاحضه . جلسوني في العربيه وعلى طول لغرفة الولاده ولبسوني

لبس الولاده وحطو علي الجهاز حق التخطيط وانا دموعي اربع اربع خفت يولدوني وانا توي في

الثامن . جتني الدكتوره قالت احتمال يجيك ولاده ولازم نعطيك ابره الرئه للبيبي وفعلآ عطوني

الابره والله يابنات حسيت كأن شوك ينغزني بقووه من تحت وعلى صدري وعلى طول خف الالم

والجهاز هذا علي حاطينه يوم كامل تضايقت منه ماعرفت انام . يوم انتضمت الحمدلله دقاته

حطوني بغرفة التنويم وجلست عندهم الاربعاء والخميس يوم شفت ان حالتي استقرت قلت

لدكتوره خلاص طلعيني ابي اروح للبيت قالت حالتك حرجه والبيبي الحين مويته ناقصه اخاف

اطلعك وتنزل مويه مره ثانيه . قلت طلعيني على مسؤليتي وفعلا طلعت ووقع زوجي على خروجي

كنت مبسوطه يوم طلعت توي داخله بيتي جلست ع السرير ارتاح شوي وزوجي راح يجيب عشاء

مالي ولا عشر دقايق مرتاحه قلت بروح الحمام وانا رايحه الا وتنزل مني مويه :confused: انا قمت

ارتجف وقعدت ابكي ودقيت على زوجي قلت تعال بسرعه انا تعبانه ويجي مسررع حتى الطلب

اللي طلبه رجعه وقال يلا ع المستشفى :confused: رحت للطوارئ وشافتني دكتورتي قالت

رجعتي لنا مره ثانيه . قالت يلا على طول غرفة الولاده عشان نتطمن ع الجنين ونشوف رحمك

دخلت لغرفة الرعب ( الولاده ) ونفسيتي زي الزفت بس طول الوقت ابكي وادعي ربي واستغفر

قالت بكشف عليك يمكن الرحم يكون مفتوح وكشفت علي ودخلت يدينها من جوا احس قلبي

بيطلع . قالت الرحم مقفل . وحطو جهاز التخطيط علي لقو النبض مررره نازل ضعيف وعطوني

اكسجين قالت الدكتوره لو ضل الوضع كذا ترا بنولدك قيصري يوم قالته وانا ازيد في الصياح والخوف

المهم الحمدلله بفضل الله ثم هالاكسجين بدا يرتفع شوي نبض الجنين حتى انتظمت الدقات

وخلو الجهاز علي يوم كامل . وبعدين نقلوني لغرفة التنويم بس الدكتوره ضيقت صدري تقول

الحين رحمك مافيه مويه نهائيآ كلها نزلت والمشيمه بدت تضعف وماصارت تعطي غذاء كويس

للبيبي لازم تجلسين عندنا لحد ماتولدين . والجهاز هذا صارو يحطونه علي 3 مرات في اليوم

مدة نص ساعه عشان يراقبون النبض وعطوني حبوب اسبرين للمشيمه . المهم جلست اسبوعين

عندهم كنها شهر بالنسبه لي واليوم الحمدلله اشكر ربي واحمده اني طلعت لبيتي بدون ولاده

لاني ابي اكمل ع الاقل الثامن مو مشكله لو ولدت بأول يوم من التاسع . بس نصيحه لاتتساهلون

في موية الجنين لو نزلت على طول ع المستفى . انا غلطتي سكت على عمري وشوفو وش

صار فيني . ادعوا لي تكفون ان الله يثبت اللي في بطني واتم الثامن على خير . واللي مرت

بها التجربه وش صار على جنينها يوم ولدته هل هو بصحه وعافيه ولا صارت له مشكله لاني

خايفه عليه من نقص الاكسجين وخايفه عليه من نقصان المويه هل تسبب مشاكل علي وقت

الولاده تكفون ردو علي لان نفسيتي تعبانه