ساعدوني في ارضاع طفلي

انتي بما ان عندك دوام ... كان المفروض من الاول تفكري في هذا الشي ومن اول يوم تعوديه على الرضاعة ... بس الان بعد ما تعود على الرضاعة الطبيعية بيكون لك صعب ... حلك الوحيد انك تنتظري كم يوم وتحاولي تخليه يتعود عليها .... يعني هو لو جاع بايضطر يشرب بالرضاعة ..

مشكورة أختي على الرد

بس لما كان عمره أقل من شهرين عطيته الرضعة كم يوم لأني كنت أطلع وأخليه عند أمي وفي مرة اضطريت أسافر عنه 12 ساعة وكان يرضع بسهولة بس مدري شفيه متنيحس الأن

الله يعينج و يعين ولدج بصراحة هالوضع صعب و انا جربته بس بالنهايه قررت اني استأذن ساعة للرضاعة و لا اني اعطيها الزجاجة و الحمدلله مشت الامور و دوامي متفهمين

اذا ممكن تاخذين اجازة امومة يكون افضل انا انصح عالاقل 6 شهور خصوصاً ان دوامج وااااااااااااااااايد وااااااااااايد طويل

ليش ما تشفطين له الحليب وتخلين الوالدة ترضعه بالمرضعه!!!!

حاولي تشترين له الحلمه اللي مثل حلمة الأم وترضعينه فيها يمكن يتقبلها اكثر

حبيبتــي هذي كانت نفس غلطتـــي ... كنت أرضع ولدي
طبيعي.... ولما داااومت تعبت معاه وااايد...
وقمت اعــوده ع الصناعي شوي شوي لحد ما تقبله والحمد لله
لا تيأسي حاولي معاه صحيح هو بيصيح ويرفض
بس في الأخر بيشرب الصناعي...

شوفي حبيبتي

لما ينام نومه طويلة جهزيله غرشة حليب اول ما يصحى عطيه بيشربها من الجوع

وشوي شوي بيتعود صدقيني انا ولدي كان كذا وكنت اتقطع بالدوام لما تقولي امي ما شرب وما شرب انهار

وبعد المفروض تاخذي ساعه رضاعه

واذا الوضع المادي يسمح اخذي اجازة ليما يكمل ال 6 اشهر يكون بدا ياكل على الاقل

السلام عليكم و رحمة الله تعالى و بركاته،

هو ما في مفر من إن تحاولين معاه مره ثانية عشان يتعود على الرضاعة و مثل ما قالت وحدة من الأخوات إختاري الأنواع إللي حلماتها كبيرة و مقاربة أكثر لصدر الأم ... بس بالنسبة للصناعي فحاولي تتفادينه .. الأفضل إن تشفطين له الحليب و تجمعينه .. و جربي تجوعينه شوي و خلي أحد غيرك يحمله و يمسك له الرضاعة في وقت رضعته لأن طول ما هو يشوفك و يشم ريحتك راح يبكي و يصر إن ترضعينه طبيعي.. فإذا كنتي ناوية تخلينه عند الوالدة فروحي و قعدي عندها كم يوم قبل الدوام خلال النهار و وفي وقت الرضعة إشفطي له الحليب و و أعطيه لوالدتك لكي ترضعه.. و إذا ما شرب و ضل يبكي فلا تعطينه شي و هزيه عشان يسكت و بعدها بساعة مثلاً جربي مرة ثانية و خلي الوالدة بعد إهي إللي تعطية .. أنا سويت هالشي مع ولدي الكبير أما الصغير فبدأت معاه بشكل أبكر و الحمد لله لأنه ما يفهم فتقبل الرضاعة

و بغيت أسأل هل من الصعب إن تاخذين ساعة رضاعة في منتصف الدوام .. عشان مثلاً ترضعينه الصبح قبل لا تتركينه (الساعة 6) و بعدين ترضعه الوالدة الحليب إللي شفطتيه (الساعة 10) و بعدها تستأذنين الظهر ساعة (الساعة 2) و تروحين ترضعينه و آخر رضعة لما ترجعين البيت ترضعينه طبيعي

بس لازم تخلين عندك مخزون بمقدار 4 رضعات على الأقل تخلينهم في الفريزر تحاولين تجمعينه من الآن في أي فرصة ممكنه .. و بعدين تاخذين عدة الشفط معاك للمكتب و تحتاجين بعد للعلبة المستخدمة في حفظ المشروبات أو الأطعمة باردة مع الثلج الأزرق إللي يستخدم معاها (إن شاء الله بحط لج صورهم) و في المكتب كل يوم بوقت الرضعة الأولى لولدج إللي الوالدة بتعطي إياها في البيت (تقريباً يعني مو بالضبط بس يعني تقريباً على الساعة 10 أو 11 ) تروحين الحمام و تشفطين الحليب و تحفظينه في علبة حفظ الأطعمة إللي ذكرتها لج قبل شوي و تمشين على البرنامج إللي قلت لج عليه أو إللي إنتي تحبينه و لما تروحين البيت تحطين الحليب إللي شفطتيه في الفريزر و تحطين إشارات على الرضاعات في الفريزر بحيث تعرفين أي وحدة أقدم عشان الوالدة كل مرة تعطيه الحليب الأقدم و تخلين الجديد ..

و ترى هالشي ما بتطولين عليه لأن لما يبتدي ياكل بيخف إحتياجه للحليب و بعد كم شهر بإذن الله ممكن تستغنين عن عملية الشفط

بالنسبة للصور .. عندج هذه شفاطة ماركة أفنت Avent ممتازة و تشفط زين و رخيصة .. في منها بعد نوع كهربائية بس بتكون أغلى شوي .. عموماً أنا عندي اليدوية هذه وايد زينه



بالنسبة للعلبة و الثلج الأزرق فموجود بعد ماركة أفنت على هيئة شنطة تحفظ الحرارة هذه صورتها و بتشوفين في الصورة الثلج الأزرق




يمكن الشنطة تكون غالية شوي بس تحصلين ماركات ثانية في محلات مستلزمات الأطفال ممكن تكون أرخص .. بس العلبة إللي أتكلم لج عنها و إللي تؤدي نفس الغرض هي المستخدمة في الرحلات بس في منها أنواع صغيرة



و هذه هي العلب إللي مثل ما قلت لج هي أو الشنطة نفس الغرض







و الثلج الأزرق هذا شكله





ترى السالفة سهلة و مو صعبة و لا مكلفة و التعب إللي شوية بتتعبينه يسوى مقارنة بصحة طفلك و إرتباطك فيه

إذا عندك أي أسئلة و تحتاجين مساعدة حول طريقة الشفط فلا تترددين إسأليني و بكون سعيدة بالإجابة على إستفساراتك .. و بالتوفيق يا رب

بالصراحة عاجزة عن شكر جميع الأخوات وخاصة الأخت أم سلمان الحلو يعطيك الله العافية والص
حة والسلامة

اليوم جبت له حلمة زي الحلمة الطبيعة بس مانفع معاه
من الصباح جالسة أحاول معاه ويصيح حيل وبعدها ينام من التعب
أنا راح أستمر معاه وماراح أوقف
بالنسبة للأستئدان صعبة لسبب بسيط وهو أن ماعندي أحد يطلعني للبيت(بلدنا مايسمح لنا نسوق سيارات)
وأنا طلبت اجازة لحد مايكمل 7 شهور وافقوا بشرط أدوام هالشهر بس عشان موسم الاجازات
راح أحاول وبإدن الله راح أنجح

انصحك باخذ اجازة امومة ابنك اهم من الراتب

حبيبتي انا نفس الشي قبل لا ادوم باسبوع بس حاولت اعود بنتي على الصناعي .. بدايه كان صعب و ما تتقبل بس صارت تشربه لما فعلاً تحس بجوع..

صرت اطلع لها حليبي في المرضعه و أحطه بالثلاجه و لو ما كفاها الحليب ذاك الوقت بس يعطوها صناعي.. يعني احاول اقلل قدر الإمكان من الصناعي..

تقدري تسوي نفس الشي و الفترات اللي ما يرضع فيها حاولي تطلعي حليب و تخليه بالثلاجه و على كلام دكتورتي بيكون صالح لمدة 24 ساعه..